ଭାରତର ଅନୁପ୍ରବେଶ ପାଇଁ ପ୍ରସ୍ତୁତହୋଇ ରହିଛନ୍ତି ୧୫୦ ଆତଙ୍କବାଦୀ
ଶ୍ରୀନଗର : ଏବେ କଶ୍ମୀରରେ ଗ୍ରୀଷ୍ମଋତୁ ଚାଲିଥିବାରୁ ନିୟନ୍ତ୍ରଣ ରେଖା ନିକଟରେ ଅନୁପ୍ରବେଶ ପାଇଁ ଅନୁକୂଳ ବାତାବରଣ ସୃଷ୍ଟି ହୋଇଛି । ଏହାର ସୁଯୋଗ ନେଇ ପ୍ରାୟ ୧୫୦ରୁ ଅଧିକ ଆତଙ୍କବାଦୀ ଭାରତରେ ଅନୁପ୍ରବେଶ ପାଇଁ ନିୟନ୍ତ୍ରଣ ରେଖା ସେପଟେ ଥିବା ଲଞ୍ଚ୍ ପ୍ୟାଡଗୁଡ଼ିକରେ ପ୍ରସ୍ତୁତ ହୋଇ ରହିଛନ୍ତି ବୋଲି ଭାରତୀୟ ସେନା ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ନିଜର ନାମ ଗୋପନ ରଖି ସଂପୃକ୍ତ ସେନା ଅଧିକାରୀ କହିଛନ୍ତି ଯେ କେବଳ ଏହି ୧୫୦ ଆତଙ୍କବାଦୀ ନୁହନ୍ତି, ପ୍ରାୟ ୫୦୦ ରୁ ୭୦୦ ଆତଙ୍କବାଦୀ ନିୟନ୍ତ୍ରଣରେଖା ସେପଟେ ଥିବା ଚାଲିମକେନ୍ଦ୍ରଗୁଡ଼ିକରେ ତାଲିମ ନେଉଛନ୍ତି । ଏସବୁ ତାଲିମକେନ୍ଦ୍ର ପାକ-ଅଧିକୃତ କଶ୍ମୀରର ମୁଜାଫରାବାଜ,କୋଟଲି, ମନସେରା ଆଦି ସ୍ଥାନରେ ଅବସ୍ଥିତ । ତେବେ ନିକଟରେ ଆତଙ୍କବାଦୀଙ୍କ ଦ୍ବାରା କରାଯାଇଥିବା କେତେକ ଅନୁପ୍ରବେଶ ଉଦ୍ୟମକୁ ଭାରତୀୟ ସେନା ସଫଳତାର ସହ ବିଫଳ କରିଦେଇଥିଲା । ଏହି କାରଣରୁ ଚଳିତ ବର୍ଷ ଏପର୍ୟ୍ୟନ୍ତ ଭାରତରେ କୌଣସି ଅନୁପ୍ରବେଶ କରାଯାଇନାହିଁ ।
ତେବେ ପୂର୍ବରୁ ଅନୁପ୍ରବେଶ କରିସାରିଥିବା ଆତଙ୍କବାଦୀଙ୍କ ‘କଥା ବୁଝାଯାଇଛି’ ବୋଲି ସେ କହିଛନ୍ତି । ଗତ ମେ ମାସରେ ସାପୋରେ ଓ ବାନ୍ଦିପୁରାରେ ହୋଇଥିବା ଏନକାଉଣ୍ଟରରେ ମୃତ୍ୟୁବରଣ କରିଥିବା କେତେକ ଆଫଗାନ ଆତଙ୍କବାଦୀଙ୍କଆଡ଼କୁ ଇସାରା କରି ସେ ଏକଥା କହିଥିଲେ ।
କଶ୍ମୀର ରୁଟରେ ଆତଙ୍କବାଦୀଙ୍କ ଅନୁପ୍ରବେଶ କଷ୍ଟକର ହୋଇଯାଇଥିବାରୁ ସେମାନେ ଅନ୍ୟ କେତେକ ରୁଟ ଦେଇ ପ୍ରବେଶ କରିବାକୁ ଉଦ୍ୟମ କରୁଛନ୍ତି ବୋଲି ସେ କହିଛନ୍ତି ।