ହାଇଦ୍ରାବାଦ: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ହାଇଦ୍ରାବାଦ ୟୁନିଟ୍ ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ୱାଇଏସ୍ ଜଗନ ମୋହନ ରେଡ୍ଡୀଙ୍କ ୨୭.୫ କୋଟି ଟଙ୍କାର ସେୟାରକୁ ଅସ୍ଥାୟୀ ଭାବେ ଜବତ କରିଛି। ଇଡିର ଏହି କାର୍ଯ୍ୟାନୁଷ୍ଠାନର ଏକ ଅଂଶ ଭାବରେ ଜଗନ ରେଡ୍ଡୀଙ୍କ ତିନିଟି କମ୍ପାନି କାର୍ମେଲ ଏସିଆ ହୋଲ୍ଡିଂସ ଲିମିଟେଡ୍, ସରସ୍ୱତୀ ପାୱାର ଆଣ୍ଡ୍ ଇଣ୍ଡଷ୍ଟ୍ରିଜ୍ ପ୍ରାଇଭେଟ୍ ଲିମିଟେଡ୍ ଏବଂ ହର୍ଷା ଫାର୍ମର ଅଂଶଧନ ଜବତ କରାଯାଇଛି। ଏହି ମାମଲାରେ ୱାଇଏସ୍‌ଆର୍‌ କଂଗ୍ରେସ ମୁଖ୍ୟଙ୍କ ଅଂଶଧନ ସହିତ କେନ୍ଦ୍ରୀୟ ଏଜେନ୍ସି ଡାଲମିଆ ସିମେଣ୍ଟସ୍ (ଭାରତ) ଲିମିଟେଡ୍ (ଡିସିବିଏଲ୍)ର ୩୭୭.୨ କୋଟି ଟଙ୍କାର ସମ୍ପତ୍ତି ମଧ୍ୟ ଜବତ କରିଛି। ଡିସିବିଏଲ୍ କହିଛି ଯେ ଜବତ ସମ୍ପତ୍ତିର ମୂଲ୍ୟ ୭୯୩.୩ କୋଟି ଟଙ୍କା।

Advertisment

ମାମଲା ରୁଜୁ ହେବାର ୧୪ ବର୍ଷ ପରେ ଏହି ଆଇନଗତ ପଦକ୍ଷେପ ନିଆଯାଇଛି। ଇଡିର ଅସ୍ଥାୟୀ ଜବତ ୨୦୧୧ରେ ସିବିଆଇ ଦ୍ୱାରା ପ୍ରଥମେ ରୁଜୁ ହୋଇଥିବା ଏକ ମାମଲା ସହ ଜଡିତ। ଏହି ମାମଲାରେ ଭାରତୀ ସିମେଣ୍ଟ କର୍ପୋରେସନ୍ ପ୍ରାଇଭେଟ୍ ଲିମିଟେଡ୍ ନାମକ ଏକ କମ୍ପାନିରେ ଡିସିବିଏଲ୍‌ର ପୁଞ୍ଜିନିବେଶ ସମ୍ପୃକ୍ତ। ଡିସିବିଏଲ୍‌କୁ ଏପ୍ରିଲ ୧୫ରେ ଇଡିର ନୋଟିସ୍ ମିଳିଥିଲା, ଯାହା ମାର୍ଚ୍ଚ ୩୧ରେ ଜାରି ହୋଇଥିଲା। ଡିସିବିଏଲ୍ ଦ୍ୱାରା କିଣାଯାଇଥିବା ଜମିର ମୂଲ୍ୟ ୩୭୭ କୋଟି ଟଙ୍କା ଥିଲା। ସିବିଆଇ ଓ ଇଡି ତଦନ୍ତରୁ ଜଣାପଡିଛି ଯେ ଡିସିବିଏଲ୍ ପୂର୍ବରୁ ଜଗନ ରେଡ୍ଡୀଙ୍କ ସହ ଜଡ଼ିତ କମ୍ପାନି ରଘୁରାମ ସିମେଣ୍ଟସ୍ ଲିମିଟେଡରେ ୯୫ କୋଟି ଟଙ୍କା ନିବେଶ କରିଥିଲା। ବଦଳରେ ଜଗନ ରେଡ୍ଡୀ ତାଙ୍କ ପିତା ତତ୍କାଳୀନ ମୁଖ୍ୟମନ୍ତ୍ରୀ ୱାଇଏସ୍ ରାଜଶେଖର ରେଡ୍ଡୀଙ୍କ ଉପରେ ନିଜର ପ୍ରଭାବ ପ୍ରୟୋଗ କରି ଡିସିବିଏଲ୍‌କୁ କଡାପା ଜିଲ୍ଲାରେ ୪୦୭ ହେକ୍ଟର ଖଣି ଲିଜ୍ ସୁରକ୍ଷିତ କରିବାରେ ସାହାଯ୍ୟ କରିଥିଲେ ବୋଲି ଅଭିଯୋଗ ହୋଇଛି।