ୟୁଟ୍ୟୁବର୍ ଅରମାନ୍ ମଲିକଙ୍କ ୩ସନ୍ତାନ ପାଇଁ ଏସବୁ ଉପହାର ପଠାଇଲେ ଉର୍ଫି

ନୂଆଦିଲ୍ଲୀ: ଜଣାଶୁଣା ୟୁଟ୍ୟୁବର୍ ଅରମାନ୍ ମଲିକ୍ ତାଙ୍କ ବ୍ୟକ୍ତିଗତ ଜୀବନ ପାଇଁ ଅନେକ ସମୟରେ ଚର୍ଚ୍ଚାରେ ରହିଥା’ନ୍ତି। ଏପ୍ରିଲ ମାସରେ ଅରମାନ ୩ଟି ସନ୍ତାନର ବାପା ହୋଇଥିବା ବେଳେ ତାଙ୍କର ପ୍ରଥମ ପତ୍ନୀ ପାୟଲ ମଲିକ ଯାଆଁଳା ସନ୍ତାନ ଓ ଦ୍ବିତୀୟ ପତ୍ନୀ କ୍ରିତିକା ମଲିକ ଗୋଟିଏ ପୁଅକୁ ଜନ୍ମ ଦେଇଥିଲେ। ଏହାକୁ ନେଇ ସମଗ୍ର ମଲିକ ପରିବାର ଖୁସି ମନାଉଥିବା ବେଳେ ଏବେ ଏହି ଖୁସିରେ ସାମିଲ ହୋଇଛନ୍ତି ସୋସିଆଲ ମିଡିଆ ଷ୍ଟାର ଉର୍ଫି ଜାଭେଦ। ସେ ଅରମାନଙ୍କ ପରିବାରକୁ ଆସିଥିବା ଖୁସିରେ ଖୁସି ହୋଇ ନବଜାତଙ୍କ ପାଇଁ ଉପହାର ପଠାଇଥିବା ଜଣାପଡ଼ିଛି।

ନିଜର ସର୍ବଶେଷ ବ୍ଲଗରେ ପାୟଲ ମଲିକ କହିଛନ୍ତି ଯେ ତାଙ୍କ ଘରେ ଏକ ପାର୍ସଲ ଆସି ପହଞ୍ଚିଛି, ଯାହାକୁ ଉର୍ଫି ଜାଭେଦ ପଠାଇଛନ୍ତି। ଆମ ୩ସନ୍ତାନଙ୍କ ପାଇଁ ଉର୍ଫି ପୁଷ୍ପଗୁଚ୍ଛ, କେକ୍ ଏବଂ ଚକୋଲେଟ୍ ପଠାଇଥିବା କହିଛନ୍ତି ପାୟଲ। ଏହା ସହିତ ସେ ଏକ ଚିଠି ମଧ୍ୟ ପଠାଇଛନ୍ତି, ଯେଉଁଥିରେ ଲେଖାଅଛି- 'ପ୍ରିୟ କ୍ରିତିକା ଏବଂ ପାୟଲ, ଆପଣଙ୍କୁ ଅନେକ ଅଭିନନ୍ଦନ। ଭଗବାନ ଆପଣଙ୍କ ପିଲାଙ୍କୁ ଆଶୀର୍ବାଦ କରନ୍ତୁ। ଆପଣଙ୍କର ସ୍ୱାସ୍ଥ୍ୟ ଏବଂ ଧନ ମଧ୍ୟ ଭଲ ହେଉ।

ଉର୍ଫି ଜାଭେଦଙ୍କ ଏହି ଉପହାର ପାଇବା ପରେ ପାୟଲ ନିଜ ବ୍ଲଗ ଜରିଆରେ ଉର୍ଫିଙ୍କୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ, ଆମେ ତାଙ୍କ ସହ ଦୀର୍ଘ ଦିନ ହେଲାଣି କଥା ହେଉଛୁ। ଆମେ ତାଙ୍କୁ କହିଥିଲୁ ଯେ ଯେତେବେଳେ ବି ସେ ଏଠାକୁ ଆସିବେ, ସେ ଆମକୁ ଭେଟିବାକୁ ନିଶ୍ଚୟ ଆସିବେ। ଆମେ ତାଙ୍କୁ ଘରକୁ ନିମନ୍ତ୍ରଣ କରିଛୁ। ତାଙ୍କର ପୁରା ପରିବାର ଆମକୁ ବହୁତ ଭଲ ପାଆନ୍ତି। ବହୁତ୍ ବହୁତ୍ ଧନ୍ୟବାଦ୍ ଉର୍ଫି।