କେକେଆର ଅଧିନାୟକ ନୀତୀଶ ରାଣାଙ୍କ ପତ୍ନୀଙ୍କୁ ପିଛା କରିବାରୁ ଗିରଫ ହେଲେ ଦୁଇ ଯୁବକ

ନୂଆଦିଲ୍ଲୀ: କ୍ରିକେଟର ତଥା କୋଲକାତା ନାଇଟ୍ ରାଇଡର୍ସ ଅଧିନାୟକ ନୀତୀଶ ରାଣାଙ୍କ ପତ୍ନୀ ସାଚି ମାରୱାଙ୍କୁ ପିଛା କରିବା ସହ ହଇରାଣ କରିବା ଅଭିଯୋଗରେ ଦିଲ୍ଲୀ ପୁଲିସ ଦୁଇଜଣ ଯୁବକଙ୍କୁ ଗିରଫ କରିଛି | ବାସ୍ତବରେ ସାଚି ନିଜ ଇନଷ୍ଟାଗ୍ରାମରେ ତାଙ୍କ ସହ ଘଟିଥିବା ଏକ ଅପ୍ରୀତିକର ଘଟଣା ବାବଦରେ ସେୟାର କରିଥିଲେ । ଆଉ ଏହା ଜଣାପଡିବା ପରେ ବର୍ତ୍ତମାନ ଦିଲ୍ଲୀ ପୁଲିସ ଏହି ମାମଲାରେ ଦୁଇଜଣ ଅଭିଯୁକ୍ତକୁ ଗିରଫ କରିଛି। ମିଳିଥିବା ସୂଚନା ଅନୁଯାୟୀ, ଦିଲ୍ଲୀ ପୁଲିସ ୩୫୪, ୩୫୪ଡି ସମେତ ବିଭିନ୍ନ ଧାରାରେ ଏକ ମାମଲା ରୁଜୁ କରିଛି। ଅଭିଯୋଗ ମୁତାବକ ଯେତେବେଳେ ସାଚି ମଡେଲ ଟାଉନରେ ଥିବା ତାଙ୍କ ଘରକୁ ଯାଉଥିଲେ ଏବଂ ଯେତେବେଳେ ସେ କିର୍ତ୍ତୀ ନଗରରେ ପହଂଚିଥିଲେ, ସେତେବେଳେ ଦୁଇ ଜଣ ଯୁବକ ଏକ ବାଇକରେ ଆସି ତାଙ୍କୁ ପିଛା କରିବା ଆରମ୍ଭ କରିଥିଲେ। ତା’ପରେ ସେମାନେ ବିନା କାରଣରେ ତାଙ୍କ ଗାଡିକୁ ଧକ୍କା ଦେଇଥିଲେ |

ଯେତେବେଳେ ସେ ଏହି ଘଟଣା ବାବଦରେ ଦିଲ୍ଲୀ ପୁଲିସକୁ ଜଣାଇବାକୁ ଚେଷ୍ଟା କରିଥିଲେ, ସେତେବେଳେ ସେ ସହାୟତା ପାଇ ନଥିଲେ। ଫୋନ ଯୋଗେ ପୁଲିସ ସହ କଥା ହେବା ସତ୍ତ୍ୱେ ତାଙ୍କୁ ପୁଲିସ ପରାମର୍ଶ ଦେଇଥିଲା ଯେ ଯେହେତୁ ସେ ନିରାପଦରେ ଘରେ ପହଞ୍ଚିସାରିଛନ୍ତି ତେଣୁ କଥା ଆଉ ଆଗକୁ ବଢ଼ାନ୍ତୁ ନାହିଁ | ଭବିଷ୍ୟତରେ ଏଭଳି ଘଟଣା ଘଟିଲେ ଗାଡି ନମ୍ବରକୁ ମନେ ରଖି ପୁଲିସକୁ ଜଣାଇବାକୁ କୁହାଯାଇଥିଲା | ଏହାପରେ ସାଚି ଇନଷ୍ଟାଗ୍ରାମରେ ନିଜର କ୍ରୋଧ ଏବଂ ନିରାଶା ପ୍ରକାଶ କରି ଲେଖିଥିଲେ ଯେ ଦିଲ୍ଲୀ ପୁଲିସ ସହାୟତା କରିବା ଦୂରେ ଥାଉ ମାମଲା ଆଗକୁ ନ ବଢାଇବାକୁ କହିଥିଲା | ସୋସିଆଲ ମିଡିଆରେ ଏବାବଦରେ ଜଣାପଡିବା ପରେ ଦିଲ୍ଲୀ ପୁଲିସ ଆକ୍ସନକୁ ଆସିଯାଇଥିଲା | ଆଉ ବର୍ତ୍ତମାନ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି | ଅଭିଯୁକ୍ତମାନଙ୍କ ମଧ୍ୟରୁ ଜଣେ ହେଉଛନ୍ତି ପାଣ୍ଡବ ନଗରର ଚୈତନ୍ୟ ଶିବମ (୧୮), ଅନ୍ୟ ଅଭିଯୁକ୍ତ ହେଉଛନ୍ତି ପଟେଲ ନଗରର ବିବେକ (୧୮)। ପୁଲିସ ଉଭୟଙ୍କୁ ପଚରାଉଚରା କରୁଛି।