ରିଲିଜର ପ୍ରଥମ ସପ୍ତାହରେ ୩୦୦କୋଟି ପାର୍ କଲା 'ଟାଇଗର-୩'ର ବକ୍ସ ଅଫିସ ଆୟ

ମୁମ୍ବାଇ: ସବୁବେଳେ ବଲିଉଡର ଟାଇଗର ସଲମାନ ଖାନଙ୍କ ଫିଲ୍ମକୁ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରନ୍ତି। ଦୀପାବଳିକୁ ସ୍ୱତନ୍ତ୍ର କରିବା ପାଇଁ ସଲମାନ ଖାନ ଚଳିତ ବର୍ଷ ନିଜ ପ୍ରଶଂସକଙ୍କ ପାଇଁ ଫିଲ୍ମ ‘ଟାଇଗର-୩’ ନେଇ ଆସିଥିଲେ। ଦୀପାବଳି ଅବସରରେ ରିଲିଜ୍ ହୋଇଥିବା ଫିଲ୍ମ ‘ଟାଇଗର ୩’ର ଟିଜର ରିଲିଜ୍ ପରଠାରୁ ଚର୍ଚ୍ଚାରେ ରହିଥିଲା। କୁହାଯାଉଥିଲା ଯେ, ଫିଲ୍ମଟି ପ୍ରଥମ ସପ୍ତାହରେ ହିଁ ୨୦୦କୋଟି ଟଙ୍କା ଆୟ କରିବ।

ହେଲେ ଏବେ ତାହା ଭୁଲ ପ୍ରମାଣିତ ହୋଇଛି। କାରଣ ଫିଲ୍ମଟି ପ୍ରଥମ ସପ୍ତାହରେ ୩୦୦କୋଟି ପାର୍ କରିଛି। ଭାରତରେ ଫିଲ୍ମର ଆୟ ୨୦୦କୋଟି ପାର୍ କରିଥିବା ବେଳେ ବିଶ୍ବ ବକ୍ସ ଅଫିସ ଆୟ ମିଶାଇଲେ ଫିଲ୍ମର ମୋଟ ଆୟ ୩୨୨କୋଟିରେ ପହଞ୍ଚିଛି। ଫିଲ୍ମ ପାଇଁ ଦର୍ଶକଙ୍କ କ୍ରେଜ ଦେଖିଲେ ଆଗକୁ ଏହାର ଆୟ ଆହୁରି ବଢ଼ିବ ବୋଲି କୁହାଯାଉଛି।

ଫିଲ୍ମ ଦେଖିବା ପରେ ଦର୍ଶକଙ୍କୁ ସଲମାନଙ୍କ ସହ କଟ୍ରିନା ଓ ଇମ୍ରାନ ହାସମୀଙ୍କ ଚରିତ୍ର ଖୁବ ପସନ୍ଦ ଆସିଛି। ଫିଲ୍ମରେ ଏକାଧିକ ସସପେନ୍ସ ରହିଥିବାରୁ ଏହା ଦର୍ଶକଙ୍କୁ ଅଧିକ ଆକର୍ଷିତ କରିଛି। ଖଳନାୟକ ଭାବେ ନଜର ଆସି ଦର୍ଶକଙ୍କ ମନ କିଣିଛନ୍ତି ଇମ୍ରାନ୍ ହାସମୀ। ତାଙ୍କର ଅଭିନୟକୁ ବହୁତ ପ୍ରଶଂସା କରାଯାଉଛି।