ମୁମ୍ବାଇ: ଆଜି ଦିବଂଗତ ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତଙ୍କ ୩୭ତମ ଜନ୍ମଦିନ। ସେ ଏଦୁନିଆରେ ନଥିଲେ ବି ପ୍ରଶଂସକମାନେ ତାଙ୍କ ଜନ୍ମଦିନକୁ ଭୁଲିନାହାନ୍ତି। ଆଜି ସମସ୍ତେ ତାଙ୍କ ଫଟୋ ସେୟାର କରି ସୁଶାନ୍ତଙ୍କୁ ଜନ୍ମଦିନର ଶୁଭେଚ୍ଛା ଜଣାଇଥିବା ଦେଖାଯାଇଛି। ଏହି ଅବସରରେ ବଲିଉଡ ଅଭିନେତ୍ରୀ ରିୟା ଚକ୍ରବର୍ତ୍ତୀ ମଧ୍ୟ ସୁଶାନ୍ତ ସିଂ ରାଜପୁତଙ୍କ ସହ ଉଠାଇଥିବା କିଛି ସ୍ବତନ୍ତ୍ର ଫଟୋ ସେୟାର କରିଛନ୍ତି।

Advertisment

ସୁଶାନ୍ତଙ୍କ ମୃତ୍ୟୁ ବାର୍ଷିକୀରେ ରିୟା ତାଙ୍କ ସହ ଉଠାଇଥିବା ଅନେକ ଫଟୋ ସେୟାର କରିଥାନ୍ତି। ଆଜି ତାଙ୍କ ଜନ୍ମ ବାର୍ଷିକୀରେ ରିୟା ସୁଶାନ୍ତଙ୍କ ସହ ୨ଟି ଫଟୋ ସେୟାର କରିଛନ୍ତି। ଗୋଟିଏ ଫଟୋରେ ଦୁହେଁ କଫି ମଗ୍ ସହ ଫଟୋ ଉଠାଇଥିବା ବେଳେ ଅନ୍ୟ ଏକ ଫଟୋରେ ଦୁହେଁ କାର୍ ଭିତରେ ସେଲଫି ନେଇଥିବା ଦେଖାଯାଇଛି। ଏହି ଦୁଇଟି ଫଟୋ ସେୟାର କରି କ୍ୟାପସନରେ ରିୟା ଇନଫିନିଟି ପ୍ଲସ ୱାନ ଲେଖିଛନ୍ତି।

ଉଲ୍ଲେଖଯୋଗ୍ୟ, ୧୪ ଜୁନ୍ ୨୦୨୦ରେ ମୁମ୍ବାଇସ୍ଥିତ ଫ୍ଲାଟରେ ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିଥିଲେ। ଏହା ପରେ ସୁଶାନ୍ତ ସିଂ ରାଜପୁତଙ୍କ ପରିବାର ଅଭିନେତାଙ୍କ ମୃତ୍ୟୁ ପାଇଁ ରିୟାଙ୍କୁ ଦାୟୀ କରିଥିଲେ। ହେଲେ ରିୟା ଏହି ଆରୋପକୁ ଖଣ୍ଡନ କରି ସୁଶାନ୍ତଙ୍କୁ ଭଲ ପାଉଥିଲେ ବୋଲି କହିଥିଲେ।

ତେବେ ସୁଶାନ୍ତଙ୍କ ମୃତ୍ୟୁ ପରେ ଏବେ ରିୟା ବଣ୍ଟି ସଜଦେହଙ୍କୁ ଡେଟ କରୁଥିବା ଚର୍ଚ୍ଚା ହେଉଛି। ବଣ୍ଟି ହେଉଛନ୍ତି ସୋହେଲ ଖାନଙ୍କ ପୂର୍ବ ପତ୍ନୀ ସୀମା ସଜଦେହଙ୍କ ଭାଇ। ହେଲେ ଡେଟିଂକୁ ନେଇ ଚର୍ଚ୍ଚା ଜୋର ଧରିଥିଲେ ବି ଏପର୍ଯ୍ୟନ୍ତ ବଣ୍ଟି ଓ ରିୟା କେହି ଏହା ଉପରେ ପ୍ରତିକ୍ରିୟା ରଖିନାହାନ୍ତି।