ସୁଶାନ୍ତ ସିଂ ରାଜପୁତ୍ ମୃତ୍ୟୁ ମାମଲାର ତଦନ୍ତ କେତେ ଆଗେଇଲା ? ଗୁରୁତ୍ବପୂର୍ଣ୍ଣ ସୂଚନା ଦେଲେ ଉପମୁଖ୍ୟମନ୍ତ୍ରୀ ଫଡନାବିସ୍

ମୁମ୍ବାଇ: ବଲିଉଡ୍ ଅଭିନେତା ସ୍ୱର୍ଗତ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାର ଯାଞ୍ଚ କରୁଛି ସିବିଆଇ । ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବିସ୍ ସୁଶାନ୍ତ ସିଂ ରାଜପୁତ ଓ ଦିଶା ସାଲିଆନ୍ ମାମଲାରେ ଚାଲିଥିବା ତଦନ୍ତ ସମ୍ପର୍କରେ ଏକ ବଡ ଅପଡେଟ୍ ଦେଇଛନ୍ତି।  ଦେବେନ୍ଦ୍ର ଫଡନାବିସଙ୍କୁ  ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ସିବିଆଇର ତଦନ୍ତ ବିଷୟରେ ବିଭିନ୍ନ ଗଣମାଧ୍ୟମ ପକ୍ଷରୁ ପଚରାଯାଇଥିଲା। ଏହାର ଉତ୍ତରରେ ସେ କହିଛନ୍ତି ଯେ ମାମଲାର ତଦନ୍ତ କରାଯାଉଛି ଏବଂ ପ୍ରମାଣର ବିଶ୍ୱସନୀୟତା ଯାଞ୍ଚ କରାଯାଉଛି।

‘ରିପବ୍ଲିକ ଟିଭି’କୁ ଦିଆଯାଇଥିବା ଏକ ସାକ୍ଷାତକାରରେ ଦେବେନ୍ଦ୍ର ଫଡନାବିସ୍ କହିଛନ୍ତି, ଆମେ ପ୍ରାଥମିକ ପ୍ରମାଣ ଆଧାରରେ ଯାହା କହିଛୁ ତାହା ସଂଗ୍ରହ କରୁଛୁ। ଏହାର ବିଶ୍ୱସନୀୟତା ଯାଞ୍ଚ କରିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ ପରେ କିଛି ଲୋକ କହିଥିଲେ ଯେ ଏହି ମାମଲା ସହ ଜଡିତ କିଛି ଠୋସ୍ ପ୍ରମାଣ ସେମାନଙ୍କ ପାଖରେ ଅଛି। ଆମେ ସେମାନଙ୍କ ସହ କଥା ହୋଇ ପୁଲିସକୁ ପ୍ରମାଣ ହସ୍ତାନ୍ତର କରିବାକୁ କହିଛୁ। ବର୍ତ୍ତମାନ ଉପଲବ୍ଧ ଥିବା ସମସ୍ତ ପ୍ରମାଣ ଠିକ୍ କି ନୁହେଁ ତାହା ଯାଞ୍ଚ କରାଯାଉଛି। ତଦନ୍ତ ଚାଲିଛି, ତେଣୁ ଏହାର ଫଳାଫଳ ଉପରେ କିଛି କହିବା ମୋ ପାଇଁ ଉଚିତ ହେବ ନାହିଁ।

ସୁଶାନ୍ତ ସିଂ ରାଜପୁତ ୧୪ ଜୁନ୍ ୨୦୨୦ରେ ନିଜ ମୁମ୍ବାଇସ୍ଥିତ ଘରେ ଆତ୍ମହତ୍ୟା କରିଥିଲେ। ତାଙ୍କ ମୃତ୍ୟୁକୁ ନେଇ ପରେ ରାଜନୀତି ଆରମ୍ଭ ହୋଇଥିଲା। ଲୋକମାନେ ତାଙ୍କ ଗର୍ଲଫ୍ରେଣ୍ଡ ତଥା ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କୁ ସୁଶାନ୍ତଙ୍କ ମୃତ୍ୟୁ ପାଇଁ ଦୋଷ ଦେଇଥିଲେ। କିଛି ସମୟ ପାଇଁ ଏହି ମାମଲାକୁ ନେଇ ଅନେକ ଗଣ୍ଡଗୋଳ ହୋଇଥିଲା। ତାଙ୍କ ପ୍ରତି ହୋଇଥିବା ଅନ୍ୟାୟ ପାଇଁ ସୁଶାନ୍ତଙ୍କ ପ୍ରଶଂସକମାନେ ନ୍ୟାୟ ଚାହୁଁଛନ୍ତି। ସେ ଚାହୁଁଛନ୍ତି ଯେ ସୁଶାନ୍ତଙ୍କ ଅପରାଧୀଙ୍କୁ କଠୋର ଦଣ୍ଡ ଦିଆଯାଉ। ବର୍ତ୍ତମାନ ଏହି ଘଟଣାରେ ତଦନ୍ତ ଚାଲିଛି।