ରିଲିଜ ପୂର୍ବରୁ ‘ଆଦିପୁରୁଷ’କୁ ବିରୋଧ କଲା ବିଶ୍ବ ହିନ୍ଦୁ ପରିଷଦ; ହଲରେ ପ୍ରଦର୍ଶିତ ହେବାକୁ ଦିଆଯିବ ନାହିଁ ବୋଲି ଦେଲା ଚେତାବନୀ
ମୁମ୍ବାଇ: ରାମାୟଣ ଚରିତ୍ର ଉପରେ ଆଧାରିତ ଫିଲ୍ମ ‘ଆଦିପୁରୁଷ’ ରିଲିଜ ହେବା ପୂର୍ବରୁ ଏହାକୁ ନେଇ ବିବାଦ ଆରମ୍ଭ ହେଇଛି । ବିଶ୍ବ ହିନ୍ଦୁ ପରିଷଦ ଫିଲ୍ମର ଟିଜରରେ ଥିବା ପ୍ରଭୁ ରାମ, ଲକ୍ଷ୍ମଣ ଏବଂ ରାବଣଙ୍କ ଭଳି ଚରିତ୍ରକୁ ନେଇ ବିରୋଧ କରିଛି। ଫିଲ୍ମକୁ କୌଣସି ହଲରେ ପ୍ରଦର୍ଶିତ ହେବାକୁ ଦିଆଯିବ ନାହିଁ ବୋଲି ବିଶ୍ୱ ହିନ୍ଦୁ ପରିଷଦ ଚେତାବନୀ ଦେଇଛି।
Sambad is now on WhatsApp
Join and get latest news updates delivered to you via WhatsApp
ଉତ୍ତରପ୍ରଦେଶର ସମ୍ୱଲରେ ବିଶ୍ୱ ହିନ୍ଦୁ ପରିଷଦର ବିଭାଗ ପ୍ରଚାର ମୁଖ୍ୟ ଅଜୟ ଶର୍ମା ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଯେ, କେବଳ ପ୍ରଭୁ ରାମ ନୁହଁନ୍ତି, ରାବଣ ଏବଂ ଲକ୍ଷ୍ମଣଙ୍କୁ ‘ଆଦିପୁରୁଷ’ ଚଳଚ୍ଚିତ୍ରରେ ଭୁଲ ଭାବେ ଚିତ୍ରଣ କରାଯାଇଛି। ସେ ଦାବି କରିଛନ୍ତି ଯେ ଏହି ଚଳଚ୍ଚିତ୍ରରେ ରାବଣ ଯେଉଁଭଳି ଭାବରେ ଚିତ୍ରିତ ହୋଇଛି ତାହା ରାମାୟଣ ଏବଂ ଅନ୍ୟାନ୍ୟ ଆନୁସଙ୍ଗିକ ଶାସ୍ତ୍ର ସହିତ ମେଳ ଖାଉ ନାହିଁ। ଅଜୟ ଶର୍ମା ଫିଲ୍ମ ସେନ୍ସର ବୋର୍ଡକୁ ପ୍ରଶ୍ନ କରିବାବେଳେ କହିଛନ୍ତି ଯେ ବୋର୍ଡ ଏକ ଅବାଧ ଓ ଦାୟିତ୍ୱହୀନ କାର୍ଯ୍ୟ କରୁଛି । ଯଦି ବୋର୍ଡ ଏହାର କର୍ତ୍ତବ୍ୟ ପାଳନ କରିବାରେ ସକ୍ଷମ ହେଉନାହିଁ ତେବେ ସରକାର ଏହାକୁ ଭାଙ୍ଗି ଦିଅନ୍ତୁ ବୋଲି ସେ ଦାବି କରିଛନ୍ତି।
ଫିଲ୍ମ ‘ଆଦିପୁରୁଷ’ର ଟିଜର ରିଲିଜ ହେବା ପରେ ଏହି ବିରୋଧ ଆରମ୍ଭ ହୋଇଛି। ରାଜନେତାଙ୍କଠାରୁ ଆରମ୍ଭ କରି ଚଳଚ୍ଚିତ୍ର କଳାକାର ପର୍ଯ୍ୟନ୍ତ ଏହାକୁ ସମାଲୋଚନା କରିଛନ୍ତି। ଉତ୍ତରପ୍ରଦେଶ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକ ମଧ୍ୟ କହିଛନ୍ତି ଯେ, ଏହି ଚଳଚ୍ଚିତ୍ର ମାଧ୍ୟମରେ ହିନ୍ଦୁ ସମାଜର ଭାବନା ଉପରେ ଆଘାତ କରାଯାଇଛି ।
ଉପନ୍ୟାସ ରାମାୟଣ ଦ୍ୱାରା ଅନୁପ୍ରାଣିତ ଚଳଚ୍ଚିତ୍ର ‘ଆଦିପୁରୁଷ’ ଜାନୁଆରି ୨୦୨୩ ରେ ମୁକ୍ତିଲାଭ କରିବ। ଏହି ଚଳଚ୍ଚିତ୍ରରେ ପ୍ରଭୁ ରାମଙ୍କ ଭୂମିକାରେ ଅଭିନେତା ପ୍ରଭାସ, ସୀତା ଭାବରେ କ୍ରିତି ସାନନ୍ ଏବଂ ସୈଫ ଅଲି ଖାନ୍ ରାବଣ ଭୂମିକାରେ ନଜର ଆସିବେ। ପ୍ରାୟ ୫୦୦ କୋଟି ଟଙ୍କା ବ୍ୟୟରେ ନିର୍ମିତ ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ଓମ ରାଉତ । ଏହି ଟିଜରରେ ଦେଖାଯାଇଥିବା ରାବଣ ଏବଂ ହନୁମାନଙ୍କ ଲୁକ କୁ ନେଇ ବିରୋଧ କରାଯାଇଛି।
ଫିଲ୍ମରେ ରାବଣ ଭୂମିକାରେ ଥିବା ସୈଫ ଅଲି ଖାନ୍ ଙ୍କ ଲୁକକୁ ପସନ୍ଦ କରାଯାଉନାହିଁ । ଅଜବ ହେୟାର ଷ୍ଟାଇଲ ଓ ଲମ୍ବା ଦାଢ଼ି କୁ ଦେଖି ସୈଫଙ୍କୁ ଔରଙ୍ଗଜେବ ଏବଂ ଆଲାଉଦ୍ଦିନ ଖିଲଜୀଙ୍କ ସହ ତୁଳନା କରାଯାଉଛି। ସୋସିଆଲ ମିଡିଆରେ ଲୋକମାନେ ଏହି ଚଳଚ୍ଚିତ୍ରକୁ #BoycottAdipurush ଏବଂ #BanAdipurush ସହିତ ବିରୋଧ କରୁଛନ୍ତି।