ମୁମ୍ବାଇ: ଗତଶନିବାର ସକାଳେ ମୁମ୍ବାଇର କାନ୍ଦିବଲି ଅଞ୍ଚଳରେ ମରାଠୀ ଅଭିନେତ୍ରୀ ଉର୍ମିଲା କୋଠାରେଙ୍କ କାର ଧକ୍କା ହେବା ପରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। 

Advertisment

ସମତା ନଗର ପୁଲିସ ଷ୍ଟେସନର ଅଧିକାରୀଙ୍କ କହିବାନୁସାରେ,‘ ଅଭିନେତ୍ରୀ ଉର୍ମିଲା କୋଠାରେ ସୁଟିଂ ଶେଷ କରିବା ପରେ ଘରକୁ ଫେରୁଥିଲେ। ଏହି ସମୟରେ କାନ୍ଦିବଲି ପୂର୍ବାଞ୍ଚଳରେ ପୋଇସର ମେଟ୍ରୋ ଷ୍ଟେସନ ତଳେ ମେଟ୍ରୋ ରେଳରେ କାମ କରୁଥିବା ଦୁଇଜଣ ଶ୍ରମିକଙ୍କୁ ତାଙ୍କ କାର ଧକ୍କା ଦେଇଥିଲା। 

ଏହି ଦୁର୍ଘଟଣାରେ ଜଣେ ଶ୍ରମିକଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ଶ୍ରମିକ ଗୁରୁତର ଆହତ ହୋଇଛନ୍ତି। ଏହି ଘଟଣାରେ ଅଭିନେତ୍ରୀ ଏବଂ ତାଙ୍କ ଚାଳକ ମଧ୍ୟ ଆହତ ହୋଇଛନ୍ତି। ସୌଭାଗ୍ୟବଶତଃ ଠିକ୍ ସମୟରେ ଏୟାରବ୍ୟାଗ ଖୋଲି ଯାଇଥିବା ବେଳେ ଅଭିନେତ୍ରୀଙ୍କ  ଜୀବନ ବଞ୍ଚିଯାଇଥିଲା। 

ପୁଲିସ ଦେଇଥିବା ସୂଚନା ଅନୁଯାୟୀ, ଚାଳକ କାର ଉପରୁ ନିୟନ୍ତ୍ରଣ ହରାଇ ରାସ୍ତା କଡ଼ରେ କାମ କରୁଥିବା ଶ୍ରମିକଙ୍କୁ ଧକ୍କା ଦେଇଥିଲେ।  ଏହି ଘଟଣାରେ କାର ଚାଳକଙ୍କ  ବିରୋଧରେ ମାମଲା ରୁଜୁ କରି ପୁଲିସ ତଦନ୍ତ ଆରମ୍ଭ କରିଛି। ଅଭିନେତ୍ରୀ ଉର୍ମିଲା କୋଠାରେ ମରାଠୀରେ “ଦୁନିୟାଦରୀ” ଏବଂ ହିନ୍ଦୀରେ “ଥ୍ୟାଙ୍କ ଗଡ଼” ଭଳି ଚଳଚ୍ଚିତ୍ରରେ ଅଭିନୟ କରିଛନ୍ତି।

ଗଣମାଧ୍ୟମ ସହ କଥାବାର୍ତ୍ତା ହୋଇ ମରାଠୀ ଅଭିନେତ୍ରୀ ଉର୍ମିଲା କୋଠାରେଙ୍କ ବାପା ଶ୍ରୀକାନ୍ତ କନେଟକର କହିଛନ୍ତି, "... କାର ଉର୍ମିଲାଙ୍କ ନାମରେ ପଞ୍ଜିକୃତ ହୋଇଛି। ବର୍ତ୍ତମାନ ତାଙ୍କ ସ୍ୱାସ୍ଥ୍ୟ ଅବସ୍ଥା ଭଲ ଅଛି।"