ଭାଙ୍ଗିଯିବ କି ବିଏସପି! ନିଲମ୍ବିତ ୧୧ ଜଣ ବିଧାୟକ ଗଢ଼ିପାରନ୍ତି ନୂଆ ଦଳ
ନୂଆଦିଲ୍ଲୀ: ୨୦୧୨ ବିଧାନସଭା ନିର୍ବାଚନ ପୂର୍ବରୁ ଉତ୍ତରପ୍ରଦେଶରେ ରାଜନୀତି ତୀବ୍ର ହୋଇଛି। ବହୁଜନ ସମାଜ ପାର୍ଟିରୁ ନିଲମ୍ବିତ ୧୧ ଜଣ ବିଧାୟକ ବର୍ତ୍ତମାନ ଏକଜୁଟ ହୋଇଛନ୍ତି। ସମସ୍ତେ ଲାଲଜୀ ବର୍ମାଙ୍କ ନେତୃତ୍ୱରେ ଏକ ନୂତନ ଦଳ ଗଠନ କରିବାକୁ ନିଷ୍ପତ୍ତି ନେଇଛନ୍ତି। ବିଏସପିରୁ ନିଲମ୍ବିତ ହୋଇଥିବା ୯ ଜଣ ବିଧାୟକ ମଧ୍ୟ ଆଜି ଲଖନଉରେ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବଙ୍କୁ ଭେଟିବାକୁ ଯାଇଥିଲେ। ବିଏସପିରେ ଥିବା ମୋଟ ୧୮ ଜଣ ବିଧାୟକଙ୍କ ମଧ୍ୟରୁ ୯ ଜଣଙ୍କୁ ନିଲମ୍ବିତ କରାଯାଇଥିଲା ଏବଂ ଦୁଇଜଣ ଦଳ ଦ୍ୱାରା ବହିଷ୍କୃତ ହୋଇଥିଲେ। ଆଉ ଏବେ ଆଲୋଚନା ହେଉଛି ଯେ ସମସ୍ତ ବିଦ୍ରୋହୀ ବିଧାୟକ ଖୁବ୍ ଶୀଘ୍ର ସମାଜବାଦୀ ପାର୍ଟିରେ ଯୋଗଦେବେ ଏବଂ ସମାଜବାଦୀ ପାର୍ଟି ଟିକଟରେ ଆଗାମୀ ବିଧାନସଭା ନିର୍ବାଚନରେ ଲଢ଼ିବେ ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟସଭା ନିର୍ବାଚନରେ ବିଏସପି ବିରୋଧରେ ବିଦ୍ରୋହ କରିବା ପରେ ନିଲମ୍ବିତ ହୋଇଥିବା ବିଧାୟକ ଅସଲମ ରାଇନି କହିଛନ୍ତି ଯେ ବିଏସପିର ସମସ୍ତ ୧୧ ବିଦ୍ରୋହୀ ବିଧାୟକ ଏକତ୍ର ନୂତନ ଦଳ ଗଠନ କରିବେ। ରାଇନି କହିଛନ୍ତି ଯେ ଆମର ନେତା ଲାଲଜୀ ବର୍ମା ହେବେ। ଆମେ ୧୧ ଜଣ ବିଧାୟକ ଏକାଠି ଥିବାବେଳେ ବର୍ତ୍ତମାନ ଜଣେ ବିଧାୟକଙ୍କ ଅଭାବ କାରଣରୁ ତୁରନ୍ତ ଏକ ନୂତନ ଦଳ ଗଠନ କରିହେଉନାହିଁ।
ଏହି ସମୟରେ ଯଦି ଆଉ ଜଣେ ବିଧାୟକ ଆସନ୍ତି ତେବେ ସେମାନେ ଦଳ ଗଠନ କରିବେ। ନୂଆ ଦଳର ନାମ ଲାଲଜୀ ବର୍ମାଙ୍କ ଉପରେ ନିର୍ଭର କରେ | ରାଇନି କହିଛନ୍ତି ଯେ ବହୁଜନ ସମାଜ ପାର୍ଟି ଅଧ୍ୟକ୍ଷା ମାୟାବତୀଙ୍କୁ ନେଇ ଆମର କୌଣସି ଅଭିଯୋଗ ନାହିଁ, କିନ୍ତୁ ଦଳର ଜାତୀୟ ସାଧାରଣ ସମ୍ପାଦକ ସତୀଶ ଚନ୍ଦ୍ର ମିଶ୍ରଙ୍କ ବ୍ୟବହାର ଠିକ ନଥିବାରୁ ବିଧାୟକଙ୍କ ମନରେ ଅସନ୍ତୋଷ ଅଛି |