ପ୍ରଥମ କରି ସ୍କ୍ରିନ ସେୟାର କରିବେ ଶାହରୁଖ-ଆରୟନ, ହେଲେ ଫିଲ୍ମରେ ନୁହେଁ...

ମୁମ୍ବାଇ: ପ୍ରଥମ କରି ପୁଅ ଆରୟନ ଖାନଙ୍କ ସହ ସ୍କ୍ରିନ ସେୟାର କରିବେ ବଲିଉଡ କିଙ୍ଗ ଶାହରୁଖ ଖାନ୍। କୌଣସି ଫିଲ୍ମରେ ନୁହେଁ ବରଂ ଏକ ଚାଟ୍ ସୋ’ରେ ଦୁହେଁ ନଜର ଆସିବେ ବୋଲି ଜଣାପଡ଼ିଛି। ଜାତୀୟ ଗଣମାଧ୍ୟମ ଅନୁଯାୟୀ, ଦୁହେଁ ଲୋକପ୍ରିୟ ସୋ’ କଫି ଉଇଥ୍ କରଣରେ ନଜର ଆସିବେ।

ଏହି ସୋ’ରେ ସେଲିବ୍ରିଟିଙ୍କୁ ତାଙ୍କ ବ୍ୟକ୍ତିଗତ ଜୀବନ ସହ ବୃତ୍ତିଗତ ଜୀବନକୁ ନେଇ ପ୍ରଶ୍ନ ପଚରାଯାଏ। ଏଥର ଦର୍ଶକମାନେ ଉତ୍ସାହର ସହିତ 'କଫି ଉଇଥ୍ କରଣ-୮' କୁ ଅପେକ୍ଷା କରିବେ। କାରଣ ଏଥର ବଲିଉଡ କିଙ୍ଗ ଶାହରୁଖ ଖାନ ଏବଂ ତାଙ୍କ ପୁଅ ଆରୟନ ଖାନ ଏହି ସୋ’ ମାଧ୍ୟମରେ ପ୍ରଥମ ଥର ଦର୍ଶକଙ୍କ ସାମ୍ନାରେ ହାଜର ହେବାକୁ ଯାଉଛନ୍ତି। କିଙ୍ଗ ଖାନ ତାଙ୍କ ପୁଅ ଆରୟନଙ୍କ ସହ ପୂର୍ବରୁ ସ୍କ୍ରିନ ସେୟାର କରିନଥିବା ବେଳେ ଦର୍ଶକ ଦୁହିଁଙ୍କୁ ଏକାଠି ପ୍ରଥମ ଥର ଦେଖିବାକୁ ପାଇବେ।

ଶାହରୁଖ ଖାନ କରଣଙ୍କ ସୋ’ 'କଫି ଉଇଥ୍ କରଣ-୭'ରେ ଅଂଶଗ୍ରହଣ କରିନଥିଲେ, ଯାହା ତାଙ୍କ ପ୍ରଶଂସକମାନଙ୍କୁ ନିରାଶ କରିଥିଲା। ହେଲେ ଏବେ ସୋ’ର ଅଷ୍ଟମ ସିଜିନରେ ଶାହରୁଖ ନିଜ ପୁଅ ସହ ନଜର ଆସିବେ ବୋଲି ଜଣାପଡ଼ିଛି। ଏହି ସୋ’ରେ ଅଂଶଗ୍ରହଣ କରି ଶାହରୁଖଙ୍କ ପତ୍ନୀ ଗୌରୀ ଖାନ ମଧ୍ୟ ପ୍ରଶଂସକଙ୍କୁ ଆଶ୍ଚର୍ଯ୍ୟ କରିପାରନ୍ତି ବୋଲି କୁହାଯାଉଛି। ଇ ଟାଇମ୍ସର ରିପୋର୍ଟ ଅନୁଯାୟୀ, ବର୍ତ୍ତମାନ ଶାହାରୁଖ ଏବଂ ଆରୟନ ଏହି ସୋ’ରେ ଅଂଶଗ୍ରହଣ କରିବେ ବୋଲି ଆଶା କରାଯାଉଛି।