ଜାହ୍ନବୀଙ୍କ କାନ କାମୁଡ଼ି ଟ୍ରୋଲ ହେଲେ ବରୁଣ ଧୱନ

ମୁମ୍ବାଇ: ବଲିଉଡର ସୁପର କୁଲ୍ ଅଭିନେତା ବରୁଣ ଧୱନଙ୍କୁ କୌଣସି ପରିଚୟର ଆବଶ୍ୟକତା ନାହିଁ। ନିଜର ଅଭିନୟ ମାଧ୍ୟମରେ ସେ ବଲିଉଡରେ ନିଜର ସ୍ବତନ୍ତ୍ର ସ୍ଥାନ ତିଆରି କରିବାରେ ସଫଳ ହୋଇଛନ୍ତି। ତେବେ ସବୁବେଳେ ନିଜ ଫିଲ୍ମକୁ ନେଇ ଚର୍ଚ୍ଚାରେ ରହୁଥିବା ବରୁଣ ଏବେ ଏକ ଭାଇରାଲ ଫଟୋକୁ ନେଇ ତାଙ୍କୁ ଟ୍ରୋଲ ହେବାକୁ ପଡ଼ିଛି।

ଭାଇରାଲ ହେଉଥିବା ଫଟୋରେ ସେ ବଲିଉଡ ଅଭିନେତ୍ରୀ ଜାହ୍ନବୀ କପୁରଙ୍କ କାନକୁ କାମୁଡ଼ି ଦେଉଥିବା ଦେଖାଯାଇଛି। ଦୁହେଁ ଓଟିଟି‌ ପ୍ଲାଟଫର୍ମ ଆମାଜନ ପ୍ରାଇମ୍ ଭିଡିଓରେ ଜୁଲାଇ ୨୧ରେ ରିଲିଜ୍ ହେବାକୁ ଥିବା ଫିଲ୍ମ ବୱାଲରେ ନଜର ଆସିବେ। ଏ ମଧ୍ୟରେ ସୋସିଆଲ ମିଡିଆରେ ବରୁଣ ଏବଂ ଜାହ୍ନବୀଙ୍କ ଏକ ଫଟୋ ଭାଇରାଲ ହେବାରେ ଲାଗିଛି ଏବଂ ଏହି ଫଟୋ ହେତୁ ସୋସିଆଲ ମିଡିଆରେ 'ବୱାଲ' ଅଭିନେତାଙ୍କୁ ଟ୍ରୋଲ କରାଯାଉଛି। ଫଟୋରେ ବରୁଣ, ଜାହ୍ନବୀଙ୍କ ସହ କିଛି ଏଭଳି କରୁଥିବା ଦେଖିବାକୁ ମିଳୁଛି ଯାହାକୁ ଲୋକମାନେ ଆଦୌ ପସନ୍ଦ କରୁନାହାନ୍ତି।

ଭାଇରାଲ ଫଟୋରେ ବରୁଣ ମଜାରେ ଜାହ୍ନବୀଙ୍କ କାନ କାମୁଡ଼ି ଦେଉଥିବା ଦେଖିବାକୁ ମିଳିଛି। ବରୁଣ ଏଭଳି କରିବା ପରେ ଜାହ୍ନବୀ ହସିବା ସହ କାନରେ ହାତ ରଖିଛନ୍ତି। ତେବେ ବରୁଣ ଏଭଳି କାମ ମଜାରେ କରିଥିଲେ ବି ଲୋକଙ୍କୁ ଏହା ପସନ୍ଦ ଆସିନାହିଁ।

ଏହା ପୂର୍ବରୁ  ଆମେରିକୀୟ ମଡେଲ ଜିଜି ହଦିଦଙ୍କୁ ଚୁମ୍ବନ ଦେଇ ବିବାଦୀୟ ହୋଇଥିଲେ ବରୁଣ। ଏଭଳି ବିନା ଅନୁମତିରେ ଜଣେ ମହିଳାଙ୍କୁ ଚୁମ୍ବନ ଦେଇଥିବାରୁ ବରୁଣଙ୍କୁ ‌ଲୋକେ ଟ୍ରୋଲ କରିଥିଲେ।