‘ଓମ୍‌ ଶାନ୍ତି ଓମ୍‌’ରେ ମାଗଣାରେ ଅଭିନୟ କରିଥିଲେ ଦୀପିକା; ଏହି ଫିଲ୍ମ ପାଇଁ ଟଙ୍କାଏ ନେଇଥିଲେ ଅଭିନେତା

ମୁମ୍ବାଇ: ବଲିଉଡ୍‌ରେ ଏପରି ଅନେକ ଅଭି‌ନେତା ଓ ଅଭିନେତ୍ରୀ ଅଛନ୍ତି ଯିଏକି ନିଜ ଫିଲ୍ମ ପାଇଁ କୋଟି କୋଟି ଟଙ୍କା ଦାବି କରିଥାନ୍ତି। ସେମାନଙ୍କ ଚମତ୍କାର ଅଭିନୟ ପାଇଁ ଫିଲ୍ମ ବକ୍ସ ଅଫିସ୍‌ରେ ଯେପରି ଜବର୍‌ଦସ୍ତ ରୋଜଗାର କରିଥାଏ, ସେହିପରି ସେମ‌ାନେ ବି ନିର୍ଦ୍ଦେଶକଙ୍କୁ ମନ ପୂରେଇ ପାରିଶ୍ରମିକ ଦାବି କରିଥାନ୍ତି। ତେବେ ଆମେ ଆଜି ଏପରି କିଛି କଳାକାରଙ୍କ ବିଷୟରେ କହିବୁ, ଯିଏକି ବିନା ଟଙ୍କାରେ ବି ଫିଲ୍ମରେ ଅଭିନୟ କରିଛନ୍ତି। କିଏ ନିର୍ଦ୍ଦେଶକଙ୍କଠାରୁ ଟଙ୍କାଏ ଦାବି କରିଛନ୍ତି ତ କିଏ ୧୧ ଟଙ୍କା। ପୁଣ କିଏ ବିନା ଟଙ୍କାରେ ବି କରିଛନ୍ତି ଫିଲ୍ମ।

ନୱାଜୁଦ୍ଦିନ ସିଦ୍ଧିକଙ୍କ ଚମତ୍କାର ଅଭିନୟ ବିଷୟରେ କାହାକୁ ବା ଅଜଣା! ଅନ୍ୟ ଫିଲ୍ମ ପାଇଁ କୋଟି କୋଟି ଟଙ୍କା ରୋଜଗାର କରୁଥିବା ନୱାଜୁଦ୍ଦିନ ‘ମଣ୍ଟୋ’ ପାଇଁ ମାତ୍ର ଟଙ୍କାଏ ନେଇଥିବା ସୂଚନା ରହିଛି।

ସେହିପରି ଅଭିନେତା ସାହିଦ କପୁରଙ୍କର ବି ଫ୍ୟାନ୍‌ ଫଲୋୟର୍ସଙ୍କର କିଛି ସୀମା ନାହିଁ। କାଶ୍ମୀର ପ୍ରସଂଗକୁ ନେଇ ତିଆରି ହୋଇଥିବା ଫିଲ୍ମ ‘ହାଇଦର୍‌’ର ବଜେଟ୍‌ ଖୁବ୍ କମ୍‌ ଥିଲା। ସେହି କାରଣରୁ ସାହିଦ କହିଥିଲେ କି ଫିଲ୍ମ ହିଟ୍‌ ହେବା ପରେ ବି ସେ ଗୋଟାଏ ଟଙ୍କା ନେବେ ନାହିଁ। ତେବେ ସେ ଯାହା କହିଥିଲେ ତାହା କରି ଦେଖାଇଲେ ମଧ୍ୟ।

ଆପଣ ଜାଣିନଥିବେ ହୁଏତ ‘ଓମ୍‌ ଶାନ୍ତି ଓମ୍‌’ରୁ କ୍ୟାରିୟର୍‌ ଆରମ୍ଭ କରିଥିବା ବଲିଉଡ୍‌ ଦିବା ଦୀପିକା ପାଦୁକୋନ୍‌ ଏହି ଫିଲ୍ମ ପାଇଁ ଟଙ୍କାଏ ବି ନେଇନଥିଲେ। ତେବେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ‘ଭାଗ୍‌ ମିକା ଭାଗ୍‌’ ପାଇଁ ଅଭିନେତ୍ରୀ ସୋନମ କପୁର୍‌ ମାତ୍ର ୧୧ ଟଙ୍କା ନେଇଥିଲେ।