ସିଟ ବେଲ୍ଟ ପିନ୍ଧିନଥିବାରୁ ୨୦୨୧ ମସିହାରେ ଚାଲିଯାଇଥିଲା ୧୬ ହଜାର ଲୋକଙ୍କ ଜୀବନ
ନୂଆଦିଲ୍ଲୀ: ଦୁନିଆର ଅନ୍ୟ ଦେଶ ତୁଳନାରେ ଭାରତରେ ସର୍ବାଧିକ ସଡ଼କ ଦୁର୍ଘଟଣା ଘଟିଥାଏ। ସଡକ ଏବଂ ପରିବହନ ମନ୍ତ୍ରାଳୟର ରିପୋର୍ଟ ଅନୁଯାୟୀ, ଭାରତରେ ସଡ଼କ ଦୁର୍ଘଟଣାରେ ପ୍ରତିବର୍ଷ ହାରାହାରି ୧.୫୦ ଲକ୍ଷ ଲୋକ ପ୍ରାଣ ହରାନ୍ତି। ମନ୍ତ୍ରାଳୟର ସୂଚନାନୁସାରେ, ବେପରୁଆ ଡ୍ରାଇଭିଂ ଏବଂ ଟ୍ରାଫିକ ନିୟମ ଉଲ୍ଲଂଘନ ସଡକ ଦୁର୍ଘଟଣାର ମୁଖ୍ୟ କାରଣ | ଲୋକମାନେ ଗାଡି ଚଳାଇବା ସମୟରେ ସିଟ୍ ବେଲ୍ଟ ବିନା ଗାଡି ଚଳାଇବା ସହିତ ବିଭିନ୍ନ ଟ୍ରାଫିକ ନିୟମ ଉଲ୍ଲଂଘନ କରନ୍ତି। ଟାଟା ଗ୍ରୁପର ପୂର୍ବତନ ଚେୟାରମ୍ୟାନ୍ ସାଇରସ୍ ମିସ୍ତ୍ରୀ ଚଳିତ ବର୍ଷ ସେପ୍ଟେମ୍ବର ୪ରେ ସିଟ୍ ବେଲ୍ଟ ନ ପିନ୍ଧି ଗାଡିରେ ଯାଉଥିବାବେଳେ କାର ଦୁର୍ଘଟଣାରେ ମୃତ୍ୟୁବରଣ କରିଥିଲେ। ଆଉ ଆଜି ଆମେ ଆପଣଙ୍କୁ ଏଭଳି କିଛି ତଥ୍ୟ ଦେବାକୁ ଯାଉଛୁ, ଯାହାକୁ ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ |
Sambad is now on WhatsApp
Join and get latest news updates delivered to you via WhatsApp
ବାସ୍ତବରେ ସଡକ ଦୁର୍ଘଟଣା ସମ୍ପର୍କିତ ଏକ ରିପୋର୍ଟରେ ସଡକ ଓ ପରିବହନ ମନ୍ତ୍ରାଳୟ କହିଛି ଯେ ୨୦୨୧ ମସିହାରେ ହୋଇଥିବା ସମସ୍ତ ସଡକ ଦୁର୍ଘଟଣା ମଧ୍ୟରେ ସିଟ୍ ବେଲ୍ଟ ନ ପିନ୍ଧି ଗାଡି ଚଳାଇବା ମାମଲା ସର୍ବାଧିକ। କେବଳ ଗୋଟିଏ ବର୍ଷରେ, ୧୬,୩୯୭ଜଣ ଲୋକ, ଯେଉଁମାନେ ସିଟ୍ ବେଲ୍ଟ ବିନା ଗାଡି ଚଳାଉଥିଲେ ସଡ଼କ ଦୁର୍ଘଟଣାରେ ପ୍ରାଣ ହରାଇଥିଲେ | ଏଥିରେ ୮,୪୩୮ ଡ୍ରାଇଭର ଏବଂ ୭,୯୫୯ଜଣ ଯାତ୍ରୀ ସାମିଲ ହୋଇଥିଲେ। ଏକ ରିପୋର୍ଟରୁ ଜଣାପଡିଛି ଯେ କାରରେ ଯାତ୍ରା କରୁଥିବା ଅଧିକାଂଶ ଯାତ୍ରୀ ସିଟ୍ ବେଲ୍ଟ ବ୍ୟବହାର କରନ୍ତି ନାହିଁ। ଏଭଳି ପରିସ୍ଥିତିରେ, ଦୁର୍ଘଟଣା ସମୟରେ ସେମାନେ ଅଧିକ କ୍ଷତି ସହିବାର ଆଶଙ୍କା ଥାଏ | ଯାତ୍ରୀମାନଙ୍କ ସୁରକ୍ଷା ପାଇଁ କାରରେ ସିଟ୍ ବେଲ୍ଟ ଯୋଗାଇ ଦିଆଯାଉଛି |
ଦୁର୍ଘଟଣା ସମୟରେ ସିଟବେଲ୍ଟ ଯାତ୍ରୀଙ୍କୁ ସିଟରୁ ବାହାରକୁ ଯିବାକୁ ଦେଇନଥାଏ | ଉଲ୍ଲେଖ ଥାଉ କି ସାଇରସ୍ ମିସ୍ତ୍ରୀଙ୍କ ମୃତ୍ୟୁ ଘଟଣାର ଅନୁସନ୍ଧାନରୁ ଜଣାପଡିଥିଲା ଯେ ସେ ସିଟ୍ ବେଲ୍ଟ ବିନା ପଛ ସିଟରେ ବସିଥିବାରୁ ଦୁର୍ଘଟଣା ସମୟରେ ଏୟାରବ୍ୟାଗ ଖୋଲିନଥିଲା, ଯାହାଫଳରେ ଆଘାତ ଯୋଗୁଁ ତାଙ୍କର ମୃତ୍ୟୁ ହୋଇଯାଇଥିଲା |