୨ ମାଲବାହୀ ଟ୍ରେନ୍ ମୁହାଁମୁହିଁ ଧକ୍କା: ୨ ଡ୍ରାଇଭର ମୃତ, ୪ ଆହତ

ରାଞ୍ଚି: ଝାଡ଼ଖଣ୍ଡର ସାହେବଗଞ୍ଜ ଜିଲ୍ଲାରେ ମଙ୍ଗଳବାର ଭୋର ସମୟରେ ଦୁଇଟି ମାଲବାହୀ ଟ୍ରେନ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଦୁଇ ଜଣ ଲୋକୋ ପାଇଲଟ୍‌ଙ୍କ ମୃତ୍ୟୁ ଘଟିଛି ଏବଂ ୪ ଜଣ ଆହତ ହୋଇଛନ୍ତି। ଜାତୀୟ ତାପଜ ଶକ୍ତି ନିଗମ (ଏନ୍‌ଟିପିସି) ଦ୍ୱାରା ପରିଚାଳିତ ଏହି ଦୁଇ ଟ୍ରେନ୍ ମଧ୍ୟରେ ଭୋର ପ୍ରାୟ ୩ଟା ବେଳେ ବରହାଇଟ ଥାନା ଅନ୍ତର୍ଗତ ଭୋଗନାଡ଼ିହ ନିକଟରେ ମୁହାଁମୁହିଁ ଧକ୍କା ହୋଇଥିଲା। ଏହାପରେ ଗୋଟିଏ ଟ୍ରେନ୍‌ରେ ନିଆଁ ଲାଗିଯାଇଥିଲା।

ଘଟଣା ସମ୍ପର୍କରେ ଅବଗତ ଜଣେ ପୁଲିସ ଅଧିକାରୀ କହିଛନ୍ତି,  ରାତି ପ୍ରାୟ ୩ଟା ବେଳେ ଏହି ଘଟଣା ଘଟିଥିଲା। ଦୁଇଟି ଡିଜେଲ୍‌ ଇଞ୍ଜିନ୍ ଥିବା ଗୋଟିଏ ମାଲବାହୀ ଟ୍ରେନ୍ ଅପେକ୍ଷା କରି ଅନ୍ୟ ଟ୍ରେନ୍‌କୁ ଯିବାକୁ ଅନୁମତି ଦେଇଥିଲା। କିନ୍ତୁ ଭୁଲବଶତଃ ଦୁଇଟି ଡିଜେଲ୍‌ ଇଞ୍ଜିନ୍ ଥିବା ଅନ୍ୟ ଏକ ମାଲବାହୀ ଟ୍ରେନ୍ ସେହି  ସମାନ ଟ୍ରାକ୍ ଉପରେ ଚାଲିଥିଲା; ଯେଉଁଠାରେ ପ୍ରଥମ ମାଲବାହୀ ଟ୍ରେନ୍ ଅପେକ୍ଷା କରିଥିଲା। ଫଳରେ  ପ୍ରଚଣ୍ଡ ଧକ୍କା ପରେ ଉଭୟ ମାଲବାହୀ ଟ୍ରେନ୍ ଲାଇନ୍‌ଚ୍ୟୁତ ହୋଇଥିଲା ବୋଲି ପୁଲିସ ଅଧିକାରୀ କହିଛନ୍ତି। ଯେଉଁ ଟ୍ରାକ୍‌ରେ ଦୁର୍ଘଟଣା ଘଟିଛି ତାହା ମଧ୍ୟ ଏନ୍‌ଟିପିସିର ମାଲିକାନାରେ ଅଛି ଏବଂ ଏହା ମୁଖ୍ୟତଃ ଏହାର ପାୱାର ପ୍ଲାଣ୍ଟକୁ କୋଇଲା ପରିବହନ ପାଇଁ ବ୍ୟବହୃତ ହୁଏ। ସାହିବଗଞ୍ଜର ଏସ୍‌ପି ଅମିତ କୁମାର ସିଂହ କହିଛନ୍ତି ଯେ ଏହି ଘଟଣାରେ ଉଭୟ ଲୋକୋ ପାଇଲଟ୍‌ ଜ୍ଞାନେଶ୍ୱର ମାଲ (୩୫) ଓ ଅମ୍ବୁଜ ମହାତୋ (୩୫)ଙ୍କ ମୃତ୍ୟୁ ଘଟିଛି। ଏଥିରେ ସହକାରୀ ଲୋକୋ ପାଇଲଟ୍‌ ଜିକେ ନାଥ ଓ ରାଜେନ୍ଦ୍ର କୁମାରଙ୍କ ସମେତ ଦୁଇ ଜଣ ଶ୍ରମିକ ରବି ଘୋଷ, ଜିରୁଲ ଶେଖ ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ପାଇଁ ମାଲଦା ପଠାଯାଇଛି।