‘ଶ୍ରୋତାଙ୍କ ମନରେ ଘର କରିବା ଭଳି ଗୀତ ଲେଖିବା ମୋର ଲକ୍ଷ୍ୟ’

0

ଭୁବନେଶ୍ୱର: ଚଳିତ ବର୍ଷ ଶ୍ରେଷ୍ଠ ଗୀତିକାର ଭାବେ ରାଜ୍ୟ ଚଳଚ୍ଚିତ୍ର ପୁରସ୍କାର ଲାଭ କରିଛନ୍ତି ସୁବ୍ରତ ସ୍ୱାଇଁ । ୨୦୧୬ରେ ମୁକ୍ତିଲାଭ କରିଥିବା ‘ଅଗସ୍ତ୍ୟ’ ଛବିରେ ସ୍ଥାନିତ ‘ ଧୀରେ ଧୀରେ…’ ଗୀତ ଲାଗି ସୁବ୍ରତଙ୍କୁ ଏହି ପୁରସ୍କାର ଦିଆଯାଇଛି । ଏବର ଓଡ଼ିଆ ଛବିରେ ଜଣେ ଆଗଧାଡ଼ିର ଗୀତିକାର ଭାବେ ପରିଚିତ ସୁବ୍ରତ ସ୍ୱାଇଁ ପ୍ରାୟ ୨୦ ପୂର୍ବରୁ ଗୀତ ଲେଖିବା ଆରମ୍ଭ କରିଥିଲେ । ୨୦୦୦ ମସିହାରେ ତାଙ୍କ ଲିଖିତ ଜଗନ୍ନାଥ ଭଜନ ‘ବାଉଁଶ ପତର ସରୁ ଲୋ ଝାଇଁ ଝୁମୁରୁ…’ ଗୀତଟି ଲୋକପ୍ରିୟ ହେବା ପରେ ସୁବ୍ରତ ଲୋକଲୋଚନକୁ ଆସିଥିଲେ । ସୁବ୍ରତଙ୍କ ଏହି ଗୀତରେ କଣ୍ଠଦାନ କରିଥିଲେ ବଲିଉଡ୍‌ ଗାୟକ ମହମ୍ମଦ ଅଜିଜ୍‌ ।

ଏହି ପ୍ରଥମ ସଫଳତା ତାଙ୍କୁ ଗୀତ ରଚନା କ୍ଷେତ୍ରରେ ଆଗେଇବାକୁ ଖୋରାକ ଯୋଗାଇଥିଲା । ୨୦୦୮ ମସିହାରେ ଚିତ୍ତରଜଂନ ତ୍ରିପାଠୀଙ୍କ ନିର୍ଦ୍ଦେଶିତ ଓଡ଼ିଆ ଛବି ‘ମୁଖ୍ୟମନ୍ତ୍ରୀ’ ରେ ଗୀତ ରଚନା କରି ସୁବ୍ରତ ଓଲିଉଡ଼ରେ ପ୍ରବେଶ କଲେ। ଏହାପରେ ‘ପ୍ରେମ ଅଢେଇ ଅକ୍ଷର’ ଛବିରେ ଗୀତ ଲେଖିବାର ସୁଯୋଗ । ଜାରି ରହିଲା ଲେଖନୀ ଚାଳନା। ଧୀରେ ଧୀରେ ଓଡ଼ିଆ ଫିଲ୍ମ ସଙ୍ଗୀତ କ୍ଷେତ୍ରରେ ନିଜର ସ୍ଥିତି ସୃଦୁଢ କଲେ ସୁବ୍ରତ। କ୍ରମେ ସଙ୍ଗୀତ ନିର୍ଦ୍ଦେଶକ ପ୍ରେମଆନନ୍ଦଙ୍କ ସଂସ୍ପର୍ଶରେ ଆସନ୍ତି ସୁବ୍ରତ । ଉଭୟଙ୍କ ଯୋଡ଼ି ଜମିଯାଏ ଓ ପ୍ରେମ ଆନନ୍ଦ ତାଙ୍କ ନିର୍ଦ୍ଦେଶିତ ଅଧିକାଂଶ ଛବିରେ ସୁବ୍ରତଙ୍କୁ ସୁଯୋଗ ଦିଅନ୍ତି । ଶ୍ରୋତା ମହଲରେ ପରିଚିତି ପାଆନ୍ତି ସେ। ଇତିମଧ୍ୟରେ ସୁବ୍ରତ ପାଖାପାଖି ୨୦ଟି ଓଡ଼ିଆ ସିନେମାରେ ଗୀତ ରଚନା କରି ସାରିଲେଣି ।

ସରଳ ଶଦ୍ଦର ପ୍ରୟୋଗ ଓ ସାବଲୀଳ ଶଦ୍ଦ ସଂଯୋଜନା ହେଉଛି ସୁବ୍ରତଙ୍କ ଶୈଳୀ। ଏଯାବତ୍‌ ନିଜର ଶ୍ରେଷ୍ଠ ସୃଷ୍ଟିକୁ ଅପେକ୍ଷା ରଖିଥିବା ସୁବ୍ରତ କହନ୍ତି, ଶ୍ରୋତାଙ୍କ ମନରେ ଘର କରିବା ଭଳି ଗୀତ ଲେଖିବା ମୋର ଲକ୍ଷ୍ୟ । ମୁଁ ସେଇ ଚେଷ୍ଟା ଜାରି ରଖିଛି । ଏଇ ପୁରସ୍କାର ତାହାର ଏକ ସ୍ୱୀକୃତି ମାତ୍ର। ଏଥିଲାଗି ମୁଁ ସଙ୍ଗୀତ ନିର୍ଦ୍ଦେଶକ ପ୍ରେମଆନନ୍ଦଙ୍କ ପାଖରେ ଋଣୀ।

ସଂପ୍ରତି ସୁବ୍ରତ ସାମ୍ବାଦିକ ବୃତ୍ତିରେ ଅଛନ୍ତି ଏବଂ ‘ସମ୍ବାଦ’ର କେଉଁଝର ଜିଲ୍ଲା ପ୍ରତିନିଧି ଭାବେ କାର୍ଯ୍ୟ କରୁଛନ୍ତି।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

ସମ୍ବନ୍ଧିତ ଖବର

Leave A Reply

Your email address will not be published.