ବାପାଙ୍କ ପରେ ଏବେ ବାହାଘରକୁ ନେଇ ମୁହଁ ଖୋଲିଲେ ନିଜେ ସୋନାକ୍ଷୀ

ନୂଆଦିଲ୍ଲୀ: ଅଭିନେତ୍ରୀ ସୋନାକ୍ଷୀ ସିହ୍ନା ଚଳିତ ମାସ ଶେଷରେ ତାଙ୍କ ଦୀର୍ଘ ଦିନର ପ୍ରେମିକା ଜାହିର ଇକବାଲଙ୍କୁ ବିବାହ କରିବାକୁ ପ୍ରସ୍ତୁତ ଥିବା ଗତ କିଛି ଦିନ ହେବ ଚର୍ଚ୍ଚା ହେଉଛି। ଅଭିନେତ୍ରୀଙ୍କ ପିତା ଶତ୍ରୁଘ୍ନ ସିହ୍ନା ଏବଂ ତାଙ୍କ ଭାଇ ଲଭ୍ ସିହ୍ନା ଏହି ଗୁଜବ ଉପରେ ପ୍ରତିକ୍ରିୟା ପ୍ରକାଶ କରିବା ପରେ ସୋନାକ୍ଷୀ ମଧ୍ୟ ଏହି ଗୁଜବ ବିଷୟରେ ଏବେ ଖୋଲିକି ନିଜର ମତ ରଖିଛନ୍ତି।

ଏକ ବାର୍ତ୍ତାଳାପରେ ଅଭିନେତ୍ରୀ କହିଛନ୍ତି, “ପ୍ରଥମତଃ ଏହା ଅନ୍ୟ କାହାର ବ୍ୟବସାୟ ନୁହେଁ। ଦ୍ୱିତୀୟତଃ ଏହା ମୋର ବ୍ୟକ୍ତିଗତ ପସନ୍ଦ। ତେଣୁ ମୁଁ ଜାଣେ ନାହିଁ କାହିଁକି ଲୋକମାନେ ଏହା ବିଷୟରେ ଏତେ ଚିନ୍ତିତ ଅଟନ୍ତି। ଲୋକମାନେ ମୋ ବିବାହ ବିଷୟରେ ମୋ ପିତାମାତାଙ୍କ ଅପେକ୍ଷା ଅଧିକ ପଚାରୁଛନ୍ତି, ତେଣୁ ଏହା ମେ‌ାତେ ଅତ୍ୟନ୍ତ ଆଶ୍ଚର୍ଯ୍ୟ ଲାଗୁଛି। ବର୍ତ୍ତମାନ ମୁଁ ଏଥିରେ ଅଭ୍ୟସ୍ତ। ଏହା ମୋତେ ବ୍ୟଥିତ କରୁନାହିଁ। ଲୋକମାନେ ଆଗ୍ରହୀ ଅଟନ୍ତି ତ ମୁଁ ଏହାକୁ ନେଇ କ’ଣ କରିପାରିବି? ”

ନିକଟରେ ଝିଅ ସୋନାକ୍ଷୀ ସିହ୍ନ‌ା ଓ ତ‌ାଙ୍କ ପ୍ରେମିକ ଜହିର ଇକବାଲଙ୍କ ବିବାହ ସଂପର୍କରେ ମୁହଁ ଖୋଲିଥିଲେ ଶତ୍ରୁଘ୍ନ ଶିହ୍ନା। ଜୁମ୍‌କୁ ଦେଇଥିବା ଏକ ସାକ୍ଷାତକାରରେ ଶତ୍ରୁଘ୍ନ କହିଥିଲେ ଯେ ସେ ତାଙ୍କ ଝିଅ ସହ ବିବାହ ବିଷୟରେ କିଛି ବି କଥ‌ା ହୋଇନାହାନ୍ତି।

ସେ ଆହୁରି ମଧ୍ୟ କହିଥିଲେ ଯେ ଯେତେବେଳେ ବି ତାଙ୍କ ଝିଅ ସେମାନଙ୍କୁ ବିବାହ ବିଷୟରେ ଜଣାଇବେ ସେ ଏବଂ ତାଙ୍କ ପତ୍ନୀ ତାଙ୍କୁ ଆଶୀର୍ବାଦ ଦେବେ।

 

ସମ୍ବନ୍ଧିତ ଖବର