ଛୋଟ ପରଦାରୁ ଅଭିଯାନ ଆରମ୍ଭ କରିବେ ରିଦ୍ଧିମା କପୁର ସାହନି

ମୁମ୍ବାଇ:  ବଲିଉଡ୍‌ର ଲୋକପ୍ରିୟ ଅଭିନେତା ରଣବୀର କପୁରଙ୍କ ଭଉଣୀ ରିଦ୍ଧିମା କପୁର ସାହନି ଅଭିନୟ ଦୁନିଆକୁ ପ୍ରବେଶ କରିବେ ବୋଲି ଜଣାପଡ଼ିଛି। ତେବେ ସେ ତାଙ୍କ ଅଭିଯାନ ଛୋଟ ପରଦାରୁ ଆରମ୍ଭ କରିବେ। ନେଟଫ୍ଲିକ୍ସର ବାସ୍ତବଧର୍ମୀ ଧାରାବାହିକ ‘ଦି ଫାବୁଲସ୍‌ ଲାଇଭ୍‌ସ ଅଫ୍‌ ବଲିଉଡ୍ ୱାଇଭ୍‌ସ’ର ଆଗାମୀ ସିଜନ୍‌ ପାଇଁ ରିଦ୍ଧିମା ଅଭିନୟ କରିବାକୁ ସବୁଜ ସଂକେତ ଦେଇଛନ୍ତି ଏବଂ ସେଥିଲାଗି ପ୍ରସ୍ତୁତି ଆରମ୍ଭ କରିଦେଇଛନ୍ତି। ଉଲ୍ଲେଖଯୋଗ୍ୟ, ପ୍ରଖ୍ୟାତ ସିନେନିର୍ମାତା ତଥା ପ୍ରଯୋଜକ କରନ ଜୋହର ପ୍ରଯୋଜିତ ‘ଦି ଫାବୁଲସ୍‌...’ରେ ଚାରିଜଣ ଗ୍ଲାମରସ୍‌ ବନ୍ଧୁଙ୍କ ଜୀବନ ପ୍ରଦର୍ଶିତ ହୋଇଛି ଯେଉଁଥିରେ ସେମାନେ ବନ୍ଧୁତା, ପରିବାର ଓ କ୍ୟାରିଅରର ଜଟିଳତା ଦେଇ ଯାତ୍ରା କରୁଛନ୍ତି।

ଏହି ଧାରାବାହିକର ପୂର୍ବ ଦୁଇଟି ସିଜନ୍‌ରେ ନୀଲମ୍‌ କୋଠାରି, ମହୀପ କପୁର, ଭାବନା ପାଣ୍ଡେ ଓ ସୀମା ସଜଦେହଙ୍କ ଭଳି କଳାକାର ଅଭିନୟ କରି ଦର୍ଶକଙ୍କୁ ସେମାନଙ୍କ ବୃତ୍ତିଗତ ଓ ବ୍ୟକ୍ତିଗତ ଜୀବନର ଏକ ସ୍ବତନ୍ତ୍ର ଚିତ୍ର ପ୍ରଦାନ କରିଥିଲେ। ଏଥର ରିଦ୍ଧିମାଙ୍କ ସହ ଅନ୍ୟ ଦୁଇ ଜଣ ଦକ୍ଷ ମହିଳା ଉଦ୍ୟୋଗୀଙ୍କୁ ସ୍ବାଗତ କରିବା ପାଇଁ ଧାରାବାହିକ ପ୍ରସ୍ତୁତ ହୋଇଛି। ମିଳିଥିବା ସୂଚନାନୁଯାୟୀ, ଏହି ବହୁ ପ୍ରତୀକ୍ଷିତ ସିଜନ୍‌ରେ ଶାଳିନୀ ପାଷି ଓ କଲ୍ୟାଣୀ ଶାହ ଚା​ଵଲାଙ୍କ ସହ ରିଦ୍ଧିମା ଯୋଗଦେବେ। ଏହି ଅବସରରେ ‘ଦି ଫାବୁଲସ୍‌....’ର କାହାଣୀ ମୁମ୍ବାଇରୁ ଦିଲ୍ଲୀକୁ ଯାତ୍ରା କରିବ। ସେମାନଙ୍କ ମଧ୍ୟରୁ ଶାଳିନୀ ପାଷି ଜଣେ କଳା ଓ ଡିଜାଇନ୍‌ ସଂଗ୍ରାହିକା। ଅଭିନେତା ଶାହରୁଖ ଖାଁ ଓ ଗୌରୀ ଖାଁଙ୍କ ସହ ତାଙ୍କର ଘନିଷ୍ଠତା ରହିଛି। ସେହିପରି କଲ୍ୟାଣୀ ଶାହ ହେଉଛନ୍ତି ଏକ ବିଳାସପୂର୍ଣ୍ଣ ଗୃହସଜ୍ଜା କମ୍ପାନିର ପ୍ରତିଷ୍ଠାତ୍ରୀ ଓ ସିଇଓ। କରନ ଜୋହରଙ୍କ ସହ ଏହି ତିନି ଜଣଙ୍କର ଭଲ ସମ୍ପର୍କ ରହିଛି ଏବଂ ସେମାନେ ତାଙ୍କ ସୋ’ରେ ସାମିଲ ହେବା ପାଇଁ ଉତ୍କଣ୍ଠାର ସହ ଚାହିଁ ବସିଛନ୍ତି।