କୋଲକାତା : ବାଲେଶ୍ବର ମର୍ମନ୍ତୁଦ ରେଳ ଦୁର୍ଘଟଣାକୁ ନେଇ ଏକ ବଡ଼ ବୟାନ ଦେଇଛନ୍ତି ପୂର୍ବତନ ରେଳମନ୍ତ୍ରୀ ଦିନେଶ ତ୍ରିବେଦୀ । ସେ କହିଛନ୍ତି ଯେ ଏହା କେବଳ ଏକ ଦୁର୍ଘଟଣା ନୁହେଁ, ଅତ୍ୟନ୍ତ ଯୋଜନାବଦ୍ଧ ଷଡ଼ଯନ୍ତ୍ର । କାରଣ ରେଳଲାଇନର ଇଣ୍ଟରଲକିଂ ସିଷ୍ଟମ ସହଜରେ ଖରାପ ହୁଏ ନାହିଁ ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ ଏହି ଦୁର୍ଘଟଣା ସଂପର୍କରେ ଯେଉଁ ସବୁ ତଥ୍ୟ ଆସୁଛି ସେଥିରୁ ସେ ୧୦୦ ପ୍ରତିଶତ ନିଶ୍ଚିତ ଯେ ଏକ ଷଡ଼ଯନ୍ତ୍ର କରାଯାଇ ଏହି ଦୁର୍ଘଟଣା ଘଟାଯାଇଛି । ସିଗନାଲ ଗ୍ରୀନ (ସବୁଜ) ଥିଲା, ଏ କ୍ଷେତ୍ରରେ ଇଣ୍ଟରଲକିଂ ସିଷ୍ଟମ କାମ ନକରିବା ଅସମ୍ଭବ ଥିଲା ।
ରେଳବାଇ ବ୍ୟବସ୍ଥାରେ ଯଦି ଗୋଟିଏ ଇଣ୍ଟରଲକିଂ ସିଷ୍ଟମ ବିଫଳ ହୁଏ ତେବେ ତାହାର ଏକ ବିକଳ୍ପ ବ୍ୟବସ୍ଥା ରହିଛି । ତାହାକୁ କୁହାଯାଏ ‘ଫେଲ-ସେଫ୍’ । ଯଦି ଫେଲ୍ ସେଫ୍ ବ୍ୟବସ୍ଥା ସକ୍ରିୟ ହୋଇଯାଏ ତେବେ ଗୋଟିଏ ନିର୍ଦ୍ଦିଷ୍ଟ ଟ୍ରାକର ସବୁ ସିଗନାଲ ଲାଲ ହୋଇଯିବ ଓ ଟ୍ରେନ ଆଉ ଚାଲିବ ନାହିଁ । ଏକାଥରକେ ଦୁଇ ଦୁଇଟି ବ୍ୟବସ୍ଥା ବିଫଳ ହେବ ନାହିଁ । ଏଣୁ ଏହା କେବଳ ସିଗନାଲ ବିଫଳତା, ଲାଇନଚ୍ୟୁତ ହେବା ଘଟଣା ନୁହେଁ, ଏହା ୧୦୦ ପ୍ରତିଶତ ଏକ ଅନ୍ତର୍ଘାତୀ କାର୍ଯ୍ୟ, ଯାହାକୁ ଅତ୍ୟନ୍ତ ଯୋଜନାବଦ୍ଧ ଭାବେ କାର୍ଯ୍ୟକାରୀ କରାଯାଇଛି । ଏହାର ତଦନ୍ତ ହେଲେ ଜଣାପଡ଼ିବ ।