ମୂର୍ତ୍ତି ବିସର୍ଜନ ସାରି ଫେରୁଥିଲେ, ବାଟରେ ଜଗି ବସିଥିଲା ଯମ : ଟ୍ରାକ୍ଟର ଓଲଟି ୭ ମହିଳା, ୪ ଶିଶୁଙ୍କ ଜୀବନ ଗଲା
ଝାନସୀ: ବିଜୟାଦଶମୀରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ୭ ଜଣ ମହିଳାଙ୍କ ସମେତ ମୋଟ ୧୧ ଜଣଙ୍କର ମୃତ୍ୟୁ ହୋଇଛି । ଏହାସହ ୬ ଜଣ ଗୁରୁତର ହୋଇଛନ୍ତି । ମୃତକଙ୍କ ମଧ୍ୟରେ ୪ ଜଣ ଶିଶୁ ଥିବା କଥା କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଉତ୍ତର ପ୍ରଦେଶର ଝାନ୍ସିର ଚିରଗାଁଓ ଅଞ୍ଚଳରେ ଶୁକ୍ରବାର ଦିନ ଏହି ବଡ ଦୁର୍ଘଟଣା ହୋଇଛି । ମାଣ୍ଡେର ରୋଡ ସ୍ଥିତ ଛିନ୍ନୋରା ଗାଁର ଶ୍ରଦ୍ଧାଳୁମାନେ ମୂର୍ତ୍ତି ବିସର୍ଜନ ସାରି ଫେରୁଥିବାବେଳେ ଚିରଗାଁଓ ନିକଟରେ ଟ୍ରାକ୍ଟର ଓଲଟି ପଡିବା ଫଳରେ ଘଟଣାସ୍ଥଳରେ ୧୧ ଜଣଙ୍କର ମୃତ୍ୟୁ ହୋଇଛି । ଟ୍ରାକ୍ଟରରେ ମୋଟ ୩୨ ଜଣ ଲୋକ ଥିଲେ । ମୃତ୍ୟୁମୁଖରେ ପଡ଼ିଥିବା ଲୋକମାନଙ୍କ ମଧ୍ୟରେ ୭ ଜଣ ମହିଳା ଓ ୪ ଜଣ ଛୋଟ ପିଲା ରହିଛନ୍ତି । ଖବର ପାଇଁ ସ୍ଥାନୀୟ ପୋଲିସ ପହଂଚି ଉଦ୍ଧାର କରିବା ସହ ଆହତମାନଙ୍କୁ ମେଡିକାଲ ପଠାଇଛି ।
ସୂଚନା ମୁତାବକ, ଶ୍ରଦ୍ଧାଳୁମାନେ ଟ୍ରାକ୍ଟରର ଟ୍ରଲିରେ ବସି ମୂର୍ତ୍ତି ବିସର୍ଜନ କରି ଫେରୁଥିଲେ । ହଠାତ ରାସ୍ତାରେ ଟ୍ରାକ୍ଟର ଆଗକୁ ଏକ ଗୋରୁପଲ ଚାଲିଆସିଥିଲା । ଟ୍ରାକ୍ଟର ଚାଳକ ଭାରସାମ୍ୟ ହରାଇ ଟ୍ରାକ୍ଟରଟିକୁ ରାସ୍ତା ତଳକୁ ଗଡାଇ ଦେଇଥିଲେ । ଫଳରେ ରାସ୍ତାକଡ଼ ଖାତକୁ ଟ୍ରଲିଟି ସମ୍ପୂର୍ଣ୍ଣ ଓଲଟି ପଡିଥିଲା । ଟ୍ରଲି ତଳେ ଚାପି ହୋଇ ରହିବା ଫଳରେ ଘଟଣାସ୍ଥଳରେ ହିଁ ୧୧ଜଣଙ୍କ ମୃତ୍ୟୁ ଘଟିଥିଲା।