ଇମ୍ଫାଲ: ମଣିପୁରରରେ ବିରୋଧ ଓ ହିଂସା ଜାରି ରହିଛି। ଏହି ହିଂସାରେ ରବିବାର ଦିନ ଜଣେ ବିକ୍ଷୋଭକାରୀଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି। ଜିରିବାମ୍‌ ଜିଲ୍ଲାରେ ଜନତାଙ୍କୁ ନିୟନ୍ତ୍ରଣ କରିବା ପାଇଁ ସୁରକ୍ଷା ବାହିନୀ ଗୁଳି ଚାଳନା କରିଥିବା ବେଳେ ରାତି ପ୍ରାୟ ୧୧ଟା ବେଳେ ବାବୁପରାର ୨୦ ବର୍ଷୀୟ ଯୁବକ କେ ଅଥୁବାଙ୍କର ମୃତ୍ୟୁ ଘଟିଥିବା ସୂଚନା ରହିଛି।

Advertisment

ସଂପୃକ୍ତ ଅଞ୍ଚଳରେ ଭାରତୀୟ ଜନତା ପାର୍ଟି (ବିଜେପି) ଏବଂ କଂଗ୍ରେସର ସ୍ଥାନୀୟ କାର୍ଯ୍ୟାଳୟରୁ ନିଆଯାଇଥିବା ଆସବାବପତ୍ର ଏବଂ ଅନ୍ୟାନ୍ୟ ସମ୍ପତ୍ତିରେ ସ୍ଥାନୀୟ ଲୋକମାନେ ନିଆଁ ଲଗାଇ ଦେଇଛନ୍ତି। ଜିରିବାମ୍ ପୁଲିସ୍ ଷ୍ଟେସନର ୫୦୦ ମିଟର ମଧ୍ୟରେ ଏହି ହିଂସା ଘଟିଥିଲା।

ଅଶାନ୍ତ ପରିବ‌େଶକୁ ପରିଚାଳନା କରିବା ପାଇଁ ସୁରକ୍ଷା ବାହିନୀ ନିୟୋଜିତ ହେବା ସହିତ ଜିଲ୍ଲାରେ ଉତ୍ତେଜନା ଦେଖାଦେଇଛି। ଆହତ ବ୍ୟକ୍ତିଙ୍କୁ ନିକଟସ୍ଥ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଯେଉଁଠାରେ ସେମାନେ ବର୍ତ୍ତମାନ ଚିକିତ୍ସିତ ହେଉଛନ୍ତି। ତେବେ ତାଙ୍କ ଅବସ୍ଥା କିପରି ଅଛି ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ।

ଏହାରି ମଧ୍ୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଆଜି ଅଧିକାରୀଙ୍କ ସହ ବିସ୍ତୃତ ବୈଠକ କରି ମଣିପୁରର ସ୍ଥିତି ସମ୍ପର୍କରେ ଆଲୋଚନା କରିବାକୁ ଯାଉଛନ୍ତି।

ଗୃହ ମନ୍ତ୍ରଣାଳୟର ଉତ୍ତର-ପୂର୍ବ ବିଭାଗର ବରିଷ୍ଠ ଅଧିକାରୀ, କେନ୍ଦ୍ର ଗୃହ ସଚିବ, ଗୁପ୍ତଚର ବ୍ୟୁରୋର ନିର୍ଦ୍ଦେଶକ ଏବଂ କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀ (ସିଏପିଏଫ୍‌) ଏବଂ ଆସାମ ରାଇଫଲ୍ସର ଅଧିକାରୀମାନେ ଏହି ବୈଠକରେ ଯୋଗଦେବେ।

ରବିବାର ଦିନ ମଣିପୁର ପୁଲିସ କହିଛି ଯେ ଭିଡ଼ ଆକ୍ରମଣ ଘଟଣାରେ ୨୩ ଜଣଙ୍କୁ ଗିରଫ କରାଯାଇଛି। ପୁଲିସ ସେମାନଙ୍କ ନିକଟରୁ ଅସ୍ତ୍ରଶସ୍ତ୍ର ଏବଂ ମୋବାଇଲ୍‌ ଜବତ କରିଛି।