୨ଦିନରେ ୧୦୦କୋଟି ଟଙ୍କା ଆୟ କଲା 'ଟାଇଗର-୩'

ମୁମ୍ବାଇ: ସବୁବେଳେ ବଲିଉଡର ଟାଇଗର ସଲମାନ ଖାନଙ୍କ ଫିଲ୍ମକୁ ପ୍ରଶଂସକମାନେ ଉତ୍ସାହର ସହିତ ଅପେକ୍ଷା କରନ୍ତି। ଦୀପାବଳିକୁ ସ୍ୱତନ୍ତ୍ର କରିବା ପାଇଁ ସଲମାନ ଖାନ ଚଳିତ ବର୍ଷ ନିଜ ପ୍ରଶଂସକଙ୍କ ପାଇଁ ଫିଲ୍ମ 'ଟାଇଗର-୩' ନେଇ ଆସିଛନ୍ତି। ଦୀପାବଳି ଅବସରରେ ରିଲିଜ୍ ହୋଇଥିବା ଫିଲ୍ମ ‘ଟାଇଗର ୩’ର ଟିଜର ରିଲିଜ୍ ପରଠାରୁ ଚର୍ଚ୍ଚାରେ ରହିଥିଲା। କୁହାଯାଉଥିଲା ଯେ, ଫିଲ୍ମଟି ପ୍ରଥମ ସପ୍ତାହରେ ହିଁ ୨୦୦କୋଟି ଟଙ୍କା ଆୟ କରିବ।

ହେଲେ ଏବେ ତାହା ଭୁଲ ପ୍ରମାଣିତ ହୋଇଛି। କାରଣ ଫିଲ୍ମଟି ମାତ୍ର ୨ଦିନରେ ୧୦୦କୋଟି ଟଙ୍କା ଆୟ କରିଛି। ଫିଲ୍ମ ପାଇଁ ଦର୍ଶକଙ୍କ କ୍ରେଜ ଦେଖିଲେ ଏହା ସପ୍ତାହେ ପୂର୍ବରୁ ହିଁ ୨୦୦କୋଟି ଟଙ୍କା ଆୟ କରିବ ବୋଲି ଜଣାପଡ଼ିଛି। ମିଳିଥିବା ସୂଚନା ମୁତାବକ, ଫିଲ୍ମଟି ପ୍ରଥମ ଦିନରେ ୪୪.୫୦କୋଟି ଟଙ୍କା ଆୟ କରିଥିବା ବେଳେ ଦ୍ବିତୀୟ ଦିନରେ ୫୭.୫୦କୋଟି ଟଙ୍କା ଆୟ କରିଛି। ଦ୍ବିତୀୟ ଦିନର ଆୟ ଦେଖିଲେ ଆଗାମୀ ଦିନରେ ଏହା ଆହୁରି ବଢ଼ିବ ବୋଲି କୁହାଯାଉଛି। ଏପର୍ଯ୍ୟନ୍ତ ଫିଲ୍ମଟି ମୋଟ ୧୦୨କୋଟି ଟଙ୍କା ଆୟ କରିସାରିଛି।

ଫିଲ୍ମ ଦେଖିବା ପରେ ଦର୍ଶକଙ୍କୁ ସଲମାନଙ୍କ ସହ କଟ୍ରିନା ଓ ଇମ୍ରାନ ହାସମୀଙ୍କ ଚରିତ୍ର ଖୁବ ପସନ୍ଦ ଆସିଛି। ଫିଲ୍ମରେ ଏକାଧିକ ସସପେନ୍ସ ରହିଥିବାରୁ ଏହା ଦର୍ଶକଙ୍କୁ ଅଧିକ ଆକର୍ଷିତ କରିଛି।