ନିରାପତ୍ତା ବଳ ସହ ଗୁଳିବିନିମୟ କରି ଜମ୍ମୁ ଓ କଶ୍ମୀରର କୁଲ୍‌ଗାମ୍‌ରେ ୨ ଜୈଶ୍‌ ଆତଙ୍କବାଦୀ ନିହତ

କୁଲ୍‌ଗାମ୍‌: ଜମ୍ମୁ ଓ କଶ୍ମୀରର କୁଲ୍‌ଗାମ୍‌ ଜିଲ୍ଲା ଅନ୍ତର୍ଗତ ଅହ୍ବାତୂ ଗ୍ରାମରେ ମଙ୍ଗଳବାର ଦିନ ନିରାପତ୍ତା ବଳ ସହିତ ଗୁଳି ବିନିମୟ କରି ୨ଜଣ ଆତଙ୍କବାଦୀ ନିହତ ହୋଇଥିବା କଥା ପୁଲିସ କହିଛି।

ନିହତ ଆତଙ୍କବାଦୀମାନେ ଥିଲେ କୁଲ୍‌ଗାମ୍‌ ଅନ୍ତର୍ଗତ ବାଟପଡ଼ାର ମହମ୍ମଦ୍‌ ଶାଫି ଗନି ଏବଂ ତାକିୟାବାସୀ ମହମ୍ମଦ୍‌ ଆସିଫ୍‌ ୱାନି ଓରଫ୍‌ ଯୱାର୍‌। ଉଭୟ ଥିଲେ ଆତଙ୍କବାଦୀ ସଙ୍ଗଠନ ‘ଜୈଶ୍‌-ଏ-ମହମ୍ମଦ୍‌’ର ସଦସ୍ୟ।

ଗାଁରେ ଆତଙ୍କବାଦୀଙ୍କ ଉପସ୍ଥିତି ବିଷୟରେ ସୁନିର୍ଦ୍ଦିଷ୍ଟ ସୂଚନାକୁ ଭିତ୍ତି କରି ଅପରାହ୍ନ ପ୍ରାୟ ୩.୨୦ରେ ଜମ୍ମୁ ଓ କଶ୍ମୀର ପୁଲିସ ଓ ‘ସିଆର୍‌ପିଏଫ୍‌’ ସହ ଭାରତୀୟ ସେନା ସମ୍ପୃକ୍ତ ଅଞ୍ଚଳରେ ମିଳିତ ଭାବେ ‘କର୍ଡନ୍‌-ଆଣ୍ଡ-ସର୍ଚ’ ଅଭିଯାନ ଚଳାଇଥିଲେ।

Image Courtesy of Times of India

ନିରାପତ୍ତା ବଳ  ସେ ଅଞ୍ଚଳକୁ ଘେରିଯିବା ପରେ ନିର୍ଦ୍ଦିଷ୍ଟ ଘରେ ଆତ୍ମଗୋପନ କରିଥିବା ଆତଙ୍କବାଦୀମାନେ ଗୁଳି ଚଳାଇବାରୁ ଆତ୍ମରକ୍ଷା ପାଇଁ ନିରାପତ୍ତା ବଳ ପାଲଟା ଗୁଳି ଚଳାଇଲେ।

ଗୁଳି ଚାଳନା ବେଳେ ଗୋଡ଼ରେ ଗୁଳିରୁ ବିଚ୍ଛୁରିତ ଧାତବ ଖଣ୍ଡ ବିଦ୍ଧ କରିବାରୁ ଜଣେ ସୈନିକ ଆହତ ହୋଇଛନ୍ତି। ଚିକିତ୍ସା ନିମନ୍ତେ ତାଙ୍କୁ ଅବନ୍ତୀପୁରସ୍ଥିତ ୪୩୯ ଫିଲ୍‌ଡ୍‌ ହସ୍ପିଟାଲ୍‌କୁ ସ୍ଥାନାନ୍ତର କରାଯାଇଛି।

ଏହାଛଡ଼ା, ଆତଙ୍କବାଦୀମ‌ାନେ ନିର୍ବିଚାର ଭାବେ ଗୁଳି ଚଳାଇବାରୁ ସେମାନେ ଆତ୍ମଗୋପନ କରିଥିବା ଘର ନିକଟରେ ଥିବା ଗୋଟାଏ ଗ୍ୟାସ୍‌ ଗୋଦାମରେ ନିଆଁ ଲାଗି ଏକାଧିକ ବିସ୍ଫୋରଣ ସଂଘଠିତ ହୋଇଥିବା ଜଣାପଡ଼ିଛି।

ପରେ ସେ ଘରେ ଆତ୍ମଗୋପନ କରିଥିବା ୨ଜଣ ଆତଙ୍କବାଦୀଙ୍କୁ ଗୁଳି କରି ମାରି ଦିଆଯାଇଥିଲା। ଗୁଳି ବିନିମୟ ସ୍ଥଳରେ ଖାନତଲାସ କରିବା ପରେ ୨ଟି ଏ.କେ. ୪୭ ରାଇଫଲ୍‌ ଏବଂ ଗ୍ରେନେଡ୍‌ ଉଦ୍ଧାର କରାଯାଇଛି।

ସମ୍ବନ୍ଧିତ ଖବର