ନୂଆଦିଲ୍ଲୀ: ପାକିସ୍ତାନ ବିରୋଧରେ ଭାରତର ଅପରେସନ ସିନ୍ଦୂର ଉପରେ ଆଲୋଚନା ପାଇଁ ସଂସଦର ସ୍ୱତନ୍ତ୍ର ଅଧିବେଶନ ଡାକିବାକୁ ୧୬ଟି ବିରୋଧୀ ଦଳର ନେତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଦାବି କରିଥିବା ବେଳେ ମଙ୍ଗଳବାର ଏହି ପ୍ରସଙ୍ଗରେ ବିରୋଧୀ ଦଳଗୁଡ଼ିକର ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ କଂଗ୍ରେସ, ତୃଣମୂଳ କଂଗ୍ରେସ, ରାଷ୍ଟ୍ରୀୟ ଜନତା ଦଳ, ସମାଜବାଦୀ ପାର୍ଟି ଓ ଶିବସେନା (ୟୁବିଟି) ସମେତ ଅନେକ ଦଳର ନେତା ଯୋଗ ଦେଇଥିଲେ। ସଂସଦର ସ୍ୱତନ୍ତ୍ର ଅଧିବେଶନ ଦାବି ନେଇ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଚିଠିରେ ଇଣ୍ଡିମେଣ୍ଟର ସାଂସଦମାନେ ଦସ୍ତଖତ କରିଛନ୍ତି ବୋଲି ବିରୋଧୀ ଦଳ ନେତାମାନେ କହିଛନ୍ତି। ବୈଠକରେ ବରିଷ୍ଠ କଂଗ୍ରେସ ନେତା ଜୟରାମ ରମେଶ ଓ ଦୀପେନ୍ଦ୍ର ହୁଦା, ଟିଏମ୍‌ସି ନେତା ଡେରେକ ଓବ୍ରାଏନ, ସପା ନେତା ରାମଗୋପାଳ ଯାଦବ, ଆର୍‌ଜେଡିର ମନୋଜ ଝା ଓ ଶିବସେନାର ସଞ୍ଜୟ ରାଉତ ଯୋଗ ଦେଇଥିଲେ। ଡିଏମ୍‌କେ ମଧ୍ୟ ସ୍ୱାକ୍ଷର କରିଥିବା ନେତାମାନଙ୍କ ମଧ୍ୟରେ ଅଛି, କିନ୍ତୁ କରୁଣାନିଧିଙ୍କ ଜୟନ୍ତୀ ଥିବାରୁ ଏହି ବୈଠକରେ କୌଣସି ଡିଏମ୍‌କେ ନେତା ସାମିଲ ହୋଇନଥିଲେ।

Advertisment

ନ୍ୟାସନାଲ କନ୍‌ଫରେନ୍ସ, ସିପିଆଇ(ଏମ୍), ଆଇୟୁଏମ୍‌ଏଲ, ସିପିଆଇ, ରିଭଲ୍ୟୁସନରୀ ସୋସାଲିଷ୍ଟ ପାର୍ଟି (ଆର୍‌ଏସ୍‌ପି), ବିଦୁଥାଲାଇ ଚିରୁଥାଇଗଲ କାଚି (ଭିସିକେ), କେରଳ କଂଗ୍ରେସ, ଏମ୍‌ଡିଏମ୍‌କେ, ସିପିଆଇ(ଏମ୍‌ଏଲ) ଲିବରେସନ ମଧ୍ୟ ଚିଠିରେ ଦସ୍ତଖତ କରିଛନ୍ତି ବୋଲି ବିରୋଧୀ ନେତାମାନେ କହିଛନ୍ତି। ଆମ୍ ଆଦମୀ ପାର୍ଟି (ଆପ୍) ଏହି ବୈଠକରେ ଯୋଗ ଦେଇ ନ ଥିଲେ ମଧ୍ୟ ଏହି ଦାବି ନେଇ ପ୍ରଧାନମନ୍ତ୍ରୀଙ୍କୁ ଏକ ପୃଥକ୍ ଚିଠି ଲେଖିବ  ବୋଲି ଡେରେକ୍ ଓ’ବ୍ରାଏନ୍ ଗଣମାଧ୍ୟମକୁ କହିଛନ୍ତି। ତେବେ ସ୍ୱତନ୍ତ୍ର ଅଧିବେଶନ ଦାବି କରୁଥିବା ଦଳମାନଙ୍କ ମଧ୍ୟରେ ନ୍ୟାସନାଲିଷ୍ଟ କଂଗ୍ରେସ ପାର୍ଟି (ଏସ୍‌ପି) ନାହିଁ। ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ଅନେକ ବିରୋଧୀ ଦଳ ନେତା ସଂସଦର ସ୍ୱତନ୍ତ୍ର ଅଧିବେଶନ ପାଇଁ ଦାବି କରି ଆସୁଛନ୍ତି। ଅପରେସନ୍ ସିନ୍ଦୂର ସମ୍ପର୍କରେ ସାଂସଦମାନଙ୍କୁ ଅବଗତ କରାଇବା ପାଇଁ ଅନୁଷ୍ଠିତ ସର୍ବଦଳୀୟ ବୈଠକରେ ମଧ୍ୟ ଏହି ଦାବି ଉଠିଥିଲା। ଆତଙ୍କବାଦ ବିରୋଧରେ ଭାରତର ଆଭିମୁଖ୍ୟ ଜଣାଇବା ପାଇଁ ବିଭିନ୍ନ ଦେଶ ଗସ୍ତ କରୁଥିବା ବହୁଦଳୀୟ ପ୍ରତିନିଧି ଦଳ ଦେଶକୁ ଫେରିବା ପରେ ଅଧିବେଶନ ଆୟୋଜନ କରିବାକୁ ଟିଏମ୍‌ସି ପରାମର୍ଶ ଦେଇଛି।