ଭୋପାଳରେ ୧୯ ବର୍ଷୀୟା ରୋଗୀଙ୍କୁ ଡାକ୍ତରଙ୍କ ଦୁଷ୍କର୍ମ

ଭୋପାଳ: ଚିକିତ୍ସା ପାଇଁ ଆସିଥିବା ଜଣେ ୧୯ ବର୍ଷୀୟା ଯୁବତୀଙ୍କୁ ପାଖାପାଖି ୧୫ ଦିନ ଧରି ଅଟକ ରଖି ଦୁଷ୍କର୍ମ କରିଥିବା ଅଭିଯୋଗରେ ଶନିବାର ଜଣେ ଡାକ୍ତରଙ୍କ ବିରୋଧରେ ମାମଲା ରୁଜୁ ହୋଇଛି। ଅଭିଯୁକ୍ତ ଡାକ୍ତର ଜଣକ ଫେରାର ଅଛନ୍ତି। ଅଭିଯୁକ୍ତ ଦୀପକ ନାୟକ ଗାନ୍ଧୀ ମେଡିକାଲ କଲେଜର ଡାକ୍ତର ବୋଲି ପୁଲିସ କହିଛି। ଛିନ୍ଦୱାଡାରେ ରହୁଥିବା ପୀଡ଼ିତାଙ୍କ ବେକରେ କିଛି ସମସ୍ୟା ଥିବାରୁ ଦୁଇମାସ ତଳେ ଅଭିଯୁକ୍ତ ଡାକ୍ତରଙ୍କ ସଂସ୍ପର୍ଶରେ ଆସିଥିଲେ। ଅଭିଯୁକ୍ତ ତାଙ୍କ ସହ ଫୋନ୍‌ରେ କଥାବାର୍ତ୍ତା ଆରମ୍ଭ କରିଥିଲେ ଏବଂ ପରେ ତାଙ୍କ ଡାକ୍ତରୀ ରିପୋର୍ଟ ପାଇଁ ଭୋପାଳ ଡାକିଥିଲେ।

ସେଠାରେ ସେ ମହିଳାଙ୍କୁ ନିଜ ଘରେ ଅଟକ ରଖି ଅକ୍ଟୋବର ୧୫ରୁ ଅକ୍ଟୋବର ୨୮ ମଧ୍ୟରେ ଦୁଷ୍କର୍ମ କରିଥିଲେ। ୩୦ ବର୍ଷୀୟ ଅଭିଯୁକ୍ତ ଡାକ୍ତର ବିବାହିତ ଏବଂ ଜଣେ ବାପା ବୋଲି ପୁଲିସ କହିଛି। ତାଙ୍କ ପତ୍ନୀ ଓ ପିଲା ଓଡ଼ିଶାରେ ଥିବା ନିଜ ଜନ୍ମସ୍ଥାନକୁ ଯାଇଥିଲେ ଏବଂ ସେ ଘରେ ଏକା ଥିଲେ। ଅଭିଯୁକ୍ତ ଜଣକ ତାଙ୍କୁ ଏକ ମନ୍ଦିରକୁ ନେଇ ଯାଇଥିଲେ ଏବଂ ତାଙ୍କ ସହ ବିବାହ ମଧ୍ୟ କରିଥିଲେ ବୋଲି ମହିଳା ଜଣକ କହିଛନ୍ତି। ସେ ତାଙ୍କୁ ନିଜ ଘରେ ଅଟକ ରଖି ଧମକ ଦେଇଥିଲେ କିନ୍ତୁ ପୀଡ଼ିତା କୌଣସି ପ୍ରକାରେ ଖସି ଯିବାରେ ସକ୍ଷମ ହୋଇଥିଲେ। ଏହାପରେ ସେ ଶନିବାର ମହିଳା ଥାନାରେ ଘଟଣା ସମ୍ପର୍କରେ ଜଣାଇବା ପରେ ଅଭିଯୁକ୍ତ ଫେରାର ଥିବା ପୁଲିସ କହିଛି।