ଅଗଷ୍ଟରେ ଏପର୍ଯ୍ୟନ୍ତ ୭ ପ୍ରତିଶତ ବଳକା ବର୍ଷା
ନୂଆଦିଲ୍ଲୀ : ଅଗଷ୍ଟ ମାସରେ ଦେଖାଦେଇଥିବା କେତୋଟି ଲଘୁଚାପ ଫଳରେ ସାରା ଦେଶରେ ପ୍ରବଳ ବର୍ଷା ହୋଇଛି । ଏହା ଫଳରେ ଜୁଲାଇ ମାସରେ ନିଅଣ୍ଟିଆ ଥିବା ଦକ୍ଷିଣ-ପଶ୍ଚିମ ମୌସୁମୀ ବର୍ଷା ଅଗଷ୍ଟ ୨୩ ସୁଦ୍ଧା ୭ ପ୍ରତିଶତ ବଳକା ବର୍ଷାରେ ପରିଣତ ହୋଇଛି । ଆଜିଠାରୁ ବଙ୍ଗୋପସାଗରରେ ଆଉ ଏକ ଲଘୁଚାପ ସୃଷ୍ଟି ହେଉଥିବାରୁ ମାସ ଶେଷ ବେଳକୁ ଏହି ବଳକା ପରିମାଣ ଆହୁରି ବଢିବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ଘରୋଇ ପାଣିପାଗ ସଂସ୍ଥା ସ୍କାଏମେଟର ରିପୋର୍ଟ ଅନୁସାରେ ଜୁନରେ ଦେଶରେ ୧୭ ପ୍ରତିଶତ ବଳକା ବର୍ଷା ହୋଇଥିବାବେଳେ ଜୁଲାଇ ଶୁଖିଲା ପଡ଼ିଗଲା । ଆବଶ୍ୟକ ବର୍ଷା ଅଭାବରୁ ଜୁଲାଇରେ ମୌସୁମୀ ୧୦ପ୍ରତିଶତ ନିଅଣ୍ଟ ରହିଲା । କିନ୍ତୁ ଅଗଷ୍ଟରେ ଉଭୟ ବଙ୍ଗୋପସାଗର ଓ ଆରବ ସାଗରରେ ଲଘୁଚାପ ଫଳରେ ବର୍ଷା ପରିମାଣ ନିଅଣ୍ଟକୁ ଭରଣା କରିବା ସହ ସ୍ୱାଭାବିକଠାରୁ ୭ ପ୍ରତିଶତ ବଳକା ବର୍ଷା ହୋଇଛି ।
ତେବେ ସ୍କାଏମେଟର ରିପୋର୍ଟ ଅନୁସାରେ ସେପ୍ଟେମ୍ବରରେ ଅଗଷ୍ଟ ତୁଳନାରେ କମ ବର୍ଷା ହେବ । କିନ୍ତୁ ସାମଗ୍ରିକ ଭାବେ ମୌସୁମୀ ବର୍ଷା ପରିମାଣରେ ସେତେଟା ହ୍ରାସ ପାଇବାର ସମ୍ଭାବନା ନାହିଁ ।
ଚଳିତ ମୌସୁମୀ ଋତୁ ଆରମ୍ଭ ହେବା ପୂର୍ବରୁ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଥିଲା ଯେ ଏବର୍ଷ ସ୍ୱାଭାବିକଠାରୁ ୩ ପ୍ରତିଶତ ଅଧିକ ବର୍ଷା ହେବ ।