ପିଏମ୍ ଆବାସ ଯୋଜନା କିସ୍ତି ନେଇ ୧୧ ମହିଳା ପ୍ରେମିକଙ୍କ ସହ ଫେରାର: ସ୍ୱାମୀଙ୍କ ଆକୁଳ ପ୍ରାର୍ଥନା ଦୟାକରି ଦ୍ୱିତୀୟ କିସ୍ତି ପଠାନ୍ତୁ ନାହିଁ

ଲକ୍ଷ୍ନୌ: ଉତ୍ତରପ୍ରଦେଶର ମହାରାଜଗଞ୍ଜ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଏଠାରେ ନିଚଲୌଲ ବ୍ଲକରେ ରହୁଥିବା ୧୧ ଜଣ ବିବାହିତା ମହିଳା ନିଜ ପ୍ରେମିକମାନଙ୍କ ସହିତ ଫେରାର ହୋଇ ଯାଇଛନ୍ତି। ଏତେ ସଂଖ୍ୟକ ମହିଳା ଏକାଠି ଫେରାର ହୋଇଥିବାରୁ ଏହି ଅଞ୍ଚଳରେ ଉତ୍ତେଜନା ଦେଖାଦେଇଛି।

ସୂଚନାନୁସାରେ, ପିଏମ ଆବାସ ଯୋଜନାର ପ୍ରଥମ କିସ୍ତି ଭାବେ ୪୦ ହଜାର ଟଙ୍କା ମହିଳାଙ୍କ ଆକାଉଣ୍ଟକୁ ଆସିଥିଲା। ଏହି ଯୋଜନା ଅନ୍ତର୍ଗତ, ଯେଉଁମାନଙ୍କର ନିଜସ୍ୱ ଘର ନାହିଁ ସେମାନଙ୍କୁ ସରକାର ଟଙ୍କା ଦେଇଥାନ୍ତି। ମହିଳାମାନେ ଏହି ଯୋଜନାର ଟଙ୍କା ପାଆନ୍ତି ଏବଂ ତାହା କେବଳ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ଆସିଥାଏ।

ଏହି ଘଟଣା ସାମ୍ନାକୁ ଆସିବା ପରେ ଘରୁ ପଳାଇ ଯାଇଥିବା ମହିଳାଙ୍କ ସ୍ୱାମୀମାନେ ପୁଲିସ୍ ଷ୍ଟେସନରେ ପହଞ୍ଚି ମାମଲା ରୁଜୁ କରିଛନ୍ତି। ଏଥିସହିତ ସଂପୃକ୍ତ ବିଭାଗ ଆଉ ଦ୍ୱିତୀୟ କିସ୍ତି ନ ପଠାଇବାକୁ ସ୍ବାମୀମାନେ ଆକୁଳ ପ୍ରାର୍ଥନା କରିଛନ୍ତି। ଏହା ମଧ୍ୟ ସାମ୍ନାକୁ ଆସିଛି ଯେ ନିଚଲୌଲ ବ୍ଲକରେ ୨୩୫୦ ମହିଳାଙ୍କୁ ଏହି ଯୋଜନାର ହିତାଧିକାରୀ ଭାବେ ପାଇଁ ଚିହ୍ନଟ କରାଯାଇଥିଲା। ଏହା ସହିତ ପିଏମ ଆବାସ ଯୋଜନା ଅନ୍ତର୍ଗତ ପ୍ରଥମ କିସ୍ତି ସମସ୍ତ ମହିଳାଙ୍କ ଆକାଉଣ୍ଟକୁ ପଠାଯାଇଥିଲା।

ଏହି ଯୋଜନାର ନିୟମ ଅନୁଯାୟୀ, ଯଦି କୌଣସି ହିତାଧିକାରୀ ପିଏମ୍ ଆବାସ ଯୋଜନା ଅନ୍ତର୍ଗତ ମିଳିଥିବା ଅର୍ଥକୁ ଅନ୍ୟ କୌଣସି କାର୍ଯ୍ୟରେ ବ୍ୟବହାର କରନ୍ତି, ତେବେ ସରକାରଙ୍କ ପାଖରେ ଟଙ୍କା ଫେରସ୍ତ କରିବାର ଅଧିକାର ଅଛି। ଏପରି ପରିସ୍ଥିତିରେ, ଯେଉଁମାନଙ୍କର ପତ୍ନୀମାନେ ସେମାନଙ୍କ ପ୍ରେମିକମାନଙ୍କ ସହ ପଳାଇ ଯାଇଛନ୍ତି। ସେମାନଙ୍କଠାରୁ ଏହି ଯୋଜନାର ପ୍ରଥମ କିସ୍ତି ଅସୁଲ କରିବାକୁ ସରକାରୀସ୍ତରରେ ପ୍ରସ୍ତୁତି ଆରମ୍ଭ ହୋଇଛି।