ଥାନା ହାଜତରେ ଅଛନ୍ତି ଦୁଇଟି କୁକୁଡ଼ା, ଦାନା ଖୁଆଉଛନ୍ତି ପୁଲିସ ବାବୁ
ହାଇଦ୍ରାବାଦ: ଥାନା ହାଜତରେ ଅଛନ୍ତି ଅପରାଧୀଙ୍କ ବଦଳରେ ଅଛନ୍ତି ଦୁଇଟି କୁକୁଡ଼ା | ଆଉ କୁକୁଡ଼ାଙ୍କ ପାଇଁ ଖାଦ୍ୟ-ପାନୀୟର ବ୍ୟବସ୍ଥା କରିଛନ୍ତି ଥାନା କର୍ମଚାରୀ | ଘଟଣାଟି ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ବି ଏକଥା ଏକଦମ ସତ | ମିଳିଥିବା ସୂଚନା ମୁତାବକ ତେଲେଙ୍ଗାନାର ମୁଦିଗୋଣ୍ଡା ଜିଲ୍ଲାର ଏକ ପୁଲିସ ଥାନାର ଦୁଇଟି କୁକୁଡ଼ାଙ୍କୁ ତାଲା ପକାଇ ରଖାଯାଇଛି | ଖବର ଅନୁଯାୟୀ, ମକର ସଂକ୍ରାନ୍ତିର କିଛି ଦିନ ତଳେ ମୁଦିଗୋଣ୍ଡାର ସବ୍-ଇନ୍ସପେକ୍ଟର ଟି ନରେଶଙ୍କୁ ବନାପୁରମ୍ ଗାଁରେ କୁକୁଡ଼ା ଖେଳ ହେଉଥିବାର ସୂଚନା ମିଳିଥିଲା | ଏହା ପରେ ଥାନା ଅଧିକାରୀ ତାଙ୍କ ଟିମ ସହ ଖେଳ ହେଉଥିବା ସ୍ଥାନରେ ଚଢ଼ାଉ କରି କିଛି ଯୁବକଙ୍କୁ ଗିରଫ କରିଥିଲେ | ପୁଲିସ ୧୦ ଜଣ ଯୁବକଙ୍କୁ ଗିରଫ କରିବା ସହ ଦୁଇଟି କୁକୁଡ଼ାକୁ ଜବତ କରିଥିଲା |
Sambad is now on WhatsApp
Join and get latest news updates delivered to you via WhatsApp
ତେବେ ଜାମିନ ପାଇ ୧୦ ଜଣ ଯୁବକ ଘରକୁ ଚାଲିଯାଇଥିବାବେଳେ ଥାନା ହାଜତରେ ଏବେ ଦୁଇଟି କୁକୁଡ଼ା ବନ୍ଦୀ ଜୀବନ କାଟୁଛନ୍ତି | ବଡ କଥା ଯେ କୁକୁଡ଼ା ଖେଳ କରି ଟଙ୍କା କମାଉଥିବା ଅଭିଯୁକ୍ତମାନେ ଜାମିନ ଚାଲିଯାଇଥିବାବେଳେ ନିରୀହ କୁକୁଡ଼ା ଦୁଇଟିଙ୍କୁ ହାଜତରେ ରଖାଯାଇଛି |
ଯେତେବେଳେ ପୁଲିସକୁ ଏ ବିଷୟରେ ପଚରାଯାଇଥିଲା, ସେତେବେଳେ ପୁଲିସ କହିଛି ଯେ ଦୁଇଟି କୁକୁଡ଼ାକୁ ଏହି ମାମଲାରେ ପ୍ରମାଣ ରୂପେ କୋର୍ଟରେ ହାଜର କରାଯିବ ଏବଂ କୋର୍ଟରେ ଶୁଣାଣି ପରେ ହିଁ କେବେ ଜେଲରୁ ମୁକ୍ତି ପାଇବେ ସେ ନେଇ ନିଷ୍ପତ୍ତି ନିଆଯିବ | ତେବେ ଖବର ଅନୁଯାୟୀ, ଏହି ଦୁଇଟି କୁକୁଡ଼ାଙ୍କୁ ଥାନା କର୍ମଚାରୀମାନେ ଖାଇବାକୁ ଦେଉଥିବାବେଳେ ଥାନାକୁ ଅଭିଯୋଗ ନେଇ ଆସୁଥିବା ବ୍ୟକ୍ତିମାନଙ୍କ ପାଇଁ ଦୁଇଟି କୁକୁଡ଼ା ଏବେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି |