ବଲିଉଡ୍ ଗୀତିକାରଙ୍କ ଉପରେ ସଙ୍ଗୀନ ଅଭିଯୋଗ: ଜନ୍ମଦିନ ପାର୍ଟିରେ ମହିଳାଙ୍କୁ ଏକା ପାଇ କରିଥିଲେ ଅସଦାଚରଣ
ଡେରାଡୁନ୍ : ବଲିଉଡ୍ର ଜଣେ ଆଗଧାଡ଼ିର ଗୀତିକାର ଜୁବିନ୍ ନୌତିଆଲଙ୍କ ଉପରେ ଅସଦାଚରଣର ଅଭିଯୋଗ ଆସିଛିି । ନିଜର ଜନ୍ମଦିନ ପାର୍ଟିରେ ସେ ନିଶାଗ୍ରସ୍ତ ହୋଇ ଜଣେ ମହିଳା ବନ୍ଧୁଙ୍କ ସହ ଅସଦାଚରଣ କରିଥିଲେ ବୋଲି ଆରୋପ ଲାଗିଛି । ଏହି ଘଟଣାଟି ଡେରାଡୁନ୍ରେ ଘଟିଥିବା ବେଳେ ଏ ନେଇ ପୀଡ଼ିତ ଜଣଙ୍କ ପୁଲିସରେ ଅଭିଯୋଗ କରିଛନ୍ତି । ଅନ୍ୟ ପକ୍ଷରେ ଏ ଘଟଣାକୁ ନେଇ ଏକ ଭିନ୍ନ ଅଭିଯୋଗ ଆଣିଛନ୍ତି ଜୁବିନ୍ । ଅଭିଯୋଗ ଆଣିଥିବା ଯୁବକ ଜଣଙ୍କ ତାଙ୍କ କାର୍ ଭଙ୍ଗାରୁଜା କରିବା ସହ ମାର୍ପିଟ୍ ମଧ୍ୟ କରିଥିଲେ ବୋଲି ଜୁବିନ୍ ଅଭିଯୋଗ ଆଣିଛନ୍ତି । ଉଭୟ ପକ୍ଷରୁ ଅଭିଯୋଗ ପାଇବା ପରେ ଘଟଣାର ସତ୍ୟାସତ୍ୟ ଜାଣିବା ପାଇଁ ତଦନ୍ତ ଆରମ୍ଭ କରିଛି ପୁଲିସ ।
Sambad is now on WhatsApp
Join and get latest news updates delivered to you via WhatsApp
ଶଶାଙ୍କ ମିତ୍ତଲ କରିଥିବା ଅଭିଯୋଗ ଅନୁଯାୟୀ,ଡେରାଡୁନ୍ରେ ଜୁବିନ୍ଙ୍କ ଜନ୍ମଦିନ ପାର୍ଟିରେ ଯୋଗ ଦେବା ପାଇଁ ମୁଁ ଏବଂ ମୋର ଜଣେ ବାନ୍ଧବୀ ଆସିଥିଲୁ । ମୁଁ କୌଣସି କାମରେ ବାହାରକୁ ଯାଇଥିବା ବେଳେ ଜୁବିନ୍ ଏହାର ସୁଯୋଗ ନେଇ ମୋ ବନ୍ଧୁଙ୍କ ସହ ଅସଦାଚରଣ କରିବା ଆରମ୍ଭ କରିଥିଲେ । ଏହା ଜାଣିବା ପରେ ମୁଁ ତାଙ୍କୁ ଏ ବିଷୟରେ ପଚାରିବାରୁ ସେ ମୋତେ ନିଜ ସଂପର୍କିୟଙ୍କ ସହ ମିଶି ମାଡ଼ ମାରିଥିଲେ । ଅନ୍ୟ ପକ୍ଷରେ ନିଜ ଉପରେ ଲଗାଯାଇଥିବା ସମସ୍ତ ଅଭିଯୋଗ ଖଣ୍ଡନ କରି ମୁଁ ଘରକୁ ଫେରୁଥିବା ବେଳେ ଶଶାଙ୍କ ଏବଂ ତାଙ୍କର କିଛି ସାଥୀ ମୋତେ ଅଟକାଇ କାର୍ର କାଚ ଭାଙ୍ଗି ଦେଇଥିଲେ ବୋଲି କହିଛନ୍ତି ଜୁବିନ୍ । ପ୍ରାଥମିକ ତଦନ୍ତରୁ ଜୁବିନ୍ ଏବଂ ଶଶାଙ୍କ ମଧ୍ୟରେ ଅନ୍ୟ କିଛି କାରଣରୁ ଝଗଡ଼ା ଆରମ୍ଭ ହୋଇଥିଲା ବୋଲି ଜଣାପଡ଼ିଛି ।