ନିଜକୁ ସେନା ଅଫିସର କହି ସେନା ଶିବିରରେ ପଶିଲେ ଦୁର୍ବୃତ୍ତ : ୨ଟି ଇନସାସ୍ ରାଇଫଲ ଧରି ଫେରାର
ଭୋପାଳ : ନିଜକୁ ସେନା ଅଫିସର କହି ଦୁଇ ଜଣ ଅଜ୍ଞାତ ବ୍ୟକ୍ତି ମଧ୍ୟପ୍ରଦେଶର ପଞ୍ଚମାଢିସ୍ଥିତ ସେନା କ୍ୟାଣ୍ଟନମେଣ୍ଟରେ ପ୍ରବେଶ କରି ୨ଟି ଇନସାସ୍ ରାଇଫଲ ଓ କିଛି ଜୀବନ୍ତ ଗୁଳିନେଇ ଫେରାର ହୋଇଯାଇଛନ୍ତି । ଏହି ଘଟଣା ଜଣାପଡିବାପରେ ପୁଲିସ ସମଗ୍ର ଅଞ୍ଚଳରେ ହାଇଆଲର୍ଟ ଜାରି କରିଛି । ଉକ୍ତ ଦୁଇ ବ୍ୟକ୍ତିଙ୍କୁ ଠାବ କରିବାକୁ ହୋସଙ୍ଗାବାଦ ପୁଲିସ ପକ୍ଷରୁ ଏକ ବଡ଼ ଧରଣର ତଲାସୀ ଅଭିଯାନ ଆରମ୍ଭ କରାଯାଇଛି ବୋଲି ଏସପି ଏମ.ଏଲ. ଚାରୀ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୁତ୍ରରୁ ମିଳିଥିବା ଖବର ମୁତାବକ ଶୁକ୍ରବାର ସକାଳେ ଦୁଇଜଣ ବ୍ୟକ୍ତି ନିଜକୁ ସେନା ଅଫିସର କହି କ୍ୟାଣ୍ଟନମେଣ୍ଟ ନିକଟସ୍ଥ ଏକ ଚେକ ପୋଷ୍ଟ ନିକଟରେ ପହଞ୍ଚିଲେ । ଭିତରୁ କାହାକୁ ଡାକିବାକୁ ସେମାନେ ଚେକପୋଷ୍ଟରେ ଥିବା ଯବାନମାନଙ୍କୁ କହିଥିଲେ । ଯବାନମାନଙ୍କ ସହ କିଛି ସମୟ କଥାହେବା ବାହାନାରେ ସେମାନେ ହଠାତ ସେଠାରେ ଥିବା ଦୁଇଟି ଇନସାସ ରାଇଫଲ ଓ ୨୦ଟି କ୍ୟାଟ୍ରିଜ ଧରି ଫେରାର ହୋଇଯାଇଥିଲେ । ଏହି ଘଟଣାର ତଦନ୍ତ ମିଲିଟାରୀ ପୁଲିସ କରୁଛି ।