କର୍କଟ ଚିକିତ୍ସା ପାଇଁ ନ୍ୟୁୟର୍କ ଯିବାକୁ ଚାହୁଁ ନ ଥିଲେ ସୋନାଲୀ, ସେଠାରେ ପହଞ୍ଚିବା ପରେ ବଞ୍ଚିବାର ମାତ୍ର ୩୦ପ୍ରତିଶତ ସୁଯୋଗ ରହିଥିବା କହିଥିଲେ ଡ଼ାକ୍ତର
ମୁମ୍ବାଇ : ଗତ ଜୁଲାଇ ମାସରେ ଯେତେବେଳେ ବଲିଉଡ୍ ଅଭିନେତ୍ରୀ ସୋନାଲୀ ବେନ୍ଦ୍ରେ ନିଜର କର୍କଟ ରୋଗ ବିଷୟରେ ଇନ୍ଷ୍ଟା ମାଧ୍ୟମରେ ଜଣାଇଥିଲେ, ସେତେବେଳେ ଖବରଟି ତାଙ୍କ ପ୍ରଶଂସକଙ୍କୁ ଶକ୍ତ ଧକ୍କା ଦେଇଥିଲା । ନିଜର ସବୁ କାମ ଛାଡ଼ି ସୋନାଲୀ ଚିକିତ୍ସା କରାଇବା ପାଇଁ ନ୍ୟୁୟର୍କରେ ଯାଇ ପହଞ୍ଚିଥିଲେ । ଏ ସମୟରେ ସେ ପ୍ରତିଟି ମୁହୂର୍ତ୍ତର ଖବର ନିଜ ପ୍ରଶଂସକଙ୍କ ସହ ସେୟାର କରୁଥିଲେ । ଏବେ ସେ ଭଲ ହୋଇ ଭାରତ ଫେରିଥିବା ବେଳେ ପ୍ରଥମେ ସେ ଚିକିତ୍ସା ପାଇଁ ନ୍ୟୁୟର୍କ ଯିବାକୁ ଚାହୁଁ ନଥିବା କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ତାଙ୍କ କହିବା ଅନୁଯାୟୀ, ମୋତେ କର୍କଟ ରୋଗ ହୋଇଛି ବୋଲି ଜଣାପଡ଼ିବା ପରେ ମୋ ସ୍ୱାମୀ ଗୋଲ୍ଡି ତୁରନ୍ତ ମୋତେ ନେଇ ନ୍ୟୁୟର୍କ ଯିବା ପାଇଁ ବାହାରିଥିଲେ । କିନ୍ତୁ ମୁଁ ରାଜି ହୋଇ ନଥିଲି । ଭାରତରେ ମଧ୍ୟ ଚିକିତ୍ସା ହୋଇ ପାରିବ । ତୁମେ ମୋତେ ପରିବାରଠାରୁ ଦୂରକୁ ନିଅ ନାହିଁ ବୋଲି ମୁଁ ଯେତେ କହିଥିଲେ ମଧ୍ୟ ସେ ମୋ କଥା ଶୁଣି ନଥିଲେ । ନିଜେ ସବୁ ବ୍ୟାଗ୍ ପ୍ୟାକ୍ କରି ବାହାରିଥିଲେ । ବିମାନ ମଧ୍ୟରେ ମଧ୍ୟ ମୁଁ ତାଙ୍କ ସହ ଝଗଡ଼ା କରୁଥିଲି । କାରଣ ମୋତେ ମୋର କର୍କଟ ରୋଗ କେଉଁ ଷ୍ଟେଜ୍ରେ ରହିଛି ବୋଲି ଜଣା ନଥିଲା । ନ୍ୟୁୟର୍କରେ ପହଞ୍ଚିବା ପରେ ମୋର ସବୁ ପରୀକ୍ଷା କରାଯିବା ପରେ କର୍କଟ ରୋଗ ଚତୁର୍ଥ ଷ୍ଟେଜ୍ରେ ଥିବା କହିଥିଲେ ଡ଼ାକ୍ତର । ଏହା ସହ ମୋର ବଞ୍ଚିବାର ସୁଯୋଗ ୩୦ପ୍ରତିଶତ ରହିଛି ବୋଲି ଡ଼ାକ୍ତର ଜଣାଇବା ପରେ ଏହା ଶୁଣି ମୁଁ ଗୋଲ୍ଡିଙ୍କୁ ମୋତେ ନ୍ୟୁୟର୍କ ନେଇଥିବାରୁ ଧନ୍ୟବାଦ୍ ଜଣାଇଥିଲି ।