କପିଲଙ୍କ ସହ ମୋର ଝଗଡ଼ା ‘ପବ୍ଲିସିଟି ଷ୍ଟଣ୍ଟ’ ଥିଲା ! ସାମ୍ବାଦିକ ସମ୍ମିଳନୀରେ କହିଲେ ସୁନୀଲ
ମୁମ୍ବାଇ: ଆଜକୁ ପ୍ରାୟ ୭ବର୍ଷ ତଳେ ଏକ ଏଭଳି ବନ୍ଧୁତା ଭାଙ୍ଗିଥିଲା, ଯାହାର ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। ଭାରତର ଲୋକପ୍ରିୟ ହାସ୍ୟ ଅଭିନେତା କପିଲ ଶର୍ମା ଓ ସୁନୀଲ ଗ୍ରୋଭର ଏକ ସୋ’ କରିବା ପାଇଁ ବିମାନରେ ଯାଉଥିବା ବେଳେ ଦୁହିଁଙ୍କ ମଧ୍ୟରେ ଝଗଡ଼ା ହୋଇଥିଲା। ଏହା ପରଠାରୁ ଦୁହେଁ ପରସ୍ପର ସହ କାମ କରିବା ବନ୍ଦ କରିଦେଇଥିଲେ। ଏବେ ୭ବର୍ଷ ପରେ ଦୁହେଁ ପୁଣି ଥରେ ଏକାଠି କାମ କରିବାକୁ ଯାଉଛନ୍ତି। ‘ଦି ଗ୍ରେଟ୍ ଇଣ୍ଡିଆନ୍ କପିଲ ସୋ’ରେ ଦୁହେଁ ପୁଣି ଥରେ ସାଥିରେ କାମ କରିବେ ବୋଲି ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ତେବେ ଏହି ସୋ’ ପାଇଁ ଆୟୋଜିତ ହୋଇଥିବା ସାମ୍ବାଦିକ ସମ୍ମିଳନୀରେ ଝଗଡ଼ା ପଛର କାରଣ ଜଣାଇଛନ୍ତି ସୁନୀଲ । ସେ କହିଛନ୍ତି ଯେ, ଆମ ଝଗଡ଼ା ଅସଲି ନଥିଲା। ଆମେ ‘ପବ୍ଲିସିଟି ଷ୍ଟଣ୍ଟ’ କରିଥିଲୁ। ସୁନୀଲଙ୍କ କହିବା ମୁତାବକ, “ଆମେ ବିମାନରେ ବସିଥିବା ବେଳେ ହଠାତ୍ ଜାଣିବାକୁ ପାଇଲୁ ଯେ, ନେଟଫ୍ଲିକ୍ସ ଭାରତ ଆସୁଛି। ତେଣୁ, କିଛି ବଡ଼ ପବ୍ଲିସିଟି ଷ୍ଟଣ୍ଟ କରିବା ଉଚିତ୍। ନେଟଫ୍ଲିକ୍ସ ଆମକୁ କଲ୍ କରି କିଛି ବଡ଼ ପବ୍ଲିସିଟି ଷ୍ଟଣ୍ଟ କରିବାକୁ କହିଥିଲା। ତେଣୁ ଆମେ ଝଗଡ଼ା କରିଥିଲୁ।” ମଜାଳିଆ ଢ଼ଙ୍ଗରେ ସେ ଏଭଳି କହିଥିବା ଜଣାପଡ଼ିଛି।
ଅନ୍ୟପକ୍ଷରେ କପିଲ କହିଥିଲେ ଯେ, ସୁନୀଲ ଏକାଧିକ ପ୍ରୋଜେକ୍ଟରେ କାମ କରୁଥିଲେ। ତେଣୁ ଆମ ସହ କାମ କରିବା ପାଇଁ ତାଙ୍କ ପାଖରେ ସମୟ ନଥିଲା।
ଉଲ୍ଲେଖଯୋଗ୍ୟ, ଅଷ୍ଟ୍ରେଲିଆରେ ଏକ ସୋ’ ଶେଷ କରି ମୁମ୍ବାଇ ଆସୁଥିବା ବେଳେ କୌଣସି କଥାକୁ ନେଇ ଝଗଡ଼ା ହେବାରୁ ନିଶାଗ୍ରସ୍ତ ଥିବା କପିଲ, ସୁନୀଲଙ୍କୁ ଚାପୁଡ଼ା ମାରିଥିଲେ। ଏହା ପରଠାରୁ ସୁନୀଲ, କପିଲଙ୍କ ହାତ ଛାଡ଼ି ଦେଇଥିଲେ।