ଦୁବାଇ : ଏକ ହାଇପରସୋନିକ କ୍ଷେପଣାସ୍ତ୍ର ନିର୍ମାଣ କରିଥିବା ଇରାନ ଦାବି କରିଛି , ଯାହାକି ଶବ୍ଦର ବେଗଠାରୁ ୧୫ ଗୁଣ ବେଗରେ ଗତି କରିପାରିବ । ଇରାନ ଏଭଳି ଏକ ସମୟରେ ଘୋଷଣା କରିଛି ଯେତେବେଳେ ଆମେରିକା ସହ ତାହାର ସମ୍ପର୍କ ଉତ୍ତେଜନାପୂର୍ଣ୍ଣ ରହିଛି । ଇରାନର ପରମାଣୁ କାର୍ଯ୍ୟକ୍ରମକୁ ନେଇ ଆମେରିକା ଇରାନ ଉପରେ କଟକଣା ଜାରି କରିଛି ।
Sambad is now on WhatsApp
Join and get latest news updates delivered to you via WhatsApp
ଇରାନର ସରକାରୀ ଟେଲିଭିଜନ୍ ଏକ ରିପୋର୍ଟରେ କହିଛି ଯେ ‘ଫତାହ’ ନାମକ ଏହି କ୍ଷେପଣାସ୍ତ୍ର ୧୪୦୦ କିଲୋମିଟର ପର୍ଯ୍ୟନ୍ତ ଯାତ୍ରା କରିବାର କ୍ଷମତା ରଖିଛି । ତେବେ ଏହି ହାଇପରସୋନିକ୍ କ୍ଷେପଣାସ୍ତ୍ର ନିର୍ମାଣ ନେଇ କୌଣସି ପ୍ରାମାଣ ପ୍ରଦାନ କରିନି ଇରାନ ।
ରିପୋର୍ଟରେ ଏହା ମଧ୍ୟ ଦାବି କରାଯାଇଛି ଯେ ଏହି କ୍ଷେପଣାସ୍ତ୍ର ଯେକୌଣସି କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥାକୁ ଭେଦ କରିବାକୁ ସକ୍ଷମ । ଏହି ଦାବିକୁ ମଧ୍ୟ ସମର୍ଥନ କରିବା ପାଇଁ କୌଣସି ପ୍ରମାଣ ଉପସ୍ଥାପନ କରାଯାଇ ନାହିଁ। ଟିଭି ଫୁଟେଜରେ ଦେଖିବାକୁ ମିଳୁଛି ଯେ, ଇରାନର ରିଭୋଲ୍ୟୁସନରୀ ଗାର୍ଡ ପକ୍ଷରୁ ରାଷ୍ଟ୍ରପତି ଇବ୍ରାହିମ ରାଇସିଙ୍କ ସାମ୍ନାରେ କ୍ଷେପଣାସ୍ତ୍ରର ଏକ ମଡେଲ ଉନ୍ମୋଚନ କରାଯାଉଛି ।
ଇରାନ ପାଖରେ ବିପୁଳ ପରିମାଣରେ ବ୍ୟାଲିଷ୍ଟିକ୍ କ୍ଷେପଣାସ୍ତ୍ର ମହଜୁଦ ରହିଛି। ଗତ ନଭେମ୍ବରମାସରେ ରିଭୋଲ୍ୟୁସନରୀ ଗାର୍ଡ ଜେନେରାଲ ଅମୀର ଅଲ୍ଲୀ ହାଜିଜାଦେ ଦାବି କରିଥିଲେ ଯେ ଇରାନ ଏକ ହାଇପରସୋନିକ୍ କ୍ଷେପଣାସ୍ତ୍ର ବିକଶିତ କରିଛି ।
ସୂଚନାଯୋଗ୍ୟ ଯେ ହାଇପରସୋନିକ୍ କ୍ଷେପଣାସ୍ତ୍ର ଟେକନୋଲୋଜୀ ବିଶ୍ବର ଅଳ୍ପ କିଛି ଦେଶଙ୍କ ପାଖରେ ରହିଛି । ସେମାନଙ୍କ ମଧ୍ୟରେ ଅଛନ୍ତି ରୁଷ, ଆମେରିକା ଓ ଚୀନ । ଭାରତ ମଧ୍ୟ ଏହି ଟେକନଲୋଜୀ ଉପରେ କାମ କରୁଛି ।