ଛତିଶଗଡ଼ରେ ମାଓବାଦୀଙ୍କ ସହ ଗୁଳି ବିନିମୟ ପରେ ୧୩ ଯବାନ ନିଖୋଜ, ୧୪ ଆହତ
ରାୟପୁର: ଶନିବାର ସନ୍ଧ୍ୟାରେ ବସ୍ତର ଅଞ୍ଚଳର ସୁକମା ଜିଲ୍ଲାରେ ମାଓବାଦୀଙ୍କ ସହ ଗୁଳି ବିନିମୟ ପରେ ୧୩ ଜଣ ନିରାପତ୍ତା କର୍ମଚାରୀ ନିଖୋଜ ହୋଇଯାଇଥିବା ପୁଲିସ କହିଛି ।
Sambad is now on WhatsApp
Join and get latest news updates delivered to you via WhatsApp
ଏହି ଗୁଳି ବିନିମୟ ଘଟଣାରେ ଆହତ ହୋଇଥିବା ଅନ୍ୟ ୧୪ଜଣ ନିରାପତ୍ତା କର୍ମଚାରୀଙ୍କୁ ଶନିବାର ରାତିରେ ଚିକିତ୍ସା ନିମନ୍ତେ ରାୟପୁର ନିଆଯାଇଛି । ସୁକମାର ଉତ୍ତରକୁ ପ୍ରାୟ ୪୦୦ କିଲୋମିଟର ଦୂରରେ ରାଜଧାନୀ ରାୟପୁର ଅବସ୍ଥିତ ।
ଛତିଶଗଡ଼ ପୁଲିସ ମହାନିର୍ଦେଶକ ଡି.ଏମ୍. ଅୱସ୍ଥିଙ୍କ କହିଛନ୍ତି ଯେ ଶନିବାର ଅପରାହ୍ଣ ପ୍ରାୟ ୧ଟା ବେଳେ ଚିନ୍ତାଗୁଫା ଅଞ୍ଚଳର କୋରଜଗୁଡ଼ା ପାହାଡ଼ ନିକଟରେ ଗୁଳି ବିନିମୟ ହୋଇଥିଲା । ସେତେବେଳେ ନିରାପତ୍ତା ବଳର ଏକ ମିଳିତ ଟିମ୍ ସେ ଅଞ୍ଚଳରେ ମାଓବିରୋଧୀ ଅଭିଯାନ ଚଳାଉଥିଲେ । ଅପରାହ୍ଣ ୧ଟା ପରେ ସନ୍ଧ୍ୟାଯାଏଁ ସେଠାରେ ଏକାଧିକ ବାର ଗୁଳି ବିନିମୟ ହୋଇଥିଲା । ନିରାପତ୍ତା ବଳର ଯବାନମାନେ ଅଭିଯାନରୁ ଫେରିବା ପରେ ଜଣାପଡ଼ିଲା ଯେ ସେମାନଙ୍କ ମଧ୍ୟରୁ ରାଜ୍ୟ ପୁଲିସର ୧୩ଜଣ ଯବାନ ଫେରି ନାହାନ୍ତି ଏବଂ ଅନ୍ୟ ୧୪ ଜଣ ଆହତ ହୋଇଛନ୍ତି ।
ଡିଷ୍ଟି୍ରକ୍ଟ ରିଜର୍ଭ ଗାର୍ଡ, ସ୍ପେସାଲ ଟାସ୍କ ଫୋର୍ସ ଏବଂ କୋବ୍ରା ବାହିନୀ ଚଳାଇଥିବା ଏହି ମାଓବିରୋଧୀ ଅଭିଯାନରେ ୧୫୦ଜଣ ନିରାପତ୍ତା କର୍ମଚାରୀ ସମ୍ପୃକ୍ତ ଥିଲେ । ନିଖୋଜ ହୋଇଥିବା ୧୩ଜଣ ନିରାପତ୍ତା କର୍ମଚାରୀଙ୍କ ସନ୍ଧାନ ନେବା ଲାଗି ଆଜି ସକାଳେ ଘଟଣାସ୍ଥଳରେ ତଲାସ ଅଭିଯାନ ଆରମ୍ଭ ହୋଇଛି ।