ନୂଆଦିଲ୍ଲୀ: ବଲିଉଡ ଅଭିନେତା ସୋନୁ ସୁଦ ମହାମାରୀ ସମୟରେ ଅନେକ ଅସହାୟ ‌ଲୋକଙ୍କୁ ସାହାଯ୍ୟ କରି ଚର୍ଚ୍ଚାରେ ରହିଛନ୍ତି। ସୋନୁଙ୍କ ଏଭଳି କାମ ପାଇଁ ଲୋକେ ତାଙ୍କ ଫଟୋ ରଖି ପୂଜା କରୁଥିବା ବି ଦେଖିବାକୁ ମିଳିଥିଲା। ତେବେ ନିକଟରେ ଜଣେ ବାଳକ ପରଦାରେ ସୋନୁଙ୍କୁ ମାଡ଼ ଖାଉଥିବା ଦେଖି ଟିଭି ଭାଙ୍ଗି ଦେଇଥିବା ଖବର ସାମ୍ନାକୁ ଆସିଛି।

Advertisment

ସୋନୁ ସୁଦ ତାଙ୍କ ଟ୍ୱିଟର ଆକାଉଣ୍ଟରେ ଏକ ଭିଡିଓ ରିଟୁଇଟ କରିଛନ୍ତି, ଯେଉଁଥିରେ ଦେଖିବାକୁ ମିଳୁଛି କିପରି ଜଣେ ପିଲା ଟିଭିରେ ସିନେମା ଦେଖୁଥିବା ବେଳେ ଭିଲେନ୍ ଅଭିନୟ କରୁଥିବା ସୋନୁଙ୍କୁ ହିରୋ ମାଡ଼ ମାରୁଥିଲା। ଏଥିରେ ପିଲାଟି ରାଗି ଯାଇ ଟିଭି ଭାଙ୍ଗିଦେଇଥିଲା । କୁହାଯାଉଛି ଯେ ଏହି ୭ ବର୍ଷର ପିଲା ସୋନୁ ସୁଦଙ୍କର ଜଣେ ବଡ଼ ପ୍ରଶଂସକ ।

ଏହି ଭିଡିଓ ସେୟାର କରି ସୋନୁ ସୁଦ ତାଙ୍କ ପୋଷ୍ଟରେ ଲେଖିଛନ୍ତି- ‘ଆରେ ତୁମର ଟିଭି ଭାଙ୍ଗ ନାହିଁ, ତୁମ ବାପା ମୋତେ ଅନ୍ୟ ଏକ ଟିଭି କିଣିବାକୁ କହିବେ’। ଏହି ଭିଡିଓରେ ସୋନୁ ସୁଦଙ୍କ ପ୍ରତିକ୍ରିୟାକୁ ପ୍ରଶଂସକମାନେ ଖୁବ୍ ପସନ୍ଦ କରୁଛନ୍ତି ।