ଉପସାଗରୀୟ ଦେଶରେ ଥିବା ୧୦ ହଜାର ଭାରତୀୟ କରୋନା ସଂକ୍ରମିତ, ୮୪ ମୃତ
ନୂଆଦିଲ୍ଲୀ : ଭାରତରେ କରୋନା ସଂକ୍ରମିତ ସଂଖ୍ୟା ୪୬ ହଜାର ଟପିଯାଇଛି । କିନ୍ତୁ ଏହା କେବଳ ଦେଶ ଭିତରର ସଂଖ୍ୟା । ଦେଶ ବାହାରେ ମଧ୍ୟ ହଜାର ହଜାର ଭାରତୀୟ କରୋନା ସଂକ୍ରମିତ ଥିବା ଜଣାପଡ଼ିଛି । ଗଣମାଧ୍ୟମ ରିପୋର୍ଟ ଅନୁସାରେ ମଧ୍ୟପୂର୍ବରେ ଥିବା ଭାରତୀୟଙ୍କ ମଧ୍ୟରୁ ପ୍ରାୟ ୧୦ ହଜାର କରୋନା ସଂକ୍ରମିତ ଅଛନ୍ତି । ସେମାନଙ୍କ ମଧ୍ୟରୁ ୮୪ ଜଣ ପ୍ରାଣ ହରେଇସାରିଲେଣି ।
Sambad is now on WhatsApp
Join and get latest news updates delivered to you via WhatsApp
ଏହି ତଥ୍ୟ ଭାରତ ସରକାରଙ୍କୁ ଚିନ୍ତାରେ ପକାଇଦେଇଛି, କାରଣ ସରକାର ବିଦେଶରେ ଫସିରହିଥିବା ଲକ୍ଷ ଲକ୍ଷ ଭାରତୀୟଙ୍କୁ ଆଣିବାକୁ ଏକ ବଡ଼ ଧରଣର ଅଭିଯାନ ଆରମ୍ଭ କରିଛନ୍ତି । ବିଦେଶରେ ଥିବା ପ୍ରାୟ ୨ ଲକ୍ଷ ଭାରତୀୟ ଏଥିପାଇଁ ପଂଜୀକରଣ କରିଛନ୍ତି । ପ୍ରଥମ ପର୍ଯ୍ୟାୟରେ ପ୍ରାୟ ୧୪୮୦୦ ଭାରତୀୟଙ୍କୁ ଫେରାଇ ଅଣାଯିବ । ତେବେ ଏଥିପାଇଁ ସେମାନଙ୍କୁ ଅର୍ଥ ଖର୍ଚ୍ଚ କରିବାକୁ ହେବ । ଆମେରିକାରୁ ଭାରତ ଆସିବାକୁ ହେଲେ ଟିକେଟ ଖର୍ଚ୍ଚ ୧ ଲକ୍ଷ ଟଙ୍କା, ଲଣ୍ଡନରୁ ଆସିଲେ ୫୦ ହଜାର ଓ ଦୁବାଇରୁ ଆସିଲେ ୧୩ ହଜାର ଟଙ୍କା ଦେବାକୁ ପଡ଼ିବ । ଏଥିପାଇଁ ମେ ୭ରୁ ୧୩ ମଧ୍ୟରେ ସରକାର ପ୍ରାୟ ୬୪ଟି ବିମାନ ଚଳାଇବେ ।