ବରେଲିରେ ୧୨ ବର୍ଷ ବାଳକକୁ କାମୁଡ଼ି ମାରି ପକାଇଲେ ବୁଲା କୁକୁର

ବରେଲି: ଉତ୍ତର ପ୍ରଦେଶର ବରେଲି ଅନ୍ତର୍ଗତ ସି. ବି. ଗଞ୍ଜ ଅଞ୍ଚଳରେ ମଙ୍ଗଳବାର ଦିନ ପଲେ ବୁଲା କୁକୁର ଜଣେ ୧୨ ବର୍ଷିୟ ବାଳକକୁ କାମୁଡ଼ି ମାରି ପକାଇଛନ୍ତି। ସେମାନଙ୍କ ଆକ୍ରମଣରେ ଆଉ ଜଣେ ପିଲା ବି ଆହତ ହୋଇଛି।

ସଂଗୃହୀତ ସୂଚନା ଅନୁସାରେ, ଖାନା ଗୌନ୍ତିୟା ଗ୍ରାମରେ ଅୟାନ୍‌ ନାମରେ ସେ ୧୨ ବର୍ଷିୟ ବାଳକଟି ସାଙ୍ଗମାନଙ୍କ ସହିତ ଖେଳୁଥିଲା। ସେତିକି ବେଳେ ବୁଲା କୁକୁରମାନେ ତାକୁ ଗୋଡ଼ାଇବାରୁ ସେ ଜୀବନ ବିକଳେ ଧାଇଁ ପଳାଇବାକୁ ଚେଷ୍ଟା କଲା। କିନ୍ତୁ, ବାଟରେ ତଳେ ପଡ଼ିଯିବାରୁ କୁକୁରମାନେ ତା’ ଉପରକୁ କୁଦିପଡ଼ି ଆକ୍ରମଣ କଲେ।

ବାଟୋଇମାନେ ଅୟାନ୍‌କୁ କୁକୁରମାନଙ୍କ କବଳରୁ ଉଦ୍ଧାର କରି ତୁରନ୍ତ ଡାକ୍ତରଖାନାକୁ ନେଇଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତା’ର ମୃତ୍ୟୁ ଘଟିଲା।

Image Courtesy of MSN

ସୂଚନାଯୋଗ୍ୟ, ଏଇଟା ବରେଲିରେ ବୁଲା କୁକୁର ଆକ୍ରମଣର ପ୍ରଥମ ଘଟଣା ନୁହେଁ।

ଦୁଇ ମାସ ତଳେ ବୁଲା କୁକୁରମାନେ ଜଣେ ୩ ବର୍ଷୀୟ ବାଳିକାକୁ ଆକ୍ରମଣ କରି ମାରି ପକାଇଥିଲେ। ବାଳିକାଟି ତାଙ୍କ ଘର ସାମ୍ନାରେ ଖେଳୁଥିବା ବେଳେ କୁକୁରମାନେ ତା’ ଉପରକୁ ଲମ୍ଫ ମାରି କାମୁଡ଼ା କାମୁଡ଼ି କରି ପ୍ରାୟ ୧୫୦ ମିଟର୍‌ ଦୂରକୁ ଟାଣି ନେଇ ମାରି ପକାଇଥିଲେ।

ସେହିପରି, ଗତବର୍ଷ ଡିସେମ୍ବର ମାସରେ ସି. ବି. ଗଞ୍ଜ ଅଞ୍ଚଳର ମଥୁରାପୁର ଗାଁ’ରେ ବୁଲା କୁକୁରମାନେ ହଠାତ୍‌ ଗୋଲୁ ବୋଲି ଜଣେ ୧୨ ବର୍ଷିୟ ବାଳକକୁ ଆକ୍ରମଣ କରି ଆହତ କରି ପକାଇଥିଲେ।