ଯୁବା ଦିଶିବା ପାଇଁ ଔଷଧ ଖାଉଥିଲେ ଶେଫାଲି !

ମୁମ୍ବାଇ: ଟେଲି ଅଭିନେତ୍ରୀ ଶେଫାଲି ଜରିୱାଲାଙ୍କ ମୃତ୍ୟୁ ଉଭୟ ପ୍ରଶଂସକ ଏବଂ ସେଲିବ୍ରିଟିଙ୍କୁ ଏକ ବଡ଼ ଝଟକା ଦେଇଛି। ସମ୍ପୂର୍ଣ୍ଣ ଫିଟ୍ ଥିବା ଶେଫାଲିଙ୍କର କିଭଳି ହୃଦଘାତ ହେଲା ସେ ପ୍ରଶ୍ନ ଏବେ ସମସ୍ତଙ୍କ ମନରେ। ଅଭିନେତ୍ରୀଙ୍କ ମୃତଦେହକୁ ଏବେ ପୋଷ୍ଟମର୍ଟମ ପାଇଁ କୁପର ହସ୍ପିଟାଲକୁ ପଠାଯାଇଛି। ଅନ୍ୟପକ୍ଷରେ ମୁମ୍ବାଇ ପୁଲିସ ତାଙ୍କ ସ୍ୱାମୀ ତଥା ଅଭିନେତା ପରାଗ ତ୍ୟାଗୀଙ୍କ ବୟାନ ରେକର୍ଡ କରିଛି। ପରାଗ ପ୍ରକାଶ କରିଛନ୍ତି ଯେ, ଶେଫାଲି ପୂର୍ବରୁ ଚିକିତ୍ସାଧୀନ ଥିଲେ। ‌

ଶେଫାଲି ଜରିୱାଲାଙ୍କୁ ଚିକିତ୍ସା କରୁଥିବା ଡାକ୍ତର କହିଛନ୍ତି ଯେ, ସେ ଗତ ୫-୬ ବର୍ଷ ଧରି ଯୁବା ଦେଖାଯିବା ପାଇଁ ଚିକିତ୍ସା କରୁଥିଲେ। ଶେଫାଲି ଦୁଇଟି ଔଷଧ ଖାଉଥିଲେ ଯେଉଁଥିରେ ଭିଟାମିନ୍ ସି ଏବଂ ଗ୍ଲୁଟାଥିଓନ୍ ଅନ୍ତର୍ଭୁକ୍ତ। ଡାକ୍ତର ଦାବି କରିଛନ୍ତି ଯେ, ଏହି ଔଷଧର ହୃଦୟ ସହିତ କୌଣସି ସମ୍ପର୍କ ନାହିଁ। ଏହି ଔଷଧଗୁଡ଼ିକ ଚର୍ମର ରଙ୍ଗ ଉଜ୍ବଳ କରିବା ପାଇଁ ନିଆଯାଏ ଏବଂ ଏହାର ପ୍ରଭାବ କେବଳ ଚର୍ମ ଉପରେ ପଡ଼ିଥାଏ। ଶେଫାଲି ବହୁତ ଫିଟ୍ ଥିଲେ ଏବଂ ମୋତେ କେବେ ବି କୌଣସି ରୋଗ ଥିବା ବିଷୟରେ କହି ନଥିଲେ।

ଉଲ୍ଲେଖଯୋଗ୍ୟ, ପରାଗ ତ୍ୟାଗୀ ହେଉଛନ୍ତି ଶେଫାଲି ଜରିୱାଲାଙ୍କ ଦ୍ୱିତୀୟ ସ୍ୱାମୀ। ଅଭିନେତ୍ରୀ ପ୍ରଥମେ ୨୦୦୪ ମସିହାରେ ମିଟ୍ ବ୍ରଦର୍ସର ହରମିତ୍ ସିଂହଙ୍କୁ ବିବାହ କରିଥିଲେ। କିନ୍ତୁ ପାଞ୍ଚ ବର୍ଷ ପରେ ୨୦୦୯ ମସିହାରେ ଶେଫାଲି ହରମିତ୍‌ଙ୍କୁ ଛାଡ଼ପତ୍ର ଦେଇଥିଲେ। ଅଭିନେତ୍ରୀ, ହରମିତ୍‌ଙ୍କ ଉପରେ ଘରୋଇ ହିଂସା ଏବଂ ମାନସିକ ନିର୍ଯାତନାର ମଧ୍ୟ ଅଭିଯୋଗ କରିଥିଲେ। ହରମିତ୍‌ଙ୍କ ସହ ଛାଡ଼ପତ୍ରର ୬ ବର୍ଷ ପରେ, ଶେଫାଲି ୨୦୧୫ ମସିହାରେ ପରାଗଙ୍କୁ ବିବାହ କରିଥିଲେ।