ମାର୍ଚ୍ଚରେ ୧୨ରୁ ୧୪ବର୍ଷ ବୟସ୍କଙ୍କୁ ଲାଗିବ କରୋନା ଟିକା !
ନୂଆଦିଲ୍ଲୀ: ବର୍ତ୍ତମାନ ଦେଶରେ ବୁଷ୍ଟର ଡୋଜ ଦିଆଯାଉଥିବା ସହ ୧୫-୧୮ବର୍ଷ ବୟସ୍କଙ୍କୁ ଟିକା ଦିଆଯିବା ଅଭିଯାନ ଚାଲୁ ରହିଛି। ଏମଧ୍ୟରେ ୧୨-୧୪ବର୍ଷ ବୟସ୍କଙ୍କୁ ଖୁବ ଶୀଘ୍ର ଟିକା ଦିଆଯିବ ବୋଲି ଚର୍ଚ୍ଚା ଜୋର ଧରିଛି। ମାର୍ଚ୍ଚ ମାସରୁ ଦେଶରେ ୧୨ରୁ ୧୪ବର୍ଷ ବୟସର ପିଲାମାନଙ୍କ ପାଇଁ କରୋନା ଟିକାକରଣ ଆରମ୍ଭ ହୋଇପାରେ ବୋଲି ଆଶା କରାଯାଉଛି। ଟିକାକରଣ ପାଇଁ ଜାତୀୟ ବୈଷୟିକ ଉପଦେଷ୍ଟା ମଣ୍ଡଳୀ (ଏନଟିଏଜିଆଇ) ର ସଭାପତି ଏନ.କେ ଆରୋରା ଏହା କହିଛନ୍ତି। ବର୍ତ୍ତମାନ ଦେଶରେ ୧୫ରୁ ୧୮ବର୍ଷ ବୟସର ପିଲାମାନଙ୍କୁ କରୋନା ଟିକା କୋଭାକ୍ସିନ ଦିଆଯାଉଛି।
Sambad is now on WhatsApp
Join and get latest news updates delivered to you via WhatsApp
ଡାକ୍ତର ଏନ.କେ ଆରୋରା କହିଛନ୍ତି ଯେ, ମାର୍ଚ୍ଚରେ ୧୨ରୁ ୧୪ବର୍ଷ ବୟସର ପିଲାମାନଙ୍କୁ ଭାରତ କରୋନା ଟିକା ଦେବା ଆରମ୍ଭ କରିପାରେ, କାରଣ ସେତେବେଳକୁ ୧୫ ରୁ ୧୮ବର୍ଷ ବୟସର ପିଲାମାନଙ୍କୁ ଟିକା ଦିଆଯାଇ ସାରିଥିବ। ୧୫-୧୮ ବୟସର ଏକ ଆନୁମାନିକ ୭.୪ କୋଟି ଜନସଂଖ୍ୟା ମଧ୍ୟରୁ ୩.୪୫ କୋଟିରୁ ଅଧିକ ପିଲା କୋଭାକ୍ସିନର ପ୍ରଥମ ଡୋଜ ନେଇସାରିଛନ୍ତି ଏବଂ ସେମାନଙ୍କୁ ୨୮ଦିନ ମଧ୍ୟରେ ଦ୍ୱିତୀୟ ଡୋଜ ଦିଆଯିବ। ଜାନୁଆରି ଶେଷ ସୁଦ୍ଧା ସମସ୍ତେ ପ୍ରଥମ ଡୋଜ ନେଇସାରିଥିବା ସହ ଫେବ୍ରୁଆରି ଶେଷ ସୁଦ୍ଧା ସମସ୍ତେ ଦ୍ବିତୀୟ ଡୋଜ ନେଇଯିବେ ବୋଲି ଆଶା କରାଯାଉଛି। ଥରେ ୧୫-୧୮ ବର୍ଷର ବୟସ ଶ୍ରେଣୀକୁ ଟିକା ଦିଆଯିବା ପରେ ସରକାର ୧୨-୧୪ ବର୍ଷ ବୟସ୍କଙ୍କୁ ଟିକା ଦେବା ନେଇ ମାର୍ଚ୍ଚରେ ଏକ ନୀତିଗତ ନିଷ୍ପତ୍ତି ନେଇପାରନ୍ତି। ସେ କହିଛନ୍ତି ଯେ ୧୨-୧୪ବର୍ଷ ବୟସ ବର୍ଗର ଆନୁମାନିକ ଜନସଂଖ୍ୟା ୭.୫କୋଟି ଅଟେ।