ବାଙ୍ଗାଲୁରୁ : କର୍ଣ୍ଣାଟକରେ ଗତ କିଛି ମାସ ମଧ୍ୟରେ ମନ୍ଦିର ପ୍ରସାଦ ଖାଇ ଭକ୍ତ ମୃତାହତ ଘଟଣା ଏକାଧିକ ଥର ଘଟିଛି । ଆଜି ପବିତ୍ର ଗଣତନ୍ତ୍ର ଦିବସରେ ଏପରି ଏକ ଦୁର୍ଭାଗ୍ୟଜନକ ଘଟଣା ଘଟିଛି । ରାଜ୍ୟର ଚିକାବଲାପୁର ଜିଲ୍ଲାରେ ଥିବା ଚିନ୍ତାମଣି ଟାଉନରେ ଗଙ୍ଗାମ୍ମା ମନ୍ଦିରରେ ବିଷାକ୍ତ ପ୍ରସାଦ ଖାଇ ଜଣେ ମହିଳା ନିହତ ହୋଇଥିବା ସହ ଆଉ ୧୧ ଜଣ ଅସୁସ୍ଥ ହୋଇଛନ୍ତି । ଏହି ଅସୁସ୍ଥମାନଙ୍କ ମଧ୍ୟରେ ମୃତକ ମହିଳା କବିତା (୨୨)ଙ୍କ ୪ ଜଣ ପରିବାର ସଦସ୍ୟ ଅନ୍ତର୍ଭୁକ୍ତ । ପ୍ରତ୍ୟକ୍ଷଦର୍ଶୀଙ୍କ ମତରେ ଏକ ଅଜଣା ମହିଳା ଆସି ମନ୍ଦିର ବାହାରେ ହାଲଓ୍ଵା ବିତରଣ କରିଥିଲା । ଏହି ପ୍ରସାଦ ଖାଇପରେ ଲୋକମାନେ ଅସୁସ୍ଥ ହୋଇଥିବା ଜଣାପଡିଛି ।
Sambad is now on WhatsApp
Join and get latest news updates delivered to you via WhatsApp
କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚଡି କୁମାରସ୍ୱାମୀ ଏହି ଘଟଣାକୁ ନେଇ ଗଭୀର ଶୋକ ପ୍ରକାଶ କରିବା ସହ ଅସୁସ୍ଥ ଲୋକମାନଙ୍କୁ ସବୁ ପ୍ରକାରର ସହାୟତା ଯୋଗାଇବା ପାଇଁ ନିର୍ଦ୍ଦେଶ ଦେଇଛନ୍ତି । ଖାଦ୍ୟ ବିଷାକ୍ତକରଣ ଫଳରେ ଏହି ଘଟଣା ଘଟିଥିବା ମୁଖ୍ୟମନ୍ତ୍ରୀ କହିଛନ୍ତି । ସେ କହିଛନ୍ତି ଯେ ଜିଲ୍ଲା ସ୍ୱାସ୍ଥ୍ୟ ଅଧିକାରୀମାନଙ୍କୁ ସହାୟତା ପାଇଁ ନିର୍ଦ୍ଦେଶ ଦିଆଯାଇଛି । ଲୋକମାନଙ୍କ ସ୍ୱାସ୍ଥ୍ୟାବସ୍ଥା ଉପରେ ୨୪ ଘଣ୍ଟା ନଜର ରଖାଯାଇଛି ବୋଲି ସେ କହିଛନ୍ତି । ଗତ ଡିସେମ୍ବର ମାସରେ ଚମାରାଜନଗର ଜିଲ୍ଲାର କାମଗେରେ ଗ୍ରାମରେ ମନ୍ଦିର ପ୍ରସାଦ ଖାଇ ୧୫ ଜଣ ମୃତ୍ୟୁବରଣ କରିବା ସାରା ଦେଶରେ ଚହଳ ପକାଇଥିଲା ।