ଗୁଜରାଟର ପୋରବନ୍ଦରରେ ଭାରତୀୟ ନୌସେନାର ତାଲିମ ନେଉଥିବା ୧୬ଜଣ ନାବିକ କୋଭିଡ୍-୧୯ ଆକ୍ରାନ୍ତ
ଅହମଦାବାଦ: ଗତ ଚାରି ଦିନ ମଧ୍ୟରେ ଗୁଜରାଟର ପୋରବନ୍ଦରସ୍ଥିତ ଭାରତୀୟ ନୌସେନା ବେସ୍ରେ ତାଲିମ୍ ଗ୍ରହଣ କରୁଥିବା ପ୍ରାୟ ୧୬ ଜଣ ନାବିକ କରୋନାଭାଇରସ୍ ପଜିଟିଭ୍ ବାହାରିଥିବା ପରୀକ୍ଷାରୁ ଜଣାପଡ଼ିଛି। ପୋରବନ୍ଦରରେ ସାମରିକ ଡାକ୍ତରଖାନା ନ ଥିବାରୁ ସେମାନଙ୍କୁ ଜାମନଗରସ୍ଥିତ ସାମରିକ ଡାକ୍ତରଖାନାରେ ଭର୍ତ୍ତି କରାଯାଇଥିବା କଥା ରାଜ୍ୟ ପ୍ରତିରକ୍ଷା ମୁଖପାତ୍ର ପୁନୀତ ଚଢ଼ା କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ତାଲିମ ଗ୍ରହଣ କରୁଥିବା ନାବିକମାନଙ୍କୁ ପୋରବନ୍ଦର ନୌସେନା ବେସ୍ରେ ନିଯୁକ୍ତ କରାଯାଇଥିଲା। ପ୍ରଥମ ପର୍ଯ୍ୟାୟରେ ଆଠଜଣ ନାବିକ କରୋନାଭାଇରସ୍ ପଜିଟିଭ୍ ହୋଇଥିବା କଥା ପରୀକ୍ଷାରୁ ଜଣାପଡ଼ିବା ପରେ ସେମାନଙ୍କୁ ଜାମନଗର ସାମରିକ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ବୋଲି ସେ ସୂଚନା ଦେଇଛନ୍ତି।
କଣ୍ଟାକ୍ଟ୍ ଟ୍ରେସିଙ୍ଗ୍ କରାଯିବା ପରେ, ସ୍ବାସ୍ଥ୍ୟ ଅଧିକାରୀମାନେ ବେସ୍ରୁ ଆହୁରି କିଛି ନମୁନା ସଂଗ୍ରହ କରିଥିଲେ। ସେଗୁଡ଼ିକୁ ପରୀକ୍ଷା କରିବା ପରେ ଜଣାପଡ଼ିଲା ଯେ ଦୁଇ ଦିନ ତଳୁ ଆହୁରି ଆଠ ଜଣ ନାବିକ ସଂକ୍ରମିତ ହୋଇଛନ୍ତି। ଚିକିତ୍ସା ନିମନ୍ତେ ସମସ୍ତଙ୍କୁ ଜାମନଗର ସ୍ଥାନାନ୍ତର କରାଯାଇଛି।
ରାଜ୍ୟ ପ୍ରତିରକ୍ଷା ମୁଖପାତ୍ର କହିଛନ୍ତି ଯେ ନୌସେନା ବେସ୍କୁ ସଂକ୍ରମଣ ମୁକ୍ତ କରିବା କାର୍ଯ୍ୟ ଶେଷ ହୋଇଛି। ସତର୍କତାମୂଳକ ପଦକ୍ଷେପସ୍ବରୂପ ଅନ୍ୟ ଅଳ୍ପ କେତେଜଣ କର୍ମଚାରୀଙ୍କୁ କ୍ବାରେଣ୍ଟିନ୍ରେ ରଖାଯାଇଛି।
ଏଠାରେ ସ୍ମରଣ କରାଇ ଦିଆଯାଇ ପାରେ ଯେ ଏପ୍ରିଲ୍ ମାସରେ ବଡ଼ୋଦରା ସାମରିକ ଷ୍ଟେସନ୍ରେ ତାଲିମ ଗ୍ରହଣ କରୁଥିବା ଚାରି ଜଣ ଯବାନ ସଂକ୍ରମିତ ହୋଇଥିବା ପରୀକ୍ଷାରୁ ଜଣାପଡ଼ିଥିଲା।