ଭାରତୀୟ ଆପର କମାଲ, ୧୫କୋଟି ଅତିକ୍ରମ କଲା ଡାଉନଲୋଡ଼ ସଂଖ୍ୟା

ନୂଆଦିଲ୍ଲୀ: ଭାରତର ପ୍ରଥମ କଣ୍ଟାକଟ ଟ୍ରେସିଙ୍ଗ ଆପ୍ ଆରୋଗ୍ୟ ସେତୁ ୧୫୦ ମିଲିୟନ୍ ବା ୧୫ କୋଟି ଥର ଡାଉନଲୋଡ଼ କରାଯାଇଛି | ଆରୋଗ୍ୟ ସେତୁ ଆପ୍ ଏହାର ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ଏକ ପୋଷ୍ଟ ମାଧ୍ୟମରେ ଏହି ସୂଚନା ଦେଇଛି | ଏହି ପୋଷ୍ଟରେ ଦର୍ଶାଯାଇଛି ଯେ ୨ ଏପ୍ରିଲ ୨୦୨୦ ରେ ଲଞ୍ଚ ହେବା ପରଠାରୁ ଏହି ଆପ୍ ବର୍ତ୍ତମାନ ୧୫୦ ମିଲିୟନ୍ ୟୁଜର୍ ଅତିକ୍ରମ କରିଛି। ଭାରତ ସରକାର ମଧ୍ୟ ଏହି ଆପକୁ ବ୍ୟବହାର କରିବା ପାଇଁ କେତେକ ସଂସ୍ଥା ପାଇଁ ବାଧ୍ୟତାମୂଳକ କରିଛନ୍ତି। ଏହା ବ୍ୟତୀତ ଅନେକ ରାଜ୍ୟରେ ମଲ୍ କିମ୍ବା ଦୋକାନ ବଜାର ପରି ସର୍ବସାଧାରଣ ସ୍ଥାନରେ ପ୍ରବେଶ ପାଇଁ ଏହି ଆପ୍ ବାଧ୍ୟତାମୂଳକ ଅଟେ।

ଡାଉନଲୋଡ୍ ମାମଲାରେ ଆରୋଗ୍ୟ ସେତୁ ଆପ୍ ତୁର୍କୀର ପାଣ୍ଡେମିକ୍ ଆଇସୋଲେସନ ଟ୍ରାକିଂ ଆପ୍ ଏବଂ ଜର୍ମାନୀର କରୋନା ୱାର୍ନ ଆପକୁ ଅତିକ୍ରମ କରିସାରିଛି। ଏହି ଉଭୟ ଆପ୍ ଯଥାକ୍ରମେ ୧.୧ କୋଟି ଏବଂ ୧.୦୪ କୋଟି ଥର ଡାଉନଲୋଡ୍ ହୋଇଛି | ସେହିପରି ଆରୋଗ୍ୟ ସେତୁ ଆପ ଜାପାନର କୋକୋଆ ଏବଂ ଇଣ୍ଡୋନେସିଆର ପେଡୁଲି ଲିଣ୍ଡୁଙ୍ଗୀ ଆପକୁ ମଧ୍ୟ ଅତିକ୍ରମ କରିଛି |

ଏଠାରେ ସୂଚନା ଥାଉ କି ଆରୋଗ୍ୟ ସେତୁ ଆପ ଉଭୟ ଆଣ୍ଡ୍ରଏଡ୍ ସ୍ମାର୍ଟଫୋନ୍ ଏବଂ ଆଇଫୋନ୍ ପାଇଁ ଉପଲବ୍ଧ ଥିବାବେଳେ ବ୍ଲୁଟୁଥ୍, ଲୋକେସନ ଏବଂ ମୋବାଇଲ୍ ନମ୍ବର ସାହାଯ୍ୟରେ, ଏହି ଆପ୍ ଯାଞ୍ଚ କରେ ଯେ ଆପଣ କରୋନା ସଂକ୍ରମିତ ବ୍ୟକ୍ତିଙ୍କ ସହ ଯୋଗାଯୋଗ କରିଛନ୍ତି ନା ନାହିଁ | ଏହି ଆପରେ ଅଧିକ ଗୁରୁତ୍ୱପୂର୍ଣ୍ଣ ସୂଚନା ଯେପରିକି କୋଭିଡ-୧୯ ସହାୟତା କେନ୍ଦ୍ର ଏବଂ ସେଲ୍ଫ ଆସେସମେଣ୍ଟ ଟେଷ୍ଟ ଅନ୍ତର୍ଭୁକ୍ତ, ଯାହା ଦ୍ୱାରା ଆପଣ ସଂକ୍ରମଣ ବିପଦରେ ଅଛନ୍ତି କି ନାହିଁ ଯାଞ୍ଚ କରିପାରିବେ।

ସମ୍ବନ୍ଧିତ ଖବର