ଯୌନ ଉତ୍ତେଜକ ତେଲ ଓ ଔଷଧରେ ବାବା ରାମଦେବଙ୍କ ଫଟୋ ଲଗାଇ ବିକ୍ରି କରୁଥିବା ଦୁଇ ଠକ ଗିରଫ

ଆଗ୍ରା: ଯୋଗଗୁରୁ ବାବା ରାମଦେବଙ୍କ ଫଟୋ ବ୍ୟବହାର କରି ନକଲି ଔଷଧ ଏବଂ ଶକ୍ତିବର୍ଦ୍ଧକ ତେଲ ବିକ୍ରି କରୁଥିବା ଏକ ଗ୍ୟାଙ୍ଗକୁ ପୁଲିସ ଠାବ କରିଛି। ପୁଲିସ ଆଗ୍ରାରୁ ଦୁଇ ଅଭିଯୁକ୍ତଙ୍କୁ ଗିରଫ କରି ହରିଦ୍ୱାରକୁ ଅଣାଯାଇଛି । ଅନୁସନ୍ଧାନରେ ଏହା ଜଣାପଡିଛି ଯେ ବାବା ରାମଦେବଙ୍କ ଫଟୋ ବ୍ୟବହାର କରି ବିଭିନ୍ନ ପର୍ଣ୍ଣ ସାଇଟରେ ଏହି ଔଷଧ ଓ ତେଲ ବିକ୍ରି ପାଇଁ ବିଜ୍ଞାପନ ଦିଆଯାଉଥିଲା | ଏହି ଵିଜ୍ଞାପନ ମାଧ୍ୟମରେ ଔଷଧ ଏବଂ ତେଲର ଅନଲାଇନ୍ ବୁକିଂ ମଧ୍ୟ କରାଯାଉଥିଲା। ସାଧାରଣ ଲୋକଙ୍କ ବିଶ୍ୱାସ ଜିତିବା ପାଇଁ ବାବା ରାମଦେବଙ୍କ ଫଟୋ ଔଷଧ ଉପରେ ଲଗାଯାଉଥିଲା |

ଏବାବଦରେ ଜାଣିବା ପରେ କିଛି ଦିନ ପୂର୍ବେ ପତଞ୍ଜଳି ଯୋଗପୀଠ ପକ୍ଷରୁ ଉତ୍ତରାଖଣ୍ଡ ବାହାଦରାବାଦ ପୁଲିସ ଷ୍ଟେସନରେ ଅଭିଯୋଗ କରାଯାଇଥିଲା | ଏହା ପରେ ଏକ ମାମଲା ରୁଜୁ ହୋଇଥିଲା। ଯେଉଁଥିରେ କୁହାଯାଇଥିଲା ଯେ ଅଶ୍ଳୀଳ ୱେବସାଇଟରେ ବାବା ରାମଦେବଙ୍କ ଫଟୋ ସହିତ ଏକ ନକଲି ବିଜ୍ଞାପନ ଚାଲିଛି। ଆଇଟି ଅଧିନିୟମ ଅନୁଯାୟୀ ମାମଲା ରୁଜୁ କରାଯାଇ ତଦନ୍ତ କରାଯାଇଥିଲା | ଆଉ ଏହି ବିଜ୍ଞାପନ ଉତ୍ତରପ୍ରଦେଶର ଆଗ୍ରାରେ କରାଯାଉଥିବାର ଜଣାପଡିଥିଲା | ଏହି ଘଟଣାରେ ଦୁଇ ଅଭିଯୁକ୍ତ ଆକାଶ ଶର୍ମା ଏବଂ ସିକନ୍ଦର ଆଗ୍ରାକୁ ଆଜି ଗିରଫ କରାଯାଇଥିଲା।

photo-amar ujala

ଉତ୍ତରାଖଣ୍ଡ ପୁଲିସର ଚଢ଼ାଉ ପରେ ଆଗ୍ରା ପୁଲିସ ଏବଂ ଡ୍ରଗ୍ସ ବିଭାଗ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଡ୍ରଗ୍ ବିଭାଗ ପ୍ରାୟ ୨.୫ କୋଟି ଟଙ୍କା ମୂଲ୍ୟର ନକଲି ଔଷଧ ଏବଂ ତେଲକୁ ଜବତ କରିଛି। ପୁଲିସ କହିଛି ଯେ ଗ୍ୟାଙ୍ଗର ମୁଖ୍ୟ ଦିଲୀପ ଯାଦବଙ୍କୁ ଏବେ ଖୋଜା ଚାଲିଛି। ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇ ଜେଲକୁ ପଠାଇ ଦିଆଯାଇଛି |