ଜମ୍ମୁରୁ ହଟିଲା ୧୪୪, କଶ୍ମୀରରେ ପାଳନ ହେବ ଇଦ୍
ଶ୍ରୀନଗର: ଧୀରେ ଧୀରେ ଜମ୍ମୁ-କଶ୍ମୀରରେ ସ୍ୱାଭାବିକତା ଫେରୁଛି। କଶ୍ମୀରର ବିଭିନ୍ନ ଅଞ୍ଚଳରେ ଶୁକ୍ରବାର ନମାଜ ଲାଗି ସୁରକ୍ଷା ବ୍ୟବସ୍ଥାକୁ କୋହଳ କରାଯାଇଥିବା ବେଳେ ଜମ୍ମୁରେ ୧୪୪ଧାରା ଉଠାଇ ଦିଆଯାଇଛି। ଏଥିସହ କେତେକ ଅଞ୍ଚଳରେ ସ୍କୁଲ-କଲେଜ ଆଜି ଖୋଲିଛି। ଅନ୍ୟପକ୍ଷରେ କଶ୍ମୀର ଉପତ୍ୟାକାରେ ଇଦ୍ ପାଳନ କରାଯିବ ବୋଲି ସୂଚନା ଦେଇଛନ୍ତି ରାଜ୍ୟପାଳ ସତ୍ୟପାଲ ମଲିକ।
Sambad is now on WhatsApp
Join and get latest news updates delivered to you via WhatsApp
ଆଜି ଜମ୍ମୁ-କଶ୍ମୀର ରାଜ୍ୟପାଳଙ୍କ ସହ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କର ଆଲୋଚନା ହୋଇଥିଲା। ରାଜ୍ୟର ଆଇନ-ଶୃଙ୍ଖଳା ପରିସ୍ଥିତିର ସମୀକ୍ଷା ମଧ୍ୟ ଏହି ବୈଠକରେ କରାଯାଇଥିଲା। ଏହାପରେ ରାଜ୍ୟପାଳ ଇଦ ପାଳନ ନେଇ ସ୍ପଷ୍ଟ କରିଥିଲେ।
ଜମ୍ମୁର ଜିଲ୍ଳାପାଳ ପୂଜା ଶାଲୀ ଆଜି ଟୁଇଟ୍ କରି ୧୪୪ ଧାରା ଉଠିବା ଓ ସ୍କୁଲ-କଲେଜ ଖୋଲିବା ନେଇ ସୂଚନା ଦେଇଛନ୍ତି। ତେବେ ଜମ୍ମୁରେ ପୂର୍ବଭଳି ଇଣ୍ଟରନେଟ୍ ସେବା ବନ୍ଦ ରଖାଯାଇଛି।
ଅନ୍ୟପକ୍ଷରେ ଜମ୍ମୁ-କଶ୍ମୀରର ମୁଖ୍ୟ ସଚିବ ସୂଚନା ଦେଇଛନ୍ତି ଯେ ରାଜ୍ୟର ୪୦-୫୦ ପ୍ରତିଶତ ଅଞ୍ଚଳରେ କଟକଣା କୋହଳ କରାଯାଇଛି। ଇଦ୍କୁ ଆଖିରେ ରଖି ଏଭଳି ବ୍ୟବସ୍ଥା କରାଯାଇଥିବା ଜଣାଯାଇଛି।