ୟୁକ୍ରେନ ଯୁଦ୍ଧ : ଏପର୍ଯ୍ୟନ୍ତ ୨୯୪୫୦ ରୁଷ ସୈନ୍ୟ ମଲେଣି
କିବ୍ : ୟୁକ୍ରେନ ଉପରେ ରୁଷର ଆକ୍ରମଣକୁ ଇତି ମଧ୍ୟରେ ୪ ମାସ ପୂରଣ ହୋଇଥିବାବେଳେ ୟୁକ୍ରେନର ଏକ ବଡ଼ ଭାଗ ଧ୍ବଂସସ୍ତୁପରେ ପରିଣତ ହୋଇଛି । ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି ବନ୍ଦର ନଗରୀ ମାରିୟୁପୋଲ୍ । ଏହି ନଗରୀ ଉପରେ ରୁଷ ସୈନ୍ୟମାନେ କେତେ ଅତ୍ୟାଚାର କରିଛନ୍ତି ତାହାର ଭୟଙ୍କର ଚିତ୍ର ଧୀରେ ଧୀରେ ବାହାରକୁ ଆସିବାରେ ଲାଗିଛି । କିନ୍ତୁ ୟୁକ୍ରେନ ବି ରୁଷକୁ କଡ଼ା ଜବାବ ଦେଉଛି । ଏପର୍ଯ୍ୟନ୍ତ ୟୁକ୍ରେନ ସୈନ୍ୟଙ୍କ ହାତରେ ପ୍ରାୟ ୨୯ ହଜାର ୪୫୦ ରୁଷ ସୈନ୍ୟ ନିହତ ହୋଇସାରିଲେଣି ବୋଲି ୟୁକ୍ରେନର ଗଣମାଧ୍ୟମ ପ୍ରକାଶ କରିଛି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ମାରିୟୁପୋଲର ଏକ ଆପାର୍ଟମେଣ୍ଟର ଧ୍ବଂସସ୍ତୁପ ତଳୁ ପ୍ରାୟ ୨୦୦ଟି ମୃତଦେହ ଚିହ୍ନଟ ହୋଇଥିବା ୟୁକ୍ରେନର ଜଣେ ଅଧିକାରୀ ଗଣମାଧ୍ୟମକୁ ପ୍ରକାଶ କରିଛନ୍ତି । ଏହି ମୃତଦେହଗୁଡ଼ିକ ପଚିଯାଇ ଆଖପାଖରେ ପ୍ରବଳ ଦୁର୍ଗନ୍ଧ ବ୍ୟାପିବାରେ ଲାଗିଛି । ଅନ୍ୟପକ୍ଷରେ ୟୁକ୍ରେନ ପକ୍ଷରୁ କୁହାଯାଇଛି ଯେ ରୁଷର ଆକ୍ରମଣ ଯୋଗୁଁ କେବଳ ମାରିୟୁପୋଲ ନଗରୀରେ ପ୍ରାୟ ୨୨ ହଜାର ଲୋକ ମୃତ୍ୟୁବରଣ କରିଛନ୍ତି । ମାରିୟୁପୋଲ ମେୟରଙ୍କ ପରାମର୍ଶଦାତା ପେଟ୍ରୋ ଆଡ୍ରିୁୟୁପେସକୋଙ୍କ ସୂଚନା ଅନୁସାରେ ଏହି ନଗରୀ ଏବେ ଏକ ଭୁତ ସହରରେ ପରିଣତ ହୋଇଛି ।
ଗତ ଶନିବାରଦିନ ରୁଷ ସେନା ମାରିୟୁପୋଲ ଉପରେ ସଂପୂର୍ଣ୍ଣ ନିୟନ୍ତ୍ରଣ ଘୋଷଣା କରିଥିଲା । ଏହା ସହିତ ଗତ କିଛି ସପ୍ତାହ ହେଲା ମାରିୟୁପୋଲ ଓ ଏହି ନଗରୀରେ ଥିବା ଆଜବଷ୍ଟାଲ ଷ୍ଟିଲ ପ୍ଲାଣ୍ଟ ଅଧିକାର କରିବାକୁ ରୁଷ ଚଳାଇଥିବା ସାମରିକ ଅଭିଯାନ ଶେଷ ହୋଇଥିଲା । ମାରିୟୁପୋଲର ଆଜବଷ୍ଟାଲ ଷ୍ଟିଲ ପ୍ଲାଣ୍ଟରେ ଲୁଚିଥିବା ପ୍ରାୟ ୨୪୩୯ ଜଣ ୟୁକ୍ରେନୀୟ ସୈନ୍ୟ ଆତ୍ମସମର୍ପଣ କରିଥିଲେ ।