ଗରିବ ଓ ଅଭାବୀଙ୍କୁ ସାହାଯ୍ୟ କରିବା ପରେ ନିନ୍ଦୁକ କହିଲେ ‘ଫ୍ରଡ୍’, ଆକ୍ଷେପକାରୀଙ୍କୁ କଡ଼ା ଜବାବ ଦେଲେ ସୋନୁ ସୁଦ୍

ମୁମ୍ବାଇ: କରୋନା ମହାମାରୀ ଓ ଲକଡାଉନ୍ ସମୟରେ ବଲିଉଡ୍ ଅଭିନେତା ସୋନୁ ସୁଦ୍ ପ୍ରବାସୀ ଶ୍ରମିକ, ଅଭାବୀ ଓ ଅସହାୟ ଲୋକଙ୍କୁ ସାହାଯ୍ୟ କରି ବାସ୍ତବ ହିରୋ ସାଜିଛନ୍ତି । ଲୋକମାନଙ୍କ ପାଖରେ ଦେବଦୂତ ଭଳି ଅସୁବିଧା ସମୟରେ ସାହାଯ୍ୟ ପହଞ୍ଚାଇ ଦେଉଥିବାରୁ ଲୋକମାନେ ତାଙ୍କୁ ଦେବତା ଭଳି ପୂଜା କରିବା ବି ଆରମ୍ଭ କରି ଦେଇଥିଲେ। ତାଙ୍କର ଏହି ମହାନତା ପାଇଁ ସାରା ଦେଶ ତାଙ୍କୁ ପ୍ରଶଂସା କରୁଛି ।

ଏସବୁ ସତ୍ତ୍ୱେ କିଛି ଲୋକ ‌ସୋନୁଙ୍କୁ ଆକ୍ଷେପ କରି ଫ୍ରଡ୍ ବୋଲି କହିଛନ୍ତି । ଏହାକୁ ନେଇ ସୋନୁଙ୍କ ପ୍ରଶଂସକ ଅସନ୍ତୋଷ ବ୍ୟକ୍ତ କରିଥିବା ବେଳେ ସୋନୁ ସୁଦ୍ ଆକ୍ଷେପକାରୀଙ୍କୁ କଡ଼ ଜବାବ ବି ଦେଇଛନ୍ତି।

ସୋନୁ ନିଜେ ଟ୍ରୋଲ୍ ହେବାକୁ ନେଇ କହିଥିଲେ, ‘ଆକ୍ଷେପକାରୀ ବୋଧହୁଏ ଏମିତି ଏଇଥିପାଇଁ କହିଛନ୍ତି କାରଣ ତାହା ତାଙ୍କର ପେସା ହୋଇଥିବ ଏବଂ ଏଇଥିପାଇଁ ତାଙ୍କୁ ପେମେଣ୍ଟ କରାଯାଉଥିବ । କିନ୍ତୁ ଏହା ମୋ ଉପରେ କୌଣସି ପ୍ରଭାବ ପକାଇବ ନାହିଁ। ମୁଁ ଯେମତି ଅଭାବୀଙ୍କୁ ସାହାଯ୍ୟ କରୁଛି ସେମିତି କରୁଥିବି।

ଆଉ ଯେଉଁମାନେ ମୁଁ କିଛି କରୁନି ବୋଲି ଦାବି କରୁଛନ୍ତି ସେମାନଙ୍କ ପାଇଁ ମୋ ପାଖରେ ଉଚିତ ଜବାବ ଅଛି । ମୋ ପାଖରେ ୭ ଲକ୍ଷ ୩ ହଜାର ୨୪୬ ଲୋକଙ୍କ ବିବରଣୀ ଅଛି । ମୁଁ ଯେଉଁମାନଙ୍କୁ ସାହାଯ୍ୟ କରିଛି, ସେମାନଙ୍କ ଫୋନ ନମ୍ବର, ଠିକଣା, ଆଧାର କାର୍ଡ ନମ୍ବର ମୋ ପାଖରେ ଅଛି । ମୋତେ ଟ୍ରୋଲ ବଦଳରେ ବାହାରକୁ ଯାଇ କାହାକୁ ସାହାଯ୍ୟ କଲେ ମଙ୍ଗଳ ହୁଅନ୍ତା ।”