ଭାରତର ଯେସାକୁ ତେସା ନୀତି : ଦିଲ୍ଲୀରେ ଥିବା ବ୍ରିଟିସ୍ ଦୂତାବାସ ଆଗରୁ ହଟିଲା ବ୍ୟାରିକେଡ୍ସ
ନୂଆଦିଲ୍ଲୀ : ଦିଲ୍ଲୀର ୨, ରାଜାଜୀ ମାର୍ଗରେ ଥିବା ୟୁକେ ହାଇକମିସନ ବାହାରେ ଲଗାଯାଇଥିବା ବ୍ୟାରିକେଡ୍ସ କୁ ବୁଧବାର ହଟାଇ ଦିଆଯାଇଛି । ଏପରିକି ବ୍ରିଟିଶ ଉଚ୍ଚାୟୁକ୍ତ ଆଲେକ୍ସ ଏଲିକ୍ସଙ୍କ ବାସଭବନ ଆଗରୁ ବି ବ୍ୟାରିକେଡ୍ଟ ହଟାଯାଇଛି । ଏହା ପଛର କାରଣ କ’ଣ, ଏ ନେଇ ସରକାରୀ ସୂତ୍ରରୁ ଏପର୍ଯ୍ୟନ୍ତ କୌଣସି ସୂଚନା ମିଳିନାହିଁ । କିନ୍ତୁ ଲଣ୍ଡନରେ ଥିବା ଭାରତୀୟ ହାଇକମିସନରେ ଖଲିସ୍ତାନୀ ସମର୍ଥକଙ୍କ ବିକ୍ଷୋଭ ସହ ମଧ୍ୟ ଏହାକୁ ଯୋଡ଼ାଯାଉଛି । ଭାରତ ଯେସାକୁ ତେସା ନୀତି ଗ୍ରହଣ କରୁଥିବା କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଗତ ରବିବାର ଖଲିସ୍ତାନ ସମର୍ଥକମାନେ ଲଣ୍ଡନରେ ଥିବା ଭାରତୀୟ ହାଇକମିସନ ପରିସରରେ ପ୍ରବେଶ କରି ଭାରତର ଜାତୀୟ ପତାକାକୁ ଓହ୍ଲାଇ ଦେଇ ଖଲିସ୍ତାନ ପତାକା ଲଗାଇଥିଲେ । ଏହାକୁ ନେଇ ଭାରତ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲା ଓ ଘଟଣାରେ ସମ୍ପୃକ୍ତ ସମସ୍ତଙ୍କୁ ଗିରଫ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲା। ଏଥିସହ ଏଭଳି ଘଟଣାକୁ ରୋକିବା ପାଇଁ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରାଯିବା ଦରକାର ବୋଲି କହିଥିଲା । ଏହା ପରେ ବ୍ରିଟିସ ପୁଲିସ କେତେକ ଅଭିଯୁକ୍ତଙ୍କୁ ଗିରଫ କରିଥିଲା ।
ଏହା ସହିତ ବ୍ରିଟିସ ସରକାର ଏହି ଘଟଣାକୁ ନିନ୍ଦା କରିବା ସହ ଏହାକୁ ଅତ୍ୟନ୍ତ ଅପମାନଜନକ ଏବଂ ସମ୍ପୂର୍ଣ୍ଣ ଭାବେ ଗ୍ରହଣୀୟ ନୁହେଁ ବୋଲି କହିଛନ୍ତି। ଲଣ୍ଡନ ମେୟର ସାଦିକ ଖାନ୍ ଟ୍ୱିଟ୍ କରି ଏହାକୁ ନିନ୍ଦା କରିଥିଲେ । ଘଟଣାର ତଦନ୍ତ ଚାଲିଛି। ଲଣ୍ଡନ ମେଟ୍ରୋପଲିଟାନ ପୋଲିସ ଏହି ଘଟଣାର ତଦନ୍ତ କରୁଛି ।