ଅମୃତପାଲ ସିଂଙ୍କୁ ପ୍ରଶଂସା କଲେ ଚନ୍ନି, ବ୍ୟକ୍ତିଗତ ବୟାନ କହି ଆଡେଇଗଲା କଂଗ୍ରେସ

ନୂଆଦିଲ୍ଲୀ: ଲୋକସଭାରେ ବଜେଟ୍ ଅଧିବେଶନ ଉପରେ ଆଲୋଚନା ବେଳେ 'ୱାରିସ୍ ପଞ୍ଜାବ ଦେ' ମୁଖ୍ୟ ତଥା ସ୍ୱାଧୀନ ସାଂସଦ ଅମୃତପାଲ ସିଂଙ୍କ ସମ୍ପର୍କରେ କଂଗ୍ରେସ ସାଂସଦ ଚରଣଜିତ ସିଂ ଚନ୍ନିଙ୍କ ବିବୃତ୍ତିରୁ ଦଳ ନିଜକୁ ଦୂରେଇ ରଖିଛି। କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ବିବୃତ୍ତିକୁ ତାଙ୍କର ବ୍ୟକ୍ତିଗତ ମତ ବୋଲି କହିଛନ୍ତି। ତେବେ ଚନ୍ନିଙ୍କ ବିବୃତ୍ତିକୁ କଂଗ୍ରେସ ନିନ୍ଦା କରିନାହିଁ। ସୂଚନାନୁସାରେ, ଅମୃତପାଲଙ୍କ ସମ୍ପର୍କରେ ଲୋକସଭାରେ ଚନ୍ନିଙ୍କ ବିବୃତ୍ତିରେ ଅନେକ କଂଗ୍ରେସ ସାଂସଦ କ୍ରୋଧିତ ହୋଇଥିଲେ। ଏହା ପରେ ହିଁ ଦଳ ଚନ୍ନିଙ୍କ ବିବୃତ୍ତିରୁ ନିଜକୁ ଦୂରେଇ ରଖିଛି।

ସଂସଦରେ ବଜେଟ୍ ଅଧିବେଶନ ଉପରେ ଆଲୋଚନା ବେଳେ ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ୍ ସିଂ ଚନ୍ନି ଖାଲିସ୍ତାନ ସମର୍ଥକ 'ୱାରିସ୍ ପଞ୍ଜାବ ଦେ'ର ମୁଖ୍ୟ ତଥା ସ୍ୱାଧୀନ ସାଂସଦ ଅମୃତପାଲ ସିଂଙ୍କୁ ସମର୍ଥନ ଜଣାଇ ଗୃହରେ ଏକ ବିବୃତ୍ତି ଦେଇଥିଲେ। ଯେଉଁଥିରେ ଚରଣଜିତ୍ ସିଂ ଲୋକସଭା ସାଂସଦ ଅମୃତପାଲ ସିଂଙ୍କ ବିଷୟରେ କହିଥିଲେ ଯେ, 'ଆମେ ପ୍ରତିଦିନ ଜରୁରୀକାଳୀନ ପରିସ୍ଥିତି ବିଷୟରେ କହୁଛୁ, କିନ୍ତୁ ଆଜି ଦେଶରେ ଅଘୋଷିତ ଜରୁରୀକାଳୀନ ପରିସ୍ଥିତି ଲାଗି ରହିଛି? କଂଗ୍ରେସ ସାଂସଦ ଚରଣଜିତ ସିଂ ଚନ୍ନି ଆହୁରି ମଧ୍ୟ କହିଥିଲେ ଯେ ପଞ୍ଜାବର ୨୦ ଲକ୍ଷ ଲୋକଙ୍କ ସାଂସଦ ଭାବରେ ନିର୍ବାଚିତ ହୋଇଥିବା ଜଣେ ବ୍ୟକ୍ତି (ଅମୃତପାଲ ସିଂ )ଙ୍କୁ ଜାତୀୟ ସୁରକ୍ଷା ଆଇନ ଅନୁଯାୟୀ ଜେଲରେ ରଖାଯିବା ମଧ୍ୟ ଏକ ପ୍ରକାର ଜରୁରୀକାଳୀନ ପରିସ୍ଥିତି। ଯେଉଁଥିପାଇଁ ସେ ତାଙ୍କ ଅଞ୍ଚଳର ଲୋକଙ୍କ ମତାମତ ଗୃହରେ ଉପସ୍ଥାପନ କରିବାରେ ଅସମର୍ଥ। ଏହା ମଧ୍ୟ ଏକ ଜରୁରୀକାଳୀନ ପରିସ୍ଥିତି |