ଓ୍ଵାସିଂଟନ୍: ଯୁକ୍ତରାଷ୍ଟ୍ର ଆମେରିକା ପ୍ରଶାସନରେ ଏଥର ୨୦ରୁ ଅଧିକ ଭାରତୀୟ-ଆମେରିକୀୟ ନିଯୁକ୍ତ କିଂବା ମନୋନୀତ ହୋଇଛନ୍ତି। ସେମାନଙ୍କ ମଧ୍ୟରୁ ପ୍ରାୟ ୧୭ଜଣ ହ୍ଵାଇଟ୍ ହାଉସ୍ ପରିସର ମଧ୍ୟରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦପଦବୀରେ ରହିବେ।
Sambad is now on WhatsApp
Join and get latest news updates delivered to you via WhatsApp
ମନୋନୀତ ହୋଇଥିବା ଭାରତୀୟ-ଆମେରିକୀୟଙ୍କ ତାଲିକାର ଶୀର୍ଷରେ ଅଛନ୍ତି ନୀରା ତାନ୍ଦେନ୍। ସେ ହ୍ଵାଇଟ୍ ହାଉସ୍ ‘ଅଫିସ୍ ଅଫ୍ ମ୍ୟାନେଜ୍ମେଣ୍ଟ୍ ଆଣ୍ଡ୍ ବଜେଟ୍’ର ନିର୍ଦେଶିକା ଭାବେ ମନୋନୀତ ହୋଇଛନ୍ତି। ମାସାଚ୍ୟୁସେଟ୍ସ୍ର ବେଡ୍ଫୋର୍ଡରେ ଜନ୍ମିତା ୫୦ ବର୍ଷୀୟ ତାନ୍ଦେନ୍ ସମ୍ପ୍ରତି ‘ସେଣ୍ଟର୍ ଫର୍ ଆମେରିକାନ୍ ପ୍ରୋଗ୍ରେସ୍’ର ଅଧ୍ୟକ୍ଷା ଅଛନ୍ତି।
୨୧ତମ ୟୁଏସ୍ ଜେନେରାଲ୍ ସର୍ଜନ୍ ଭାବେ ମନୋନୀତ ହୋଇଛନ୍ତି ୪୩ ବର୍ଷିୟ ଡାକ୍ତର ବିବେକ ମୂର୍ତ୍ତି। ପୂର୍ବରୁ ସେ ଓବାମା ପ୍ରଶାସନରେ ୧୯ତମ ୟୁଏସ୍ ଜେନେରାଲ୍ ସର୍ଜନ୍ ଥିଲେ। ମୂର୍ତ୍ତିଙ୍କ ପରିବାର କର୍ଣ୍ଣାଟକରୁ ଯାଇ ଆମେରିକାରେ ବସବାସ କରିଥିଲେ। ବୋଷ୍ଟନ୍ସ୍ଥିତ ‘ବ୍ରିଗ୍ହାମ୍ ଆଣ୍ଡ୍ ଉମାନ୍ସ୍ ହସ୍ପିଟାଲ୍’ରୁ ଇଣ୍ଟର୍ନାଲ୍ ମେଡିସିନ୍ ରେସିଡେନ୍ସି ଶେଷ କରିଥିଲେ।
ଆସୋସିଏଟ୍ ଆଟର୍ଣ୍ଣି ଜେନେରାଲ୍ ଭାବେ ବନୀତା ଗୁପ୍ତଙ୍କୁ ମନୋନୀତ କରିଛନ୍ତି ଜୋ ବାଇଡେନ୍। ପ୍ରବାସୀ ଭାରତୀୟଙ୍କ ସନ୍ତତି ଭାବେ ପେନ୍ସିଲ୍ଭାନିଆର ଫିଲାଡେଲ୍ଫିଆରେ ଜନ୍ମିତା ବନୀତା ୟାଲେ ବିଶ୍ୱବିଦ୍ୟାଳୟରୁ ସ୍ନାତକ କରିବା ପରେ ୨୦୦୧ରେ ନିଉୟର୍କ ୟୁନିଭର୍ସିଟି ସ୍କୁଲ୍ ଅଫ୍ ଲ’ରୁ ଜୁରିସ୍ ଡକ୍ଟର୍ ଡିଗ୍ରି ହାସଲ କରିଥିଲେ।
ସାଧାରଣ ନାଗରିକ ସୁରକ୍ଷା, ଗଣତନ୍ତ୍ର ଏବଂ ମାନବ ଅଧିକାର ଅଣ୍ଡର୍ ସେକ୍ରେଟେରି ଭାବେ ମନୋନୀତ ହୋଇଛନ୍ତି ଉଜ୍ରା ଜେୟା ନାମ୍ନା ଅନ୍ୟ ଜଣେ ଭାରତୀୟ-ଆମେରିକୀୟ। ଜର୍ଜ ଟାଉନ୍ ୟୁନିଭର୍ସିଟି ସ୍କୁଲ୍ ଅଫ୍ ଫରେନ୍ ସର୍ଭିସ୍ରୁ ଜେୟା ସ୍ନାତକ ହାସଲ କରିଥିଲେ। ୧୯୯୦ ଦଶକରେ ଜେୟା ଯୁକ୍ତରାଷ୍ଟ୍ର ଆମେରିକାର ବିଦେଶ ସେବାରେ ଯୋଗ ଦେଇ ନୂଆଦିଲ୍ଲୀ, ମସ୍କାଟ୍, ଡାମାସ୍କସ୍, କାଇରୋ ଏବଂ କିଙ୍ଗଷ୍ଟନ୍ରେ ରାଷ୍ଟ୍ରଦୂତ ଭାବେ କାର୍ଯ୍ୟ କରିଛନ୍ତି।
ଭାଷଣ ଲିଖନ ନିର୍ଦେଶକ ଭାବେ ଭାରତୀୟ-ଆମେରିକୀୟ ବିନୟ ରେଡ୍ଡୀଙ୍କୁ ନିଯୁକ୍ତ କରିଛନ୍ତି ଜୋ ବାଇଡେନ୍। ପୂର୍ବରୁ ସେ ବାଇଡେନ୍ ଓ ହାରିସ୍ଙ୍କ ନିମନ୍ତେ ଭାଷଣ ଲେଖିଛନ୍ତି। ଓହିଓର ଡେଟନ୍ରେ ଲାଳିତପାଳିତ ରେଡ୍ଡୀ ହେଉଛନ୍ତି ଜଣେ ପ୍ରବାସୀ ଭାରତୀୟଙ୍କ ମଝିଆଁ ପୁଅ। ଓହିଓ ଷ୍ଟେଟ୍ ୟୁନିଭର୍ସିଟି କଲେଜ୍ ଅଫ୍ ଲ’ରୁ ଡିଗ୍ରି ହାସଲ କରିଥିବା ରେଡ୍ଡୀ ସମ୍ପ୍ରତି ଦୁଇ ଝିଅ ଓ ପତ୍ନୀଙ୍କ ସହ ନ୍ୟୁୟର୍କରେ ବାସ କରୁଛନ୍ତି।
ଭରତ ରାମମୂର୍ତ୍ତି ନାମକ ଅନ୍ୟ ଜଣେ ଭାରତୀୟ ଆମେରିକୀୟଙ୍କୁ ବାଇଡେନ୍ ‘ନ୍ୟାସ୍ନାଲ୍ ଇକୋନୋମିକ୍ କାଉନ୍ସିଲ୍ ଫର୍ ଫାଇନାନ୍ସିଆଲ୍ ରିଫର୍ମ ଆଣ୍ଡ୍ କଞ୍ଜୁମର୍ ପ୍ରୋଟେକ୍ସନ୍’ର ଉପନିର୍ଦେଶକ ଭାବେ ନିଯୁକ୍ତ କରିଛନ୍ତି। ମାସାଚ୍ୟୁସେଟ୍ସ୍ରେ ଜନ୍ମିତ ରାମମୂର୍ତ୍ତି ହାର୍ଭାର୍ଡ କଲେଜ୍ ଏବଂ ୟେଲ୍ ଲ’ ସ୍କୁଲ୍ରୁ ଡିଗ୍ରି ହାସଲ କରିଛନ୍ତି। ଦୁଇ ଝିଅ ଓ ପତ୍ନୀଙ୍କ ସହ ସେ ମଧ୍ୟ ଓ୍ଵାସିଂଟନ୍ ଡିସିରେ ରହୁଛନ୍ତି।
ଭାରତୀୟ-ଆମେରିକୀୟ ଗୌତମ ରାଘବନଙ୍କୁ ‘ଅଫିସ୍ ଅଫ୍ ପ୍ରେସିଡେନ୍ସିଆଲ୍ ପର୍ସୋନେଲ୍’ର ଉପନିର୍ଦେଶକ ଭାବେ ନିଯୁକ୍ତି ଦେଇଛନ୍ତି ବାଇଡେନ୍। ପ୍ରଥମ ପିଢ଼ିର ପ୍ରବାସବାସୀ ରାଘବନ ଭାରତରେ ଜନ୍ମ ହୋଇଥିଲେ ମଧ୍ୟ ସିଟଲ୍ରେ ତାଙ୍କର ବଢ଼ାକୁଢ଼ା ହୋଇଥିଲା। ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟରୁ ସ୍ନାତକ ହାସଲ କରିଥିବା ରାଘବନ ପତ୍ନୀ ଓ କନ୍ୟାଙ୍କ ସହ ଓ୍ଵାସିଂଟନ୍ ଡିସିରେ ରହୁଛନ୍ତି।
ସେହିଭଳି ମାଳା ଆଡ଼ିଗା ନାମ୍ନା ଭାରତୀୟ-ଆମେରିକୀୟଙ୍କୁ ଫାଷ୍ଟ୍ ଲେଡି ଜିଲ୍ ବାଇଡେନ୍ଙ୍କ ‘ପଲିସି ଡାଇରେକ୍ଟର୍’ ଭାବେ ନିଯୁକ୍ତି ପାଇଛନ୍ତି। ଜଣେ ଇଂରାଜୀ ଅଧ୍ୟାପିକା ଭାବେ ଆଡ଼ିଗା ଶିକ୍ଷାନୀତିରେ ସ୍ପେସିଆଲାଇଜେସନ୍ କରିଛନ୍ତି। ମାଳା ହେଉଛନ୍ତି ଖାନଦାନି କାକ୍କୁଞ୍ଜେ ଆଡ଼ିଗା ପରିବାର ଦାୟଦ। କର୍ଣ୍ଣାଟକ ବ୍ୟାଙ୍କ୍ ପ୍ରାଇଭେଟ୍ ଲିମିଟେଡ୍ର ସଂସ୍ଥାପକ ସ୍ୱର୍ଗତ ସୂର୍ଯ୍ୟନାରାୟଣ ଆଡ଼ିଗା ଏବଂ ୨୦୦୮ ବୁକର୍ ପୁରସ୍କାର ବିଜେତା ଅରବିନ୍ଦ ଆଡ଼ିଗାଙ୍କର ସେ ସମ୍ପର୍କୀୟା।
ଭାରତୀୟ-ଆମେରିକୀୟ ଗରିମା ବର୍ମା ନିଯୁକ୍ତି ପାଇଛନ୍ତି ଜିଲ୍ ବାଇଡେନ୍ଙ୍କ ଡିଜିଟାଲ୍ ନିର୍ଦେଶିକା ଭାବେ। ଭାରତରେ ଜନ୍ମିତା ବର୍ମା ଓହିଓ ଏବଂ ସେଣ୍ଟ୍ରାଲ୍ ଭ୍ୟାଲି ଅଫ୍ କାଲିଫର୍ଣ୍ଣିଆରେ ଲାଳିତପାଳିତ ହୋଇଥିଲେ। ‘ପାରାମାଉଣ୍ଟ୍ ପିକ୍ଚର୍ସ’, ‘ଓ୍ଵାଲ୍ଟ୍ ଡିଜ୍ନି କମ୍ପାନି’ର ‘ଏବିସି ନେଟ୍ଓ୍ଵାର୍କ’ ଏବଂ ‘ହରାଇଜନ୍ ମିଡିଆ’ରେ ସେ କାର୍ଯ୍ୟ କରିଛନ୍ତି।
ତରୁଣ ଛାବ୍ରାଙ୍କୁ ବାଇଡେନ୍ ପ୍ରଶାସନର ଜାତୀୟ ନିରାପତ୍ତା ପରିଷଦ୍ରେ ‘ଟେକ୍ନୋଲୋଜି ଆଣ୍ଡ୍ ନ୍ୟାସ୍ନାଲ୍ ସିକ୍ୟୁରିଟି’ରେ ବରିଷ୍ଠ ନିର୍ଦେଶକ ଭାବେ ନିଯୁକ୍ତି ପାଇଛନ୍ତି। ଟେନିସିରେ ଜନ୍ମିତ ଛାବ୍ରା ଲୁଇସିନିଆରେ ବଢ଼ିଥିଲେ। ସମ୍ପ୍ରତି ସେ ଜର୍ଜଟାଉନ୍ ବିଶ୍ୱବିଦ୍ୟାଳୟର ‘ସେଣ୍ଟର୍ ଫର୍ ସିକ୍ୟୁରିଟି ଆଣ୍ଡ୍ ଏମର୍ଜିଙ୍ଗ୍ ଟେକ୍ନୋଲୋଜି’ରେ ସିନିଅର୍ ଫେଲୋ ଅଛନ୍ତି।
ସୁମନା ଗୁହାଙ୍କୁ ଦକ୍ଷିଣ ଏସୀୟ ‘ନ୍ୟାସ୍ନାଲ୍ ସିକ୍ୟୁରିଟି କାଉନ୍ସିଲ୍’ର ବରିଷ୍ଠ ନିର୍ଦେଶିକା ଭାବେ ନିଯୁକ୍ତି ମିଳିଛି। ସମ୍ପ୍ରତି ସେ ତାଙ୍କର ସ୍ୱାମୀ ଓ ତିନି ପିଲାଙ୍କ ସହ ମେରିଲ୍ୟାଣ୍ଡ୍ ଅନ୍ତର୍ଗତ ବିଥେସ୍ଡାରେ ବସବାସ କରୁଛନ୍ତି।
ଶାନ୍ତି କଲଥିଲଙ୍କ ବାଇଡେନ୍ ପ୍ରଶାସନର ‘ଗଣତନ୍ତ୍ର ଏବଂ ମାନବ ଅଧିକାର’ର ସଂଯୋଜକ ଭାବେ ନିଯୁକ୍ତ କରାଯାଇଛି। କାଲିଫର୍ଣ୍ଣିଆର ମୂଳ ବାସିନ୍ଦା ଭାରତୀୟ ବଂଶୋଦ୍ଭବ ଶାନ୍ତି ବର୍କିଲିସ୍ଥିତ ୟୁନିଭର୍ସିଟି ଅଫ୍ କାଲିଫର୍ଣ୍ଣିଆ ଏବଂ ଲଣ୍ଡନ୍ ସ୍କୁଲ୍ ଅଫ୍ ଇକୋନୋମିକ୍ସ୍ ଆଣ୍ଡ୍ ପଲିଟିକ୍ସ୍ରୁ ସ୍ନାତକ ହାସଲ କରିଛନ୍ତି।
ବାଇଡେନ୍ ପ୍ରଶାସନରେ ‘କ୍ଲାଇମେଟ୍ ପଲିସି ଏବଂ ଇନୋଭେସନ୍’ରେ ବରିଷ୍ଠ ଉପଦେଷ୍ଟା ଭାବେ ନିଯୁକ୍ତ ହୋଇଛନ୍ତି ସୋନିଆ ଅଗ୍ରଓ୍ଵାଲ୍। ଓହିଓରେ ଜନ୍ମିତା ଏହି ଭାରତୀୟ-ଆମେରିକୀୟ ଷ୍ଟାନ୍ଫୋର୍ଡ ବିଶ୍ୱବିଦ୍ୟାଳୟରୁ ସିଭିଲ୍ ଇଞ୍ଜିନିୟରିଙ୍ଗ୍ରେ ସ୍ନାତକତ୍ତୋର ଡିଗ୍ରି ହାସଲ କରିଛନ୍ତି।
ସାବ୍ରିନା ସିଂହ ଉପରାଷ୍ଟ୍ରପତି କମଳା ହାରିସ୍ଙ୍କ ଡେପୁଟି ପ୍ରେସ୍ ସେକ୍ରେଟାରି ଭାବେ ନିଯୁକ୍ତ ପାଇଛନ୍ତି। ପୂର୍ବରୁ ସେ ବାଇଡେନ୍-ହ୍ୟାରିସ୍ ପ୍ରଚାର ଅଭିଯାନରେ ମଧ୍ୟ ପ୍ରେସ୍ ସଚିବ ଭାବେ କାର୍ଯ୍ୟ କରିଛନ୍ତି।
ଐଶା ଶାହାଙ୍କୁ ନିଯୁକ୍ତି ମିଳିଛି ବାଇଡେନ୍ଙ୍କ ‘ହ୍ଵାଇଟ୍ ହାଉସ୍ ଅଫିସ୍ ଅଫ୍ ଡିଜିଟାଲ୍ ସେକ୍ରେଟେରି’ର ପାର୍ଟନର୍ସିପ୍ ମ୍ୟାନେଜର ଭାବେ। କଶ୍ମୀରରେ ଜନ୍ମିତା ଶାହାଙ୍କର ଲାଳନପାଳନ ହୋଇଥିଲା ଲୁସିଆନାରେ। ଉତ୍ତର କାଲିଫର୍ଣ୍ଣିଆର ଡେଭିଡ୍ସନ୍ କଲେଜରୁ ସେ ଇଂରାଜୀ ଭାଷା ଓ ସାହିତ୍ୟରେ ଡିଗ୍ରି ହାସଲ କରିଥିଲେ। ସ୍ପେନ୍ସ୍ଥିତ ୟୁନିଭର୍ସିଡାଡ୍ ଡି ସେଭିଲ୍ଲାରୁ ସେ ସ୍ପାନିସ୍ ଭାଷା ମଧ୍ୟ ଅଧ୍ୟୟନ କରିଛନ୍ତି।
ସମୀରା ଫଜିଲ୍ଙ୍କୁ ନିଯୁକ୍ତି ମିଳିଛି ହ୍ଵାଇଟ୍ ହାଉସ୍ର ‘ନ୍ୟାସ୍ନାଲ୍ ଇକୋନୋମିକ୍ କାଉନ୍ସିଲ୍’ର ଉପନିର୍ଦେଶିକା ଭାବେ। ପୂର୍ବରୁ ସେ ୟେଲ୍ ଲ’ ସ୍କୁଲ୍ରେ କ୍ଲିନିକାଲ୍ ଲେକ୍ଚର୍ ଭାବେ କାର୍ଯ୍ୟ କରୁଥିଲେ। ୟେଲ୍ ସ୍କୁଲ୍ ଅଫ୍ ଲ’ରୁ ସେ ଆଇନ୍ରେ ଡିଗ୍ରି ହାସଲ କରିବା ସହ ହାର୍ଭାର୍ଡ କଲେଜ୍ରୁ ସୋସିଆଲ୍ ଷ୍ଟଡିଜ୍ରେ ସ୍ନାତକ କରିଛନ୍ତି।
ବେଦାନ୍ତ ପଟେଲ୍ଙ୍କୁ ମନୋନୀତ କରାଯାଇଛି ବାଇଡେନ୍ଙ୍କ ସହକାରୀ ପ୍ରେସ୍ ସଚିବ ଭାବେ। ହ୍ଵାଇଟ୍ ହାଉସ୍ ଗଣମାଧ୍ୟମ ବିଭାଗରେ ନିଯୁକ୍ତି ପାଇବାରେ ସେ ହେଉଛନ୍ତି ତୃତୀୟ ଭାରତୀୟ-ଆମେରିକୀୟ। ଭାରତରେ ଜନ୍ମିତ ଓ କାଲିଫର୍ଣ୍ଣିଆରେ ଲାଳିତପାଳିତ ପଟେଲ୍ ୟୁନିଭର୍ସିଟି ଅଫ୍ କାଲିଫର୍ଣ୍ଣିଆ-ରିଭର୍ସାଇଡ୍ ଏବଂ ୟୁନିଭର୍ସିଟି ଅଫ୍ ଫ୍ଲୋରିଡା।
ସ୍ୱାସ୍ଥ୍ୟ ନୀତି ବିଶେଷଜ୍ଞ ବିଦୁର ଶର୍ମା ନିଯୁକ୍ତ ହୋଇଛନ୍ତି ବାଇଡେନ୍ଙ୍କ ‘କୋଭିଡ୍-୧୯ ରେସ୍ପନ୍ସ୍ ଟିମ୍’ର ଟେଷ୍ଟିଙ୍ଗ୍ ଆଡ୍ଭାଇଜର୍ ଭାବେ ନିଯୁକ୍ତ ହୋଇଛନ୍ତି। ପୂର୍ବରୁ ମଧ୍ୟ ସେ ଓବାମା ପ୍ରଶାସନରେ କାର୍ଯ୍ୟ କରିଥିଲେ।
ନେହା ଗୁପ୍ତା ନିଯୁକ୍ତି ପାଇଛନ୍ତି ହ୍ଵାଇଟ୍ ହାଉସ୍ କାଉନ୍ସେଲ୍ ଅଫିସ୍ରେ ସହକାରୀ ପରାମର୍ଶଦାତା ଭାବେ। ସେ ହାର୍ଭାର୍ଡ କଲେଜ୍ ଆଣ୍ଡ୍ ଷ୍ଟାନ୍ଫୋର୍ଡ ଲ’ ସ୍କୁଲ୍ରୁ ଡିଗ୍ରି ହାସଲ କରିଛନ୍ତି।
ରୀମା ଶାହାଙ୍କୁ ନିଯୁକ୍ତି ଦିଆଯାଇଛି ହ୍ଵାଇଟ୍ ହାଉସ୍ କାଉନ୍ସେଲ୍ ଅଫିସ୍ରେ ଉପ-ସହକାରୀ ପରାମର୍ଶଦାତା ଭାବେ। ସେ ହାର୍ଭାର୍ଡ କଲେଜ୍, କେମ୍ବ୍ରିଜ୍ ବିଶ୍ୱବିଦ୍ୟାଳୟ ଏବଂ ୟେଲ୍ ଲ’ ସ୍କୁଲ୍ର ସ୍ନାତକ ହାସଲ କରିଛନ୍ତି।
ରୋହିତ ଚୋପ୍ରା ନିଯୁକ୍ତ ହୋଇଛନ୍ତି ‘କଞ୍ଜୁମର୍ ଫାଇନାନ୍ସିଆଲ୍ ପ୍ରୋଟେକ୍ସନ୍ ବ୍ୟୁରୋ’ର ନିର୍ଦେଶକ ଭାବେ। ସମ୍ପ୍ରତି ସେ ‘ଫେଡେରାଲ୍ ଟ୍ରେଡ୍ କମିସନ୍ରେ ଜଣେ କମିସନର୍ ଭାବେ କାର୍ଯ୍ୟ କରୁଛନ୍ତି।