୧୦ ପଦବୀ ପାଇଁ ୧୮୦୦ ଆଶାୟୀଙ୍କ ଅସମ୍ଭାଳ ଭିଡ଼ ଜମିଲା

ନୂଆଦିଲ୍ଲୀ: ଦେଶରେ ବେକାରୀ ସମସ୍ୟା କେଉଁ ସ୍ତରରେ ଅଛି ତାହା ଆଜି ପ୍ରମାଣିତ ହେଇଯାଇଛି । କାହିଁକି ନା, ଗୁଜରାଟର ଭରୁଚ ଜିଲ୍ଲାରେ ମାତ୍ର କେଇଟା ପଦ ପାଇଁ ଲାଗିଛି ହଜାର ହଜାର ଆଶାୟୀଙ୍କ ଭିଡ଼ । ଏକ ବେସରକାରୀ ସଂସ୍ଥା ପାଇଁ ଚାଲିଥିଲା ନିଯୁକ୍ତି ପ୍ରକ୍ରିୟା । ପଦବୀ ଥିଲା ମାତ୍ର ୧୦, ହେଲେ ଆଶାୟୀ ଆସିଥିଲେ ପ୍ରାୟ ୧୮୦୦ । ଆଉ ଏତେ ସଂଖ୍ୟକ ଆଶାୟୀଙ୍କ ପାଇଁ ନିଯୁକ୍ତି ସ୍ଥଳରେ ଲାଗିଥିଲା ଅସମ୍ଭାଳ ଭିଡ଼ । ସ୍ଥିତି ଏମିତି ହେଲା ଯେ, ରେଲିଂ ଭାଙ୍ଗି ତଳେ ପଡିଯାଇଥଲେ ଆଶାୟୀ।

ଗୋଟେ ପଟେ ଆରବିଆଇ ରିପୋର୍ଟ ଓ ସରକାରଙ୍କ ବେକାରୀ ସମସ୍ୟାକୁ ନେଇ ଭିନ୍ନ ଦାବି କରୁଥିବାବେଳେ ଗୁଜରାଟ ଭରୁଚର ଖବର କିନ୍ତୁ ଓଲଟା । ଆଉ ମୌକାକୁ ହାତଛଡା ନକରି କେନ୍ଦ୍ର ସରକାରଙ୍କୁ ଘେରିଛି କଂଗ୍ରେସ । ବିରୋଧୀ ଦଳ ନେତା ରାହୁଲ ଗାନ୍ଧୀ ବିଜେପିକୁ ଟାର୍ଗେଟ୍ କରି କହିଛନ୍ତି । ‘ବେକାରୀ ସମସ୍ୟା ଦେଶରେ ମହାମାରୀ ଭଳି ବ୍ୟାପିଲାଣି’ । ମୋଦୀଙ୍କ ଅମୃତକାଳ ଅଭିଯାନର ସତ ପଦାରେ ପଡିଛି ବୋଲି ସୋସିଆଲ ମିଡିଆରେ ପୋଷ୍ଟ କରିଛନ୍ତି ରାହୁଲ।